Ôi 2/7 ta ntŭk kan hành chính công xã Tân Hà, Lâm Hà, n’gor Lâm Đồng, âk jêt nŭih ƀon lan dôl gŭ kâp ƀư săm ƀŭt, ngăn lah geh tât nau kan neh ntu. Wa Phạm Duy Lâm, tâm thôn Đức Bình tât ta aơ mơ gĭt lah mô hôm nkuăl, nau pă săm ƀŭt kơp dơn dŏng neh mra geh xã pă ân. Dơi cán bộ xã ntĭm an, wa Lâm rhơn ngăn ndrel rnơm mra ơm dơi geh rklaih:

“Nar aơ gâp hăn kan ri saơ âk ngăn cán bộ ƀư nau kan ueh, ntiưm mbơh ân nơm, moh nau nơm ê dơi geh rklaih ri mbu nchăm nar êng. Kơt ri kŏ lah nau ueh ngăn, kŏ dŭt ŭch nau kan hành chính ân geh ngăch gleh lơn”.

Kŏ geh tât nau ƀư săm ƀŭt neh ntu, wa Hoàng Thị Thanh Nhàn, tâm ƀon B’Srê B, xã Tà Đùng, n’gor Lâm Đồng tâm ban nuih n’hâm ngăn ma nau kan rgâl mhe, blau ngăch ndrel nau mleh bah n’gâng kan xã mhe. Wa Nhàn ŭch nŭih ƀon lan tât ƀư săm ƀŭt mra geh rnê nau ƀư nau kan tâm ntŭk kan mro hành chính công:

“Ân geh ntrŭnh ân ơm, gay ƀon lan geh nau dơi mbơh, nkoch nau ueh mô lah nau mô lăng ueh, 5 sao lah nau ƀư ueh, 4 sao lah nau dêh lơn ntoh mhô lah kơt nê. Nau kan chấm điểm ƀư nau kơl an mô nsing tâm nau ŭch săk nơm yơn rnôk cán bộ ƀư ueh ri ân ƀon lan nkoch nau, nau ŭch mra ueh lơn dơm”.

Jêh du pơh geh tâm rnglăp, n’gâng kan tâm gưl xã bah Lâm Đồng hŏ lăp tâm nau kan ngăn, bôk năp kŏ ân saơ nau hôm jêr mpeh ntŭk kan, ndơ dŏng, máy móc ƀư kan, ngăn lah ăp ntŭk kan tơm bah hành chính công. Gay rklaih nau lan aơ, n’gâng kan năl lah mra ƀư lôch nau kan yơn mô blau lĕ mông, hôm đah nŭih ƀon lan ri geh kơl an đŏng. Wa Nguyễn Minh Toàn, Groi Kruanh UBND nkre lah Giám đốc ntŭk kan hành chính công tâm xã Tân Hà Lâm Hà, n’gor Đồng, mbơh, tâm âk nar bôk năp, xã hŏ ndơn rklaih ndrel ntĭm nkra bơi tât 160 hồ sơ. Geh âk nau kan tâm nau dơi bah gưl kan nkuăl ơm. Yơn đah nau nchrăp ueh nâp ndrel nau rgâl mhe nau pah kan tĭng nau kơl, gưl xã mhe ngăn lah tŏng dơi nau kan bah ƀon lan. Wa Nguyễn Minh Toàn, lah rjăp:

“Phung hên uănh năl lor, nau kan gưl xã mhe lah nau kan jâk rgănh, rnôk aơ kơt lah 100% nau kan bah gưl nkuăl ơm jao sĭt ân gưl xã mhe, ri ma hên hŏ nchrăp ueh ngăn tă bah bôk năp, đă ăp cán bộ blau ngăn gay kơl an ƀon lan. Đah nuih n’hâm kan hành chính công kơl an ri hên mra leo tât ân ƀon lan du trong ueh ngăn, ăp nau kan nơih ngăn ngên.”

Năl nau kan hành chính mhe lah nau kơl an ƀon lan, tâm âk xã, phường bah n’gor Lâm Đồng hŏ ndrel dôl geh nau rgâl mhe nau pah kan, ntrơn bah nau kan ndrât ndal jêng nau nchrăp lor. Âk nau ƀư kan geh ntrŭnh nâp tĭng nkuăl neh. Ndrel du nau kan, nŭih ƀon lan, ntŭk kan mra dơi săch ƀư tâm xã, phường aơ mô lah xã, phường êng ri ma n’gâng kan âk xã, phường ân ƀư nâp nau nchrăp joi tât ƀon lan, ntŭk kan ndrel uănh nŭih ƀon lan kơt lah bu năch gay ma rhŏ ân.

Tĭng wa Trần Nam Thuần, Kruanh UBND xã Tà Đùng, n’gor Lâm Đồng, lah nau ƀư nau kan ân ƀon lan mô ueh ri ƀư âk ƀon lan hăn tât xã êng rklaih săm ƀŭt ri trong kan hành chính bah xã mra geh ân lah ê ueh. Ndri ma, n’gâng kan xã dôl ntrŭnh ƀư gay ntrong kan mhe geh dŏng tĭng nau kơl an, hŏ uănh ƀon lan, ntŭk kan kơt lah năch nơm:

‘Nau rgâl ueh ngăn bah n’gâng kan tâm nkuăl bar gưl lah rgum gay kơl an ƀon lan ndrel ntŭk ƀư nau kan ueh lơn. Ntoh tă bah nê ri ntơm bah bôk năp ƀư kan, UBND xã Tà Đùng hŏ rƀŭn nchră, ntrŭnh mbơh đah ăp cán bộ, công chức ân geh rgâl nau mĭn nau kan.. Tâm nau geh mbơh, nkoch trêng gay ƀon lan gĭt kloh ăp nau kan gay ma geh nau rklaih hành chính ueh ri nê kŏ lah nau kan gay ma têk leo ƀon lan ueh lơn tâm nau rklaih kan hành chính”.

Jêh du pơh ƀư nau kan hành chính tĭng n’gâng kan n’gor 2 gưl mhe tâm n’gor Lâm Đồng dôl ân saơ nau rgâl mhe ueh ngăn. Mô mô geh ndrât ndal, pah kan hành chính tĭng nau kan ơm, ma hôm geh nau rgâl tĭng nau kan ueh nâp, nkô̆ nau, nau rƀŏng nau kan bah Trung ương ndŏ luh, nê lah tâm dăch ma ƀon lan ndrel kơl an ƀon lan ân ueh lơn./.