Tâm ăp năm bah năp, trong kan hun hao nuĭh râng BHYT ta lam n’gor Dak Lak dơi ăp gưl, ăp nău kan geh tât mbơh ƀư tĭng n’hanh lĕ geh du đêt săk rnglăy khlay. Năm 2024, rnoh nuĭh râng BHYT geh 93%. Kơp tât lĕ khay 3/2025, geh 1.690.238 nuĭh râng BHYT, hao 19.163 nuĭh nkôp đah rơh aơ năm 2024. Aƀaơ ta lam n’gor geh 44 ngih dak si kí ton but uănh săm ji BHYT đah ngih pah kan bảo hiểm xã hội n’gor Dak Lak, tâm nĕ geh 25 ngih dak si bah dih, 19 ngih dak si ngih dak. Rnoh ăp ntŭk but uănh sam ji BHYT hao mbrơi tĭng năm.

Khay bah năp, ăp nău uĕh ma BHYT nsĭt tât an nuĭh ji lah nău kloh rah wah. Yơn lah, tâm rnôk ƀư tĭng hôm e nkân du đêt nău mô tâm di, ƀư jêr jŏt an nuĭh râng. Tĭng Luật BHYT, nuĭh ji ta gưl bah dâng ŭch hao gưl bah lơ săm ji (mô dơn nău săm ndal) an dơi ntŭk but uănh săm ji bôk năp an sam ƀŭt ndơ̆ ngih dak si ri mư dơi geh dơn âk tĭng kak BHYT. Nău aơ ƀư jêr jŏt an âk nuĭh ji n’hanh rnăk wâl an roh âk mông nar n’hanh soan gay jêh ăp sam ƀŭt sam tra hành chính.

Yuh Lê Thị Hạnh, ta phường Ea Tam, Nkual ƀon têh Buôn Ma Thuột, geh mê̆ ntưp ji ôm săk, săm ta ngih dak si Ung bướu (nkual ƀon têh Hồ Chí Minh) lĕ âk năm aơ. Yơn yor ntŭk dăn but uănh ji bôk năp ta Ngih dak si đa khoa nkual Tây Nguyên, jêng ăp rơh wa hăn but uănh tay an tât ta aơ gay dăn sam ƀŭt rgâl ngih dak si. Yuh Lê Thị Hạnh an gĭt:

Mê̆ gâp geh ung thư bah âk năm aơ. Tĭng rơh 2-3 khay hăn tât ngih dak si ta nkual ƀon têh Hồ Chí Minh gay uănh nđôi, săm n’hanh an ƀa ƀơ dăn sam ƀŭt ngih dak. Wa gŭ ngai jêng nău hăn nsong dŭt jêr jŏt, hoach mông nar, prăk kaih. Rnôk gĭt tĭng nău ntrŭnh bah Luật BHYT nkra rgâl, ji bah mê gâp dơi hăn sŏng bah lơ ma mô kâp dăn sam ƀŭt trơn ngih dak si, gâp saơ dŭt rhơn. Dŭt răm rnôk Luật BHYT geh âk nău rgâl uĕh an nuĭh ji.

Luật nkra rgâl, ntop tay du đêt nău bah Luật BHYT ntrŭnh: nuĭh ji jêr săm, nuĭh ji jêr bah dơi njŭh sŏng bah lơ ntŭk but uănh săm ji gưl jru hvi. Nău aơ kơl nuĭh ji săm n’hanh rnăk wâl ntêm nkrem mông nar, n’hâm soan ƀư sam ƀŭt trơn ngih dak si, lơn lah dơi đăp mpăn mông nar khlay tâm nău săm ji.

Mpeh nkra rgâl rnoh trok prăk but uănh, săm ji, BHYT mpŏng kâp mbra tâm di âk lơn nău geh bah nuĭh râng, ngăn lah ăp nuĭh ach o, geh prăk đê̆, kơl n’hŭch mbak jâk đah prăk kaih rnôk geh ji. Rnoh trok ƀư tĭng ta ăp ntŭk dăn but uănh săm ji bôk năp ta lam dak mbra hao 100%, bah năp đaơ lah 80%.

Du đêt nău dơi lĕ rngôch nuĭh ji uănh tât aƀaơ lah nău mô tŏng dak si, ndơ dak si ta ăp ntŭk but uănh, săm ji. Nkô̆ nău yor nău ƀư ndranh mâp âk jêr jŏt. N’hêl na nê̆, năm mhe rlău, âk nuĭh râng BHYT yơn rwăt êng dak, ndoh ndơ dak si. Nău aơ ƀư nuĭh râng dŭt ji nuih. Luật nkra rgâl, ntop tay nău ntrŭnh: nău nai dak si nchih dak si geh tâm săk bảo hiểm yơn rnôk nĕ ngih dak si mô geh dak si, nuĭh ji an rwăt dak si bah dih ri bảo hiểm mbra mplơ̆ tay prăk an nuĭh ji rnôk tŏng dak si bah nai dak si n’hanh sam ƀŭt rwăt dak si tâm ban geh tâm sam ƀŭt trok prăk bah BHYT.

Rlău ma nĕ, Luật BHYT nkra rgâl, ntop tay nuĭh râng BHYT nchâp đă lah nuĭh kan dak si thôn ƀon, nuĭh đâng deh thôn ƀon, rmôt râng mât njrăng rnă njrăng đăp mpăn ta ntŭk, nuĭh bah 75 năm deh let lơ dôl geh ntop kơl prăk ăp khay, nuĭh tŏng bah 70 năm tât bah dâng 75 năm tâm rnăk ach o dôl geh ntop kơl prăk ăp khay... Ăp nkra rgâl, ntop tay aơ lah tâm di đah nău ngăn, nkre đăp mpăn dŭt âk nău geh bah nuĭh râng BHYT, nta an nău nsing nơm bah nuĭh ƀon lan tâm ăp nău kơl bah Đảng, Ngih dak.

Wa Trịnh Văn Hùng (69 năm, ta phường Ea Tam, TP BMT) dŭt rhơn rnôk gĭt Luật BHYT mbra uănh tât nău mât njrăng săk soan nuĭh âk năm deh:

Bah năp đaơ, nău gĭt tât nău rhŏ dak si uĕh tam mâp âk jêr jŏt an trong ƀư mpeh nău geh BHYT. Aƀaơđah Luật mhe, mpôl hên geh tay nău dơi mât uănh săk soan uĕh lơn, ngăn lah êp tât BHYT mbra trok ăp nău rhŏ but uănh ta jay. Ăp nuĭh âk năm kơt gâp mbra mô kâp hăn tât ngih dak si ma hôm e dơi uănh nđôi săk soan n’hanh mât uănh dak si.

Ăp nău ơh dŭt n’hâm bah nuĭh ji ta năp nău mbơh ntop tay, nkra rgâl du đêt nău bah Luật BHYT geh tam bah lơ 1/7/2025 an saơ nău ntrŭnh aơ dôl dơi di nuih n’hâm ƀon lan, mpŏng kâp mbra rgop n’hao uĕh nău rêh, ntrôl nău tâm ban tâm nău gĭt tât, mât uănh dak si n’hanh đăp mpăn nău rêh jêng./.

Pơk trong nơih gay ƀon lan geh khám Bảo hiểm y tế

          Nau rgâl Luật bảo hiểm y tế năm 2024 mra geh rklaih ăp nau nkol, nau ê dơi hŏ geh năl, rƀŏng tât nkô̆ nau pơk trong nơih ueh, đăp mpăn nau dơi prêh ngăn ân nŭih râng bảo hiểm y tế...Gay ƀon lan gĭt kloh nau ntrŭnh mhe, nau dơi rnôk khám săm ji ma Bảo hiểm y tế ntơm lơ 1/7/2025, wa Đàm Thị Thanh Quế, Groi Giám ốč Bảo hiểm xã hội n’gor Dak Lak mbơh kloh.

          Luật rgâl nkra, ntop tay du đê̆ điều bah Luật Bảo hiểm y tế rƀŏng tât n’hao nau dơi ân ƀon lan mhâm ƀư, ơi wa?

          Wa Đàm Thị Thanh Quế: Luật Bảo hiểm y tế rgâl nkra, ntop tay năm 2024 geh Quốc hội nchră luh lơ 27/11/2024 ndrel geh nau tam ntơm lơ 1/7/2025 geh nau dơi rgâl gay pơk nau dơi kŏ kơt lah nŭih geh mât kơl tă bahp prăk Bảo hiểm y tế tâm lam dak. Tâm nê, ăp nkô̆ geh nŭih râng uănh ngăn lah nau dơi geh dŏng kŏ kơt lah rnôk hăn khám săm ji Bảo hiểm y tế.

          Luật Bảo hiểm y tế pơk hvi nau geh dơi dŏng dak geh geh prăk Bảo hiểm y tế trok, kơl an nŭih ji geh ndơn nau kan ueh ngăn ma ntơm ê tă geh. Nau khlay lah đah ăp nŭih mâp nau ji jâk khuch dơi geh săm jru lơn tâm ăp ngih dak si mpeh ba lơ ma mô kâp geh nau ƀư tĭng nau ntrŭnh êng mpeh nau ntrơn hăn tă bah ntŭk êng kơt ntơm nơh. Nau aơ hŏ kơl an rhuăt gleh lơn mông ndơn geh săm ndrel n’hao nau dơi mât chăm dak si. Êng nê, Luật mhe kŏ ntop tay du đê̆ nŭih geh dơi sa 100% rnoh dŏng rnôk khám săm ji tâm ăp ngih dak si đăng kí khám săm ji bôk năp tâm lam dak. Tal bar lah trok 100% prăk săm tâm ăp ngih dak si ký hợp đồng khám săm ji ntơm tâm dâng tâm lam dak. Geh dơi dŏng lĕ rnoh dơi geh kơl an rnôk khám săm ji ma Bảo hiểm y tế tâm ăp ngih dak si ntơm tâm dâng ndrel gưl prêh jri lơn lah geh năl ntơm lơ 1/1/2025 ma ntŭk săm aơ lah ngih dak si nkuăl.

          Đah ăp nŭih rnoi mpô; đê̆, rnăk ach o dôl rêh tâm ăp ntŭk ƀư văng sa rêh jêng mâp nau jể mô lah jêr ngăn, nŭih ƀon lan tâm xã gôl dak geh trok lĕ prăk khám săm ji tâm ăp ngih dak si săm prêh lơn.

          Êng đah ăp nŭih geh nau ji jâk, jêr săm, ân geh săm, rek ri tơm prăk bah Bảo hiểm y tế mra trok lĕ rnoh prăk geh dŏng tĭng nau ntrŭnh rnôk geh săm tâm ngih dak si ba lơ. Pơk trong ân nŭih geh săm tâm ăp ngih dak si prêh lơn ndrel mô geh rdâng mpeh tơm prăk.

          Đah Luật mhe, du nau ueh ngăn nê lah nau dơi geh săm lĕ bah nau ji geh dơi ndrel ƀleng măt kŏ geh ntrơn rgâl. Bah năp nơh, tơm prăk Bảo hiểm y tế knŭng kơl an kon se tâm dâng 6 năm, tât nrôk aơ rgâl pơk hvi tay nŭih geh kơl an nau aơ ân âk nŭih geh dŏng dak si.

          Luật rgâl nkra, ntop tay du đê̆ điều bah Luật Bảo hiểm y tế geh âk nau rgâl, tâm nê geh nkô̆ nau dŏng ƀư rnôk khám săm ji Bảo hiểm y tế geh ƀư nơih, ƀon lan knŭng ndŏ thẻ Bảo hiểm y tế. Dăn wa mbơh kloh lơn mpeh nau aơ?

          Wa Đàm Thị Thanh Quế: Gay rgop nau ƀư ueh nau kan dŏng nau geh mbơh mpeh rnoh nŭih, moh răk ndrel năl điện tử gay kơl an nau kan ntrơn rgâl mrô neh dak. Gay n’hai nau ƀư ân nơih ăp nau kan, n’huch rnoh hồ sơ săm ƀŭt, n’huch mông ƀư ndrel prăk khám săm ji. Ƀư nau ntrŭnh nsum bah ntŭk kan Bảo hiểm xã hội Việt Nam, Bảo hiểm y tế n’gor Dak Lak mra nsrŭng in thẻ Bảo giểm y tế ma n’ha rđaih ntơm lơ 1/6/2025. Ăp nŭih rvăt dŏng Bảo hiểm y tế ntôk hăn khám mra geh dĭng rup Bảo hiểm y tế tâm nau dŏng VssID (Bảo hiểm xã hội mrô) mô lah nau dŏng VneID ndŏ rnôk khám săm ji. Knŭng ƀư in thẻ Bảo hiểm y tế n’ha rđaih đah nŭih mô dơi dŏng VssID mô lah VneID mô lah mô geh căn cước công dân geh chip.

          Đah nŭih mâp nau jêr, nkol tâm rnôk rnglăp dŏng VssID (Bảo hiểm xã hội mrô) đă mâp ma ntŭk kan bảo hiểm êp nê ngăn gay geh kơl an ƀư.

          Rơh tât, gay pơk trong nơih kŏ kơt lah đăp mpăn nau dơi ân nŭih râng Bảo hiểm y tế, ntŭk kan bảo hiểm xã hội moh geh nau ƀư, ơi wa?

          Wa Đàm Thị Thanh Quế: Rơh rlau aơ, nau kan hun hao Bảo hiểm y tế tâm n’gor Dak Lak mro ndưn geh nau kơl an, rđau, đă bah Bảo hiểm xã hội Việt Nam, bah n’gor uỷ, HĐND, UBND n’gor Dak Lak ndrel nau tâm rgop ueh, rjăp bah ăp ntŭk kan ndrel ntŭk nkoch mbơh nau, báo chí. Tâm rơh tât, gay pơk trong nơih ân ƀon lan râng, ntŭk kan Bảo hiểm xã hội n’gor Dak Lak kŏ nchrăp luh du đê̆ nau kan nê lah: ân geh nau lăp kan bah ăp gưl kan uỷ Đảng ndrel n’gâng kan nkual, aơ lah nau tơm dơi geh tât nau săk tam ntrŭnh ƀư nau ntrŭnh Bảo hiểm xã hội, Bảo hiểm y tế tâm n’gor. Tĭng nê, ntŭk kan Bảo hiểm xã hội n’gor Dak Lak mra ƀư âk rmôt hăn pah kan ma ăp nkuăl gay nchră nau sŏk, n’huch rnon ndrel nau kan hun hao nŭih dŏng kŏ geh uănh lah hôm jêr, nkol tâm rnôk ƀư gay tă bah nê leo luh nau kan năn, nsôih gay ƀư jêh nau kan năm 2025. Jêh nê lah ntrŭt dăng nau kan nkoch mbơh tât nau geh dơi bah Bảo hiểm xã hội, Bảo hiểm y tế uănh khlay nau nkoch trêng kơt lah ƀư ăp rơh rƀŭn nkoch mbơh nau, tâm nchră, uănh khlay nau nkoch trêng bah ăp ntŭk nkoch mbơh nau tă bah bảo hiểm n’gor, mạng xã hội kơt Fanpage, Facebok, Zalo mô lah bah mrô điện đoại mbơh nau  bah Bảo hiểm xã hội n’gor.

          Ơ, lah ueh wa mpeh ăp nau mhe geh mbơh aơ!