Ta Gia Lai, Dak Lak, Kon Tum, kêng măng ntri geh mih têh bôk năm lam hvi hŏ kơl bri jŭr nđik bah duh phang n’hanh tơm tăm bah kroh khar dak.

Rơh mih bôk năp tâm kêng măng nar 3/5 ta n’gor Kon Tum ƀư bah rvê jâk an ăp nuĭh tơm bri đŏng rnôk  ma hang rhiăng rbăn ha bri ta ăp  nkuâl: Sa Thầy, Ia H’Drai, Đăk Tô, Ngọc Hồi, Kon Rẫy, Đăk Glei, nkual ƀon têh Kon Tum dôl ta rnoh nkah njrăng lor ŭnh sa bri dŭt klach rvê geh ma nău ŭnh sa têh, trĕ rêng ngăch. Wa Nguyễn Văn Huy, Giám đốc Ntŭk nchroh lor trôk nar n’gor Kon Tum an gĭt: Aơ lah rơh mih têh bôk năp. Rnoh âk dak mih ta ăp nkuâl: Đăk Hà, Sa Thầy, Đăk Tô, Kon Plông n’hanh Đăk Glei geh ntơm bah 50-70mm. Ăp nkuâl hôm ƀa ƀă tâm n’gor rnoh dak mih âk ntơm bah 20-40mm. Đah rnoh âk dak mih kơt nê̆, tơm tăm ta n’gor geh tŏng dak  gay hao jêng uĕh jŏ ntơm bah 5-7 nar.

Kêng măng ndrel măng 3/5, ta TP Pleku (Gia Lai) ndrel ăp nkuăl ep nê geh mih, mih tâm du mông. Aơ geh ntoh mhô kơt lah ‘mih mah” yor kơl tŏ ân tơm tăm tâm âk nkuăl bah n’gor. Mih bôk yan tâm Pleku ndrel du đê̆ nkuăl kơt Chư Păh, Ia Grai ndrel Đăk Đoa, Chư Prông, n’gor Gia Lai tâm rlau du mông. Moh têh kơl an bah nau duh, nau krŭl jŏ jong tâm âk nar ma aơ.

Nkre ntop dak tŏ ân ma rhianưg ha tơm cà phê ndrel âk tơm tăm êng dôl kroh, kro n’ha. Tĭng ntŭk nkoch mbơh mih sial Tây Nguyên, tâm ăp nar tât, Gia Lai mra lŏ geh mih tâm âk ntŭk. Nau aơ kơl an bah duh bah n’gor dŭt âk. Yơn lah, yor bri duh nar, kro jŏ jong, ri ma mra geh mih tup pler, sial vănh blông, ƀư khuch tât tơm tăm. Ndri ma kônh wa ân geh nchrăp lor nau rdâng.