Tĭng n’gâng kan ntĭm nti năm 2024-2025, lam nkual Tây Nguyên geh rlău 4.500 ntŭk ntĭm nti bah gưl mầm non tât cao đẳng, đại học, đah bơi 1,5 rkeh kon hŏk bah gưl mầm non tât THPT. Trong rgum ăp ngih samƀŭt phổ thông tâm pă rĭng lam, tâm di nău ŭch nti bah kon hok n’hanh mbơh ntĭm nti; trong ngih samƀŭt phổ thông dân tộc nội trú dơi dăp rgum lor, tâm di nău ŭch ntĭm nti nuĭh kan rnoi mpôl đêt. Ăp ntŭk an bah 20% tơm prăk gay ntuh kơl an ntĭm nti, nkre rgŏ jă nuĭh kan tâm rgop gay hun hao ntĭm nti.

Yơn lah, n’gâng kan ntĭm nti Tây Nguyên hôm âk nău n’hŭch, đah uĕh nâp mô hŏ tâm di mpŏng ŭch; rnoh ngih samƀŭt geh tâm di tŏng ăp ta lĕ rngôch ăp gưl nti hôm e đêt, rnoh ndoh ndơ tâm di nău ŭch hôm đêt ta ăp gưl nti mô âk, rnoh ntĭm nti nai geh tâm di tŏng ăp let ta ăp gưl nti đêt lơn rĭng lam dak. Rnoh nai hôm e mô tŏng tĭng rnoh; ăp nău kơl, trong ƀư ntop kơl mô hŏ ngăn ngên mât săk rnglăy, khuch têh tât nău n’hao uĕh ntĭm nti bah nkual.

Ta năp nău ngăn aơ, N’gâng kan ntĭm nti lĕ ndâk ƀư nău rgop an tâm nchră “n’hao uĕh ntĭm nti an ƀon lan rnoi đêt Tây Nguyên” đah nău rƀŏng tât năm 2030, ntĭm nti lam nkual dơi rgâl mhe tĭng trong tâm di, rgâl mhe; đăp mpăn ăp nuĭh ƀon lan dơi gĭt tât ntĭm nti geh uĕh nâp, tâm di nău đă hun hao bah nkual tâm lvang mhe.

Ta rgum nchră, ăp đại biểu lĕ rgum tâm rgâl, tâm nchră mpeh nu nău ngăn ta ntŭk nơm; nkre, n’gluh an ăp trong mkra gay rgop an dự thảo bôk nău rgop an tâm nchră bah N’gâng kan ntĭm nti. Nĕ lah n’hao trong kan ntĭm rđău, ƀĭt joet bah ăp gưl tâm nău ntrôl hun hao ntĭm nti; rgâl mhe trong ntĭm nti; mbơh ƀư săk rnglăy ntĭm nău ngơi rnoi mpôl đêt; ăp nău kơl wăch rgum nai pah kan ta ăp nkual jru ngai... N’gluh an nău mpeh nău ngăn ntuh kơl nâp nâl ngih jrô nti, wa Lê Bá Cường, Groi giám đốc N’gâng kan ntĭm nti n’gor Dak Lak an lah: nău dăp rgum trong ngih jrô nti lah nău dŭt n’hâm an nâp nâl ngih jrô nti.

Mpeh ndoh ndơ ri an geh nău rgop an tâm nchră êng an nkual Tây nguyên mô lah tâm ăp bôk nău kan rƀŏng tĭng lam dak ri an mĭn rnoh ndâk âk gưl rhiăng gay ntuh kơl an ngih wâl nâp nâl jrô nti. Tâm nĕ geh nkoch kloh nău ntop kơl an nai geh jay gŭ, ntŭk gŭ nsum lah ngoăy tâm âk trong mkra gay mkra nău nai nkual jru ngai ntlơi sĭt yor mô geh jay gŭ, mô geh jay trọ, ri khân pơng mô janh tĭng ngih samƀŭt.

Hôm wa Lưu Tiến Quang, Groi Giám đốc n’gâng kan ntĭm nti n’gor Dak Lak an gĭt, Dak Lak geh 1,9 rkeh nuĭh ƀon lan đah 49 rnoi nuĭh gŭ rêh, ƀon lan rnoi mpôl đêt geh rlău 30%. Gay n’hao uĕh ntĭm nti, an n’hao trong ngih jrô nội trú, bán trú; geh nău kơl an gay wăch rgum nai; pơk hvi nuĭh nti dơi geh nău kơl; tâm rgop đah ăp rmôt kan, chính trị-rêh jêng, lơn lah, mât ƀư tơm bah ƀon lan, kruanh ƀon, nuĭh dơi nsing nơm ntŭk gŭ rêh gay n’hao rnoh kon hŏk hăn nti...

Ăp đại biểu nkoch nău rgop mpeh nău mĭn kloh lĕ nuĭh n’hanh lĕ ntŭk ntô kơt dŏng bôk nău rgop an tâm nchră, n’gluh an tâm rnôk nău nglăp nsum dôl jut n’har neh tơm n’hanh geh nău ntĭt mpơl êng nkual dôl geh. Wa Vũ Thị Ánh, Groi Vụ trưởng Vụ Ntĭm nti phổ thông an gĭt, ăp nău rgop ta rgum nchră lah nkô̆ nău khlay gay mpôl nchih rgum ntop tay, lôch jêh ăp nkô̆ nău bah bôk nău rgop an tâm nchră, lor rnôk ƀư tĭng ăp njoat bah năp tay gay mbơh tât Chính phủ uănh mĭn tay, mbơh an.

Nău rgop bah ăp đồng chí bah ăp N’gâng kan ntĭm nti mbơh an nu nău dŭt lah khlay gay an Mpôl nchih rgum mpôl hên dơi djăt, ntop tay tâm ăp nău uănh lah nău ngăn kơt dăn đă ăp trong mkra tâm năm tât gay dơi geh nău rƀŏng, lơn lah ăp nău ma Đảng n’hanh Ngih dak dôl dŭt uănh tât ntĭm nti nkual Tây Nguyên kơt jut nuĭh mô gĭt samƀŭt, ntĭm nti n’hanh rnoh rgŏ jă kon se tât ngih samƀŭt, ngăn lah ăp kon se rnoi mpôl đêt ta ăp nkual jru ngai; rgop n’hao uĕh nuĭh kan an nkual Tây Nguyên.

Rgum nchră “Nău ngăn ntĭm nti nkual Tây Nguyên n’hanh rgop an dự thảo Bôk nău rgop an tâm nchră n’hao uĕh ntĭm, nti an ƀon lan rnoi mpôl đêt Tây Nguyên” ƀư ta Dak Lak lĕ saơ nău uănh jru bah N’gâng kan ntĭm nti, ndrel ăp ntŭk tâm nău ntơm dôh rklaih jêr jŏt, wăk kol hôm e nkân tâm ntil nău ntĭm nti ta nkual neh hôm e âk ntŭl rlong aơ. Ăp nău rgop dŭt n’hâm, êp ngăn ngên bah ăp đại biểu lah nkô̆ nău rgum khlay gay jêh nău rgop an tâm nchră, rƀŏng tât nău ŭch tât năm 2030, ntĭm nti Tây Nguyên ngăn ngên rgâl mhe, tâm di nău ŭch hun  hao nâp nâl, tâm ban n’hanh lĕ rngôch an ăp nuĭh ƀon lan-lơn lah oh kon ƀon lan rnoi mpôl đêt.