Gay nchrăp an tâm nđŭr, bah năp nĕ đêt pơh, ăp nghệ nhân ta ăp ƀon lan lĕ dŭt n’hâm tiăr nti, tŭr nkah tay ăp nău chĭng lĕ bên mô lah tiăr nti uĕh lơn, ƀư mhe nău tŭr. Yuh H Nhuen Mlô, ta ƀon Kŏ Siêr, phường Tân Lập, nkual ƀon têh Buôn Ma Thuột, n’gor Dak Lak an gĭt, yuh n’hanh ăp nuĭh tâm rmôt chĭng bu ur phường Tân Lập lĕ tiăr nti lĕ khay aơ gay dơi tŭr uĕh 2 nău chĭng ngăn, gông rla ntop đah njroh xoang.

Lor rnôk nai ntĭm ri mpôl hên nti êng, dăp êng rmôt nuĭh. Rnôk nai tât ri knŭng rgum ntĭm ăp ntŭk gŭ mô hŏ nâp, mô hŏ uĕh dơm. Mpôl hên nti plơ̆ sĭt, plơ̆ hăn tât rnôk blău ngăn ri mư rlu. Ăp oh yuh hăn tŭr chĭng jêng dŭt gơih rhơn, ăp nuĭh nsrôih dŭt n’hâm gay dơi tŭr uĕh ngăn.

Năm aơ rơh tal 3 tâm nđŭr văn hóa chĭng gông dơi n’gor Dak Lak ƀư. Ndrel đah tŭr chĭng n’hanh mboăt n’hôm rnoi nuĭh đêt, tâm nđŭr hôm geh ăp nău ƀư mpât mprơ, nău njroh way ơm, nkoch tâm lễ hội, nău ƀư gŭ âm văn hóa way ơm hăn ndrel đah văn hóa chĭng gông Tây Nguyên. Aơ lah di an ăp ntŭk nkre nti nsơm, tâm mâp tâm rgâl nău blău ơm, nkre mpơl nău blău, nău mĭn ƀư mhe, hun hao ăp ntil nău nteh n’hanh chĭng gông. Nghệ nhân Y Phúc Êban, ta ƀon Ju, xă Ea Tu, nkual ƀon têh Buôn Ma Thuột, n’gor Dak Lak nkoch:

Mbrơi mbrơi nti đêt nti đêt gay lơ nar uĕh lơn. Tâm nđŭr nkre lah tâm rlong, nta an gơih rhơn tâm rlong ri nuih n’hâm bah ăp rmôt mbra lơ hao.

Tâm nđŭr năm aơ wăch rgum rlău 500 nghệ nhân, diễn viên quần chúng bah 13 nkuăl, nkual têh, ngih sam ƀŭt Đại học Tây Nguyên n’hanh du đêt ngih sam ƀŭt THPT Dân tộc nội trú tâm n’gor râng. Du ntŭk dơi ndơ̆ tât ăp nău mprơ uĕh geh tât râng bah nghệ nhân ta âk rơh năm deh, ƀư tay tâm du gâl nău ƀư brah, lễ hội way ơm bah du rnoi nuĭh, du ntŭk ƀon lan. Yuh H Lâm H Mok, ta nkuăl têh Buôn Trấp, nkuăl Krông Ana nkoch:

Mpôl hên dŭt rhơn rnôk tât ta aơ dơi tâm nđŭr nti nsơm đah ăp rmôt băl mpeh tŭr chĭng n’hanh dơi tiăr nti âk lơn nău blău ơm bah ăp rmôt băl ta ăp ƀon êng tât râng tâm nđŭr.

Rlău 3 rơh ƀư, tâm nđŭr văn hóa chĭng gông lĕ geh âk nău rgâl mhe. Tâm nĕ, nău ƀư trong nchrăp đah ăp mông nar na nê̆ dơi mbơh bah ơm jêng ăp ntŭk kan geh âk mông nar tiăr nti, săch ăp nău mprơ, chĭng gông uĕh. Kơt ta nkual ƀon têh Buôn Ma Thuột, Ntŭk kan Truyền thông, Văn hóa n’hanh Thể thao nkual ƀon têh lĕ ƀư Tâm nđŭr Nghệ thuật quần chúng gay săch luh ăp rmôt nghệ nhân n’hanh nău njroh mprơ chĭng gông uĕh ngăn hăn râng tâm nđŭr gưl n’gor. Wa Phạm Thị Hải Bình, Groi giám đốc Ntŭk kan an gĭt:

Ăp nău njroh mprơ geh giải tâm nđŭr nghệ thuật quần chúng mbra râng Tâm nđŭr văn hóa chĭng gông yor n’gor Dak Lak ƀư. N’hanh mpôl hên nchrăp mbra ƀư măng tâm nđŭr njroh mprơ gay mbah rhơn nkah gĭt 120 năm nar ndâk njêng n’gor Dak Lak, 120 năm Buôn Ma Thuột têh jêng n’hanh hun hao, nkah gĭt 80 năm nar ndâk njêng Tahen ƀon lan Việt Nam, tâm trôm nău ƀư mbah rhơn 120 năm ndâk njêng n’gor.

Tĭng wa Lại Đức Đại, Groi giám đốc N’gâng kan Văn hóa, Thể thao n’hanh Pâl nđaih Dak Lak, nău mhe bah Tâm nđŭr năm aơ lah nău pơk hvi ntŭk ƀư. Ndơn yor ƀư rgum ta Nklang jay văn hóa n’gor ri ăp ntŭk kan tâm pă njroh mprơ ta 2 ƀon hun hao dăng mpeh pâl nđaih. Tă bah nĕ, nkre geh ndơ pâl nđaih rhŏ an năch di rlu lễ Quốc khánh, nkre kơl an nău ƀư tŭr chĭng goh  gông bah ăp ntŭk dơi rêng hvi lơn.

Năm aơ ƀư ta 2 ntŭk pâl nđaih ma tâm rơh rlu lễ 2/9 geh dŭt âk năch pâl nđaih, nĕ lah Ƀon pâl nđaih nsum mpôl Akŏ Dhông n’hanh nkual pâl nđaih nsum mpôl ƀon Kŏ Tam. Tâm nđŭr ƀư mô knŭng di an tâm rgâl nău blău ơm, mpơl nău blău, nuih n’hâm jao nkoch nău khlay way ơm bah văn hóa chĭng gông ma hôm di an n’gor Dak Lak nkoch, mpla nsơ văn hóa chĭng gông tât đah nuĭh ƀon lan n’hanh năch pâl nđaih tâm n’hanh bah dih dak.

Bơi 30 năm bôk nău njroh mprơ yor ăp mpôl rdâk ƀư n’hanh mprơ, đah âk nkô̆ nău way ơm văn hóa, nău way rêh jêng n’hanh chĭng gông mboăt n’hôm way ơm uĕh, tâm nđŭr lĕ rgop ntô̆ n’hao ăp nău khlay uĕh bah ăp nuĭh rnoi mpôl đêt dôl rêh ta n’gor Dak Lak. Nkre, rgop mpla nsơ văn hóa, pâl nđaih bah n’gor tât đah nuĭh ƀon lan n’hanh năch, nta an ntŭk ntô ƀư ngăn tâm ăp nar rlu lễ Quốc khánh ta ƀon lan tâm năm aơ.