Ôi 7/5, Lễ mít tinh gưl Ngih dak n’hanh Lễ ntroh hăn nkah ndray 70 năm Lơh dơi Điện Biên Phủ ƀư ta nkual ƀon têh Điện Biên Phủ, n’gor Điện Biên. Bah năp nê, kêng măng 6/5, Thủ tướng Chính phủ Phạm Minh Chính, Rnâng kan Ban Bí thư Trương Thị Mai ndrel ăp kruanh rđău kan, kruanh rđău kan ơm Đảng, Ngih dak hŏ tât an kao si, n’hơr nhang nkah gĭt ăp tahen ơm dăng janh khĭt tâm lơh tâm su ta Nghĩa trang Liệt sĩ Quốc gia A1 ta n’gor Điện Biên. 

Tổng Bí thư Nguyễn Phú Trọng hŏ njuăl an kao si gay nkah gĭt ăp tahen ơm dăng janh khĭt. Kao si bah ăp kruanh rđău kan, kruanh rđău kan ơm Đảng, Ngih dak n’hanh mpôl pah kan nchih kloh “Mbro mbrăng nkah gĭt ăp tahen ơm khĭt”, mpơl nuih n’hâm nkah gĭt jru bah neh dak, bah ƀon lan tât ăp nuĭh dăng janh mô n’huch nting mham, roh yot bah săk he nơm an đăp mpăn dah rŏng bah neh dak. Tâm kêng măng 6/5, ta Đền thờ Liệt sĩ ta ntŭk tâm lơh Điện Biên Phủ, Mpôl đại biểu Quân ủy Trung ương, Bộ Quốc phòng tă bah Đại tướng Phan Văn Giang, Bộ trưởng Bộ Quốc phòng hŏ tât n’hơr nhang, nkah gĭt ăp tahen ơm khĭt ta Điện Biên.