Ta Nkual ƀon têh Buôn Ma Thuột, N’gâng kan tuch tăm mât rong hun hao thôn ƀon tâm rgop đah UBND n’gor Dak Lak ƀư rƀŭn nchră hun hao nău kan ndơ sầu riêng nâp nâl, tâm rnôk tăm sầu riêng mâp jêr jŏt yor mô tâm di uĕh kah bah dak nglăp rwăt. Aƀaơ Trung Quốc lĕ an bơi 1.400 mrô nkual tăm n’hanh 188 mrô ntŭk tâl dŭng an Việt Nam.

N’gul bôk năm aơ, tăch n’gluh mâp jêr jŏt yor ntôn hôm e rmeh chất Vàng Ô n’hanh Cadimi, âk nău rgop an lah an ndâk njêng jrô kan uănh năl sầu riêng ta ăp nkual têh. Wa Trần Minh Châu, ntoh măt Công ty TNHH Uănh năl uĕh kah Vinacontrol, an gĭt công ty lĕ ƀư trong nchrăp an nău aơ. Ta rƀŭn nchră, âk nău rgop an lah an uănh nđôi rjăp nău dŏng phâm poh, dak si mât njrăng tơm tăm n’hanh ơm ndâk ƀư jrô kan uănh năl ta ăp nkual têh. Ăp đại biểu dăn đă ƀư jêh nău ntrŭnh mpeh mrô nkual tăm, ntŭk tâl dŭng; ntrôl dăng mĭn njêng, jao an công nghệ, rgâl; mrô tâm nkra njêng, nkret njêng, mât prăp gay n’hao uĕh kah, khlay n’hanh dơi tâm rlong bah ndơ.