N’huch 10% rnoh rnăk ach o aƀaơ hôm geh- ăp năm ba năp, aơ lah rnoh dŭt ŭch geh, geh rnôk lah mô dơi kâp knơm tâm nău ƀư tĭng bôk nău kan n’huch ach o ta ăp ntŭk Tây Bắc ăp năm, yor nău ngăn, rnoh dơi geh kanŭng bâh 3-4%. Kơt nĕ yơn ta nkuăl n’har bri Sông Mã, n’gor Sơn La, tâm 3 năm dăch aơ, rnoh rnăk ach o geh ăp năm lĕ ta rnoh rlău 10%. Du đê̆ xã kơt Chiềng Khoong, Mường Hung...rnoh dơi geh hôm nha âk lơn kơt nĕ. Wa Đặng Văn Cương, groi kruanh UBND xã Chiềng Khoong, nkuăl Sông Mã, n’gor Sơn La an gĭt:

"Tâm ăp năm mhe nơh xã Chiềng Khoong lĕ hučh bâh 10 tât 14% rnoh rnăk ach o, kơt năm 2023 lah 14%, nău nchrăp ƀư tĭng năm 2024 lah 12%.

Tĭng nău mbơh bâh wa Cương, dơi geh nău geh kơt aơ lah bâh gâl ủy, n’gâng kan ăp gâl bâh n’gor tât nkuăl, xã lĕ nsrôih tâm nău rgâl tơm tăm, kon rong tĭng trong hun hao bâh ăp ntil tơm tăm, ndơ rong geh rnoh khlăy, tâm di đah nău dơi, nău geh ta ntŭk. Kơt xã Chiềng Kho ong, dŏng nău ơm geh lah neh hvi, ƀư tĭng nău ntrŭnh bâh n’gor, nkuăl mpeh rgâl tơm tăm rnoh neh tơm mbo, bum mô jêng rgâl tăm tơm sa play, tât aƀaơ, rnoh neh tơm sa play ta xã lĕ bơi tât 1.400ha, tâm nĕ êng tơm nhãn geh rlău 1.100ha.

Ta n’gor Yên Bái, uănh năl bôk nău kan nkô̆ mpŏng ngih dak hun hao wăng sa rêh jêng ta nkual ƀon lan rnoi đê̆ n’hanh gôl yôk lvang năm 2021-2030 lah nău kan khlăy tâm nău ƀư tĭng nkô̆ mpŏng hun hao nâp nâl nkual rnoi đê̆ n’hanh gôl yôk, yor ta ntŭk lĕ n’hao âk trong kan gay ma ƀư tĭng bôk nău kan aơ. Tâm nĕ, rlău ma ăp rơh nti nău kan, Yên Bái lĕ geh uănh khlăy tât nău leo ƀư ăp mpôl hăn nti, tâm mbơh nău tă blău kan ta du đê̆ n’gor tâm dak geh ăp nău kan wăng sa geh săk rnglăy, gay ma rgâl nău mĭn, n’hao nău gĭt vât, nău gĭt kan an ƀon lan rnoi đê̆ tâm nău hun hao wăng sa n’hanh ntrôl dăng nău kan n’huch ach o. Nô Giàng A Tuấn ta xã La Pán Tẩn, nkuăl Mù Cang Chải, Yên Bái nkoch.

" Lôch geh hăn nti rĭ gâp blau kan, geh nău pah kan, pah kan du nar mbra dơi geh bâh 400-500 rbăn prăk.

Ta meng rnoh prăk bôk nău kan nkô̆ mpŏng ngih dak hun hao wăng sa- rêh jêng ta nkual ƀon lan rnoi đê̆ n’hanh gôl yôk lvang năm 2021-2030, bâh bôk năm kan tât aƀaơ, n’gor Yên Bái lĕ rgum bâh âk rnoh kan gay ma geh rlău 12 rbăn rmen prăk hun hao wăng sa- rêh jêng ta nkual ƀon lan rnoi đê̆ n’hanh gôl yôk, rgum ta nău kơl pah kan jan sa, ntuh kơl rdâk njêng ndo dŏng ntung trong, trong hăn, ntĭm nti, dak si, n’huch ach o, rdâk njêng nkual ƀon lan mhe..Yor nĕ, rnoh rnăk ach o ta lam n’gor tâm năm 2023 lĕ hŭch 3,76%, rlău đah nău nchrăp ngluh mbơh lah 3,5%.

70 năm lôch rklaih đăp mpăn, Điện Biên nar aơ lĕ jêng ngoăy tâm âk n’gor geh nău hun hao ngăch tâm rnoh 14 n’gor ta nkual trung du n’hanh gôl yôk mpeh Bắc. Năm 2023, nău ngăch hun hao GDP bâh n’gor geh 7,1%, âk lơn đah nkô̆ mpŏng Nghị quyết Đại hội Đảng bộ n’gor, geh âk đah nău geh nsum ta lam dak, ta rnoh bôk năp bâh 14 n’gor tâm nkual trung du n’hanh gôl yôk mpeh ba lơ. Nău geh bâh ăp nău kan pâl nđaih nchroh geh 1.750 rmen prăk n’hanh lah năm bôk năp pâl nđaih bâh n’gor geh rnoh 1 rkeh năch. Rnoh rnăk ach o aƀaơ kanŭng hôm klâp ma 26%.

Wa Lê Thành Đô, kruanh UBND n’gor Điện Biên an gĭt, dơi geh nău geh aơ lah bâh ta ntŭk lĕ n’hao dăng ăp nău dơi geh, nău ơm geh, ngăn lah ăp rnoh khlăy mpeh di tích ngih dak khlăy ntŭk tâm lơh ta Điện Biên Phủ, n’hao săk rnglăy nău geh n’hanh dŏng prăk ntuh kơl. Ndrel đah nĕ lah ƀư tĭng an tâm ban, săk rnglăy ăp nău kan, trong kan hun hao rnoh nuĭh kan, ngăn lah rnoh nuĭh kan blău kơl an ăp n’gâng kan, trong kan tơm, mbra geh nău dơi kơt công nghiệp, tuch tăm công nghệ mhe, pâl nđaih...Wa Lê Thành Đô, kruanh UBND n’gor Điện Biên lah na nê̆.

"Tâm let năp tay, nuĭh leo kan n’gor ton mbra nsrôih, rgâl mhe mĭn kan, nsrôih răng dăng lơn tay tâm nău leo kan, ntĭm đă leo kan tĭng nău mĭn leo kan, gĭt ngăch, ngăch ngăr tay lơn tâm nău kan, nsrôih rlet rlău nău jêr, ntul rlong, nsrôih rdâk njêng n’hanh hun hao n’gor Điện Biên jêng n’gor hun hao sâm geh tâm nkual.

Nău ƀư tĭng bôk nău kan n’huch ach o ngăch, nâp nâl ta ăp ntŭk Tây Bắc lĕ dơi geh ueh săk rnglăy bâh nău ăp gâl ủy, n’gâng kan ăp ntŭk rdâk njêng bôk nău pah kan tâm di đah nău ngăn, rgum lĕ trong kan chính trị lăp kan n’bhanh nsrôih joi, n’hao ăp nău dơi, nău geh bâh ăp ntŭk...ngăn lah, Nghị quyết mbrô 11 nar 10/2/2022 bâh n’gâng kan chính trị mpeh trong mpŏng hun hao wăng sa- rêh jêng, mât đăp mpăn rnă njrăng ta nkual Trung du n’hanh gôl yôk mpeh Bắc Bộ tât năm 2030, mpŏng uănh tât năm 2045 lĕ dôl geh mbơh tơih mbra kơt lah mâng ntrôl kơl an nkual aơ hun hao ngăch dăng.