Dôl mât kon săm ta Ngih dak si Đa khoa nkual Tây Nguyên, nô Y Vy Ktul, ta ƀon Chăm, nkuăl Krông Ana an gĭt, tâm 1 khay nô geh 2 kon an lăp ngih dak si yor ntưp luh mê gŭr. Nău rvê lơ têh 2 mon êng ta jay mô hŏ dơi chuh njrăng n’gang luh mê gŭr.

Gâp mô gĭt m’hâm ƀư, hăn but uănh ri bu geh duh rtoh luh, hăn ta aơ mư gĭt luh mê gŭr. Saơ âk mon bĭch ngih dak si kơt aơ ri mư gĭt tât chuh vaccine luh mê gŭr, mbra an hăn chuh an mon dâl. Aƀaơ hăn ngih dak si ri ta jay roh nar roh kan, đah lah mon ji gâp klach đŏng, rwê ngăn.

Nai dak si Trần Thị Thúy Minh, Kruanh khoa Nhi Tổng hợp, Ngih dak si Đa khoa Nkual Tây Nguyên, an gĭt, aƀaơ ji luh mê gŭr dôl ntưp rêng dŭt ngăch n’hanh âk kon se geh ji mbăn. Tâm rnoh rlău 60 nuĭh ji dôl săm ta nkual nkhah êng, dŭt âk kon se rgâl ji klơm soh, ji dâr măt n’hanh ji ndŭl djroh.

Ji luh mê gŭr lah ngoăy tâm âk nuĭh dŭt mbăn n’hanh ntưp rêng dŭt ngăch, kơp ngăn pơng ntưp dŭt ngăch lơn Covid-19. Yơn lah, geh du nău lap lah dŭt âk nuĭh ji luh mê gŭr lĕ chuh vaccine ri bơi kơt mô geh. Aơ lah nău ji dơi njrăng n’gang đah vaccine. Lah mô dơi njrăng vaccine geh ntưp ri ntưp mbra mbăn n’hanh rnoh ntưp mbăn âk.

Wa Hoàng Hải Phúc, Giám đốc Ntŭk uănh nđôi kop ji n’gor Dak Lak, mbơh, ta năp nu nău srê luh mê gŭr hao, nău kan dak si lĕ mbơh âk trong gay uănh nđôi kop ji. Tâm nĕ n’hao uănh nđôi srê, chuh bôk năp, chuh ntop tay vaccine an kon se mô dơi chuh tŏng ăp, mkra ntŭk ntô gŭ âm ta ăp nkual geh nuĭh ji n’hanh ntrôl dăng nkoch mbơh gay n’hao nău wât bah nuĭh ƀon lan.

Mpôl hên lĕ tâm ôp tâm nchră an n’gâng kan dak si gay mbơh ƀư trong kan njrăng n’gang srê luh mê gŭr ta lam nkual, tâm nĕ geh chuh luh mê gŭr, rubela n’hanh ntĭm rđău ăp gưl nkuăl mpeh trong kan way kan, jêh nĕ ntrôl ngăch trong kan chuh. Lơn lah mpôl hên n’hao trong kan nkoch mbơh, mbơh tât ăp nkual jru ngai, nkual rnoi mpôl đêt rƀŏng tât ndơ̆ kon se tâm nuĭh chuh gay hăn chuh.

Tĭng Ntŭk njrăng n’gang kop ji (N’gâng kan dak si), bah bôk năm tât aƀaơ lam dak djôt dơn rlău 52.000 nuĭh luh mê gŭr, âk ngăn lah ăp n’gor mpeh bah dâng. Jêh nău mbơh ndal bâh Thủ tướng tâm khay 11/2024 mpeh n’hao njrăng n’gang srê luh mê gŭr, âk ntŭk dăn vaccine yơn hôm e đêt. Ntop tay, nău ƀư chuh bơi knŭng geh nău kan dak si lăp ndrel, ăp nău kan êng mô râng âk, mô rgŏ jă nuĭh ƀon lan tât chuh. Tĭng Tiến sỹ Hoàng Minh Đức, Cục trưởng Cục njrăng n’gang ji, aƀaơ hôm du đêt ntŭk geh nău mbrơi trong kan njrăng n’gang srê:

Nău aơ geh tât dŭt âk tât trong kan ƀư chuh vaccine, jêng lah uănh an trong nchrăp, tâm pă tơm prăk, rwăt ndoh ndơ hao... Aƀaơ rnoh nuĭh ntưp hao lah yor ngăch chuh mbrơi lơn ngăch ntưp bah ji luh mê gŭr aơ.

Way lah, jêh chuh 2 pơh mbra dơi chŏl nău kop srê. Tâm nu nău srê luh mê gŭr hôm e jêr jŏt kơt aƀaơ, me bơ̆ an ndơ̆ kon se bah 6 khay tât 10 năm mô hŏ chuh mô lah chuh mô tŏng vaccine hăn chuh. Nău me bơ̆ mô kah gĭt na nê̆ lĕ chuh an kon se tŏng ăp mô lah mô hŏ chuh ri an chuh ntop tay yor vaccine luh mê gŭr mô khuch an săk soan bah kon se.