Ôi 5/5, ta n’gor Tây Ninh, Thủ tướng Chính phủ Phạm Minh Chính ƀư tơm Rƀŭn nchră Hội đồng điều phối nkual Đông Nam Bộ rơh tal 3 đah bôk nău “Mbơh ƀư dăp rgum nkual Đông Nam Bộ rơh 2021-2030, uănh tât năm 2050”. Ta rƀŭn nchră, ăp đại biểu lĕ tâm nchră n’hanh ndrel uănh tay ăp nău kan, nău kan kơl lor mbơh ƀư dăp rgum, uănh lah jêr jŏt, ntul rlong, wăk kol gay joi trong mkra, mbơh ƀư săk rnglăy dăp rgum nkual Đông Nam Bộ đah nău rƀŏng ndơ̆ wăng sa rêh jêng nkual Đông Nam Bộ hun hao ngăch tay, lĕ rngôch, uĕh n’hanh nâp nâl.

Jêh rnôk djăt ăp nău rgop ntoh ngơi, n’glôn jêh rƀŭn nchră, Thủ tướng Phạm Minh Chính lah rjăp, nău lôch jêh uănh an dăp rgum nkual Đông Nam Bộ tâm rnôk aơ geh nkô̆ nău khlay an di: Na nê̆ trong uănh, nău mĭn, nău rƀŏng ta Nghị quyết hun hao nkual n’hanh dăp rgum gưl ngih dak lăp nkual; na nê̆ nău tâm pă ntŭk ntô hun hao ăp nău dăp rgum gưl ngih dak ta ntŭk: mbơh ƀư ăp nău nchrăp ƀư geh nău boăt nthoi khlay đah ăp n’gor tâm nkual, tâm rgop nkual n’hanh tâm nău kan; Ndrôl ngăch ƀư tĭng ăp nău rgâl têh gay mât nău dơh tâm nkôp mpeh ntŭk wăng sa bah nkual, ntrôl hun hao wăng sa rêh jêng bah nkual n’hanh ăp nkual kiău ma.