Bah bôk năm tât aƀaơ, Dak Lak djôt dơn 9 nuĭh ji COVID-19, ta 5 nkuăl n’hanh nkual ƀon têh. Lĕ rngôch ăp nuĭh ji gơch da dê. Yơn đah âk nău mbơh mpeh nău plơ̆ tay bah COVID-19 ta du đêt ntŭk, nău kan dak Dak Lak lĕ nchrăp ntĭm rđău ăp ntŭk kan n’hao uănh nđôi rjăp nu nău nuh srê.

Wa Lê Phúc, Groi Giám đốc Ntŭk uănh nđôi kop srê (CDC) Dak Lak an gĭt, uănh nđôi nu nău n’hanh mbơh ƀư ăp trong njrăng n’gang srê tâm di. Jêh nĕ, Ntŭk kan ƀư tiăr nti n’hao blău an rmôt nai dak si mpeh trong kan groi nđôi, saơ ơm nuĭh ntưp COVID-19, uănh nđôi n’hanh mkra ntŭk srê tĭng di trong ƀư.

Mpôl hên geh tâm ôp tâm nchră công an ntĭm mpeh way kan kơt tâm ôp tâm nchră an N’gâng kan gay ntĭm rđău ăp ntŭk kan nchrăp njrăng, ngih dak si, lơn lah mpeh ngih dak si ri n’hao trong nchrăp rgum dŏng n’hanh nchrăp an nău tâm di nu nău COVID-19 lah geh nău hao. Du đêt ntŭk săm lĕ pơk tay du đêt ntŭk nkah nkhah êng, n’hao mât uănh njrăng ntưp rêng tâm ngih dak si. Ăp ntŭk kan nchrăp njrăng ri n’hao groi nđôi nuĭh ji, mkra ăp ntŭk srê lah geh.

Nchrăp lor rdâng đah nu nău srê COVID-19, N’gâng kan dak si n’gor Kon Tum tâm rgop đah ăp ntŭk kan geh tât n’hao ăp nău ƀư nkoch trêng, rgŏ jă nuĭh ƀon lan ƀư tĭng uĕh ăp trong êng nơm njrăng n’gang ji COVID-19. Kơp uănh tay, đăp mpăn nău kơl, ndoh ndơ, hóa chất, dak si, măy mŏk, nuĭh kan tâm di nău ŭch njrăng n’gang srê. Ndrel đah nĕ, nău kan dak si n’gor Kon Tum nchrăp groi nđôi rjăp ta ngih dak si, ntŭk gŭ rêh n’hanh mpông n’har bri quốc tế Bờ Y. Tâm rgop rjăp đah Viện vệ sinh Dịch tễ Tây Nguyên rblang nu nău n’hanh uănh lah gay dăn đă, mbơh ƀư ăp trong njrăng n’gang srê tâm di. Nai dak si Đỗ Ngọc Hòa, Groi Giám đốc N’gâng kan dak si n’gor Kon Tum, an gĭt:

Mpôl hên dăn đă ăp n’gâng kan, ban, ntŭk kan mpeh tâm n’gor, UBND ăp nkuăl, nkual ƀon têh n’hao trong kan njrăng n’gang srê COVID-19 ta ăp ntŭk pâl nđaih, ntŭk răm rlưn. Nkre n’hao trong kan ntrŭt đă nuĭh ƀon kan ƀư tĭng ăp trong njrăng n’gang ji an nơm. Rnôk săk nơm geh ntoh duh, siăk, jêr nsôr an tât dâl ngih dak si ntk êp ngăn gay dơi uănh nđôi n’hanh mkra ngăch.  

Đah nău chuh vaccine COVID-19, tĭng Groi giám đốc N’gâng kan dak si n’gor Kon Tum, aƀaơ rnoh chuh tŏng nglai vaccine bôk năp ta dĭng lĕ rnoh nuĭh bah n’gor geh nklăp 83%. Nai dak si Đỗ Ngọc Hòa ntrŭt đă, lah nuĭh ƀon lan geh chuh vaccine COVID-19, dơi tât ăp ngih dak si dăch ngăn gay dăn nchih săk. Tă bah nĕ, nău kan dak si mbra rgum lĕ. Dăn đă Viện vệ sinh Dịch tế Tây Nguyên an vaccine gay chuh an nuĭh ƀon lan. Bah bôk năm tât 2025 tât aƀaơ, ta lam n’gor Kon Tum mô hŏ djôt dơn nuĭh ntưp COVID-19.

N’gâng kan dak si Lâm Đồng lĕ ntĭm rđău ăp ntŭk but uănh, săm ji ta nkual n’hao trong kan săm, saơ, săm nuĭh ji Covid-19. Kơp uănh n’hanh joi trong nchrăp rgum dŏng, săm nuĭh ji Covid-19 ta ntŭk kan tĭng nchroh mbơh nu nău kop ji, mô an nu nău rdâng ndal. Nchrăp ngih wâl ndoh ndơ, nkual nkhah êng, ndơ dak si, ndoh ndơ dak si gay ƀư rgum dŏng, nkhah êng, nchroh, săm an nuĭh ji, đăp mpăn an nuĭh ji mpeh tâm rmôt geh âk (kơt bu ur geh bŭn, nuĭh ntưp ji ơm, ji mbăn, nuĭh âk năm deh...), nkual hồi sức tích cực, tim mạch, leh nhân tao, rek... Ƀư tĭng rjăp ăp trong mkra njrăng ntưp ji, đăp mpăn trong kan uănh nđôi kaman, lơn lah ji tâm ntưp ta tă bah trong n’hâm, n’hŭch đêt ntưp srê tâm ntŭk but uănh ji, săm ji. N’hao trong kan răk rao kiău ma, răk rao jrô ji, pă an khoa jrô dơh, tâm di nu nău srê n’hanh đăp mpăn ntŭk ntô pŭt nđĭr, kloh uĕh.

N’gâng kan dak si Lâm Đồng ntĭm rđău Ntŭk uănh nđôi kop ji n’gor ƀư bôk năp n’hao uănh nđôi, groi uănh nău ƀư tĭng ăp trong njrăng n’gang srê ta ăp ntŭk kan dak si ta lam n’gor. Kơp uănh, joi trong nchrăp, nchrăp tŏng ăp nuĭh kan, đăp măn ndoh ndơ dak si, ndoh ndơ hóa chất rhŏ an trong kan njrăng srê, gay nchrăp tŏng đah ăp nău bah nuh srê, mô dơi thơ tha tâm nău wât n’hanh nău ƀư, nkre mbơh ƀư uĕh trong kan nău kan way kan.