Lôch n’gul khay lăp dŏng kan, Ntŭk rgum nkra ƀư siƀŭt gưl xã, phường ta n’gor Gia Lai hŏ năl geh âk nău mpơl uĕh, ân ntŭk hŏ dŏng keh mbrô 100% ƀư siƀŭt. Mplơ̆ lôch jêh ƀư siƀŭt điện tử rlău 70%. Aơ lah nău mpơl an saơ, ndơ dŏng bôk năp dơi đăp mpăn, công chức hŏ ƀư tơm rêng kan, n’hanh trong ntĭt leo ƀư mbrơi lăp tâm ngăn ngăn – rhŏ dŏng nuĭh ƀon lan ngăch lơn, nsĭt geh nău dơi tam lơn, mô an nuĭh ƀon lan lăn nău kan.

Ôi bôk pơh, wa Bùi Đức Thanh – nuĭh ƀon lan thôn Tân Sao, xã Ia Hrung – geh Măt ta ntŭk rgum nkra ƀư siƀŭt xã gay ƀư tay siƀŭt kơp dơn nău dơi dŏng neh. Blah neh bah rnăk păng dơi an sổ đỏ, yơn tă bah tih bah  âk năm bah năp nơh, yơn nău dơi dŏng neh geh nchih săk an bu êng. Lor bôk năp hăn xã mhe lôch rgâl ntŭk ƀư siƀŭt, wa Thanh dơi ntĭm nti ƀư wat jêh siƀŭt dŭt rah rơch:

“Cán bộ, công chức, viên chức xã mhe pah kan dŭt geh nău tam, rhŏ dŏng an nuĭh ƀon lan dŭt rah rơch. Ăp yơ công chức gŭ tâm trôm luh tât nsưng gay mbơh nti an kloh đŏng, hôm ăp nuĭh hăn kơl êng ntĭm nti n’hanh săm nchih hồ sơ an gâp đŏng. Nar aơ, hồ sơ bah gâp hŏ bơi ƀư wat jêh đŏng”.

Lah du xã geh âk nuĭh ƀon lan rnoi mpôl đê̆, yơn Ia Hrung dâk tâl 8/135 xã, phường tâm lam n’gor Gia Lai mpeh rnoh âk hồ sơ dơn ƀư tâm pơh bôk năp n’glăp dŏng. Rlău 200 hồ sơ dơn hŏ ƀư ma keh mbrô da dê. Rnoh âk hồ sơ nôp bah ngai tât 3/4, an saơ nuĭh ƀon lan hŏ rgâl nău way bên n’hanh ƀư êng ta mpông pơk lăp bah ngai. Wa Huỳnh Ngô Tùng Điệp – Groi kruanh UBND xã, nkre ƀư Giám đốc Ntŭk rgum ƀư siƀŭt xã Ia Hrung, an gĭt:

“Ntrŏng năl, n’gâng kan 2 gưl lah rhŏ dŏng an nuĭh ƀon  lan n’hanh ăp mpôl kan, doanh nghiệp ta ntŭk. Jêng nău dja way dơi UBND xã đăm gĭt công chức ân ƀư wat jêh nău kan tâm nar, jêng mô geh mbơi nkai. Ntĭt kơt scan (gay keh mbrô), ri ăp cán bộ mbra dŏng điện thoại gay ƀư, moh ndơ I dŭt ngăch lah he dŏng”.

Ndrel đah xã Ia Hrung, âk ntŭk êng ƀa ƀă kơt phường Pleiku, phường Quy Nhơn, xã Phú Túc… dơn geh âk hồ sơ n’hanh nkra ta rnoh âk đŏng. Phường Thống Nhất ntoh lư rnôk dâk tâl 5 lam n’gor mpeh rnoh âk hồ sơ dơi nkra ƀư, n’hanh mplơ̆ lôch jêh ƀư ta trong điện tử. Wa Lê Thị Ánh Tuyết – Ntŭk  rgum ƀư siƀŭt phường Thống Nhất – an gĭt: rnoh âk dŏng keh mbrô n’hanh mplơ̆ lôch jêh ƀư ma điện tử âk mô dơn rhuăt glêh mông an ƀư an nuĭh ƀon lan, ma hôm kơl rgum prăp nău lư tâm rêng kan nsum bah n’gor đŏng. Nơm geh kơt nê, tâm ăp tơ̆ ƀư bah kơi tay, nuĭh ƀon lan mbra mô nôp tay âk siƀŭt, yor nău lư hŏ ơm geh ta ntŭk keh mbrô.

“Ntŭk rgum kan tâm ban ŭch đah công chức lah ân tĭng ƀư di rêng nôp hồ sơ bôk năp, keh mbrô tĭng gâl hồ sơ, n’hanh mplơ̆ lôch jêh ƀư hồ sơ, ri mơ n’hao âk rnoh ƀư lôch jêh hồ sơ điện tử. Nkre, ntŭk rgum kan nsum đah ăp jrô kan way nkra ƀư hồ sơ gay lăp dŏng rhong aih, năn ngăch droh rklaih ăp jêr jŏt, kŏ kol tâm rnôk nkra ƀư”.

Aƀaơ, xã, phường ta lam  n’gor Gia Lai dôl ƀư 424 siƀŭt- âk bơi rlău pe tơ̆ rđĭl đah ntơm nơh. Tâm let năp tay, n’gor nchrăp mbra jao tay âk nău kan, n’hao nău khlay kan an n’gâng kan tâm dâng. Rnoh âk nău kan nar lơn ma têh n’gluh nău dơi kan âk lơn đah rmôt cán bộ gưl xã, phường: ân rƀah gĭt rêng ƀư, ti lât hăr ngăch ta keh mbrô n’hanh ƀư siƀŭt công nghệ tâm trong nkra ƀư siƀŭt rhŏ dŏng an nuĭh ƀon lan.

Tĭng wa Phạm Anh Tuấn – Groi Bí thư Tỉnh ủy, Kruanh UBND n’gor Gia Lai, n’gor mbra n’hao dăng ntĭm nti cán bộ, ntuh kơl ăp kôp ndơ dŏng, n’hanh lơn lah dŏng âk công nghệ thông tin gay ntop kơl geh nău tam lơn an rmôt công chức, tŏng đah nău dơn kan tâm rơh mhe. Đah rmôt cán bộ tâm dâng, Kruanh UBND n’gor Gia Lai n’gluh nău ŭch geh âk mpeh nuih n’hâm rhŏ dŏng:

“Nuih n’hâm nău kan lah nkra nău kan tĭng nar. Nuih n’hâm nê sŏk nuĭh ƀon  lan n’hanh doanh nghiệp ƀư ntŭk rgum tơm, ƀư nuĭh rhŏ dŏng. Nuĭh ƀon lan n’hanh doanh nghiệp lah năch bah n’gâng kan, ri he ân rhŏ dŏng mhâm ƀư?Aơ lah rơh rgâl bah lam dak, joi ăp trong gay mât dŏng uĕh. Nău mĭn lah mô plơ̆ rŭch, dơn nchră ƀư tơm”.

Trong leo ƀư n’gâng kan gưl xã, phường ta Gia Lai bôk năp an saơ n’gâng kan dôl nar lơn ma dăch  dêh nuĭh ƀon lan lơn n’hanh nkra nău kan ngăch lơn. Yơn lah, gay rƀŏng tât du jâng nsing ƀư siƀŭt têh uĕh mhe, dơh an nuĭh ƀon lan n’hanh doanh nghiệp, hôm ân ƀư wat jêh tay ndơ dŏng kỹ thuật n’hanh n’hao âk lơn đŏng nău dơi, nuih n’hâm rhŏ dŏng bah rmôt cán bộ tâm dâng let năp tay.