Oh Nguyễn Đỗ Quang Minh, kon hŏk jrô 9 ta quận Cẩm Lệ, Đà Nẵng lĕ geh giải nhất Rơh tâm rlong Nchih sam ƀŭt lam ntŭr neh rơh tal 53 năm 2024. Đah bôk nău “Njuăl ăp rơh rgŏ năp gay nkoch mpeh lam ntŭr neh ma băl mpŏng ŭch khân pơng dơi ndơn tay”, rơh tâm rlong lĕ wăch rgum tât râng bah 1,5 rkeh kon hŏk ta ăp nkual neh lam dak râng.

Năm aơ, bôk năp rơh tâm rlong nchih sam ƀŭt lam ntŭr neh UPU hăn ndrel đah nkah gĭt 150 năm ndâk njêng Liên minh Bưu chính lam ntŭr neh. Rơh tâm rlong geh bôk nău: “Tâm trong hăn 150 năm bah năp, lam ntŭr neh lĕ rhŏ an rlău 8 rơh kơn nuĭh ƀon lan lam ntŭr neh. Bah nĕ tât aƀaơ, lam ntŭr neh lĕ geh âk nău rgâl. An nchih njuăl ăp rơh kơn rgŏ năp gay nkoch mpeh lam ntŭr neh ma băl mpŏng ŭch khân pơng dơi ndơn”. Rlet rlău 1,5 rkeh nău nchih, păng sam ƀŭt lah mpeh kon se mô geh nău mât rŏng bah bu klô kon hŏk Nguyễn Đỗ Quang Minh lĕ geh giải Nhất lam dak Rơh tâm rlong nchih sam ƀŭt lam ntŭr neh UPU rơh tal 53 năm 2024