Gay ma rlong ƀư kan, tâm âk khay ba năp, Rmôt kan du mpông geh 5 nuĭh kan ndrel yor Kruanh UBND phường  Nghĩa Phú, nkuăl ƀon têh Gia Nghĩa, n’gor Đăk Nông mât kan,  an geh nsrôih lĕ nơm gay ma uănh năl săm ƀŭt rgo hôm nha mô hŏ geh ƀư  lôch, pă ntil, kơp uănh drăp ndơ...nchrăp ueh pă jao ê lor nglăp nsum. Yuh Trần Thị Thu Hiền, du hê nuĭh kan tâm rmôt an gĭt, bol ma geh âk năm tă pah kan ta ntŭk kan công sở ta nkuăl ƀon têh Hồ Chí Minh n’hanh Đăk Nông, yuh hôm nha wĭ wĕ ta năp nău rgâl têh aơ. yơn lah, lôch rơh nti nău kan ta lơ 13-14/5 mhe nơh, yuh lĕ geh gĭt lĕ ăp rmôt nău kan geh pă jao ta ntŭk kan mhe.

 “Nău kan ta ntŭk kan ơm mô lah mhe lôch nglăp nsum lĕ geh tâm ban da dê, yor lah ăp nău dơn kan,  mplŏ nău geh kan n’hanh ƀư tĭng bôk nău kan 06 mpeh rgâl mhe rnoh mbrô. Tât tay nău kan mbra geh hao, yơn lah yor ƀư bên n’hanh tâm di geh nău đăp mpăn ta phường ơm hôm jêng lah gâp mĭn mbra dơi mât leo nău kan.Bol ma nău kan mbra lah gheh âk lơn, mô lah trong kan mhe, yơn lah nsrôih du đê̆ rĭ mbra dơi ƀư lôch ueh ăp nău kan geh pă jao”.

Tĭng bôk nău kan pă dăp leo ntrong kan hành chính n’gor Đăk Nông, ăp phường Nghĩa Phú, Nghĩa Tân n’hanh xã Đăk Rmoăn mbra geh nglăp nsum jêng phường Nam Gia Nghĩa, đah ntŭk kan an ta mbrô 2 Võ Văn Tần, phường Nghĩa Tân, lah ntŭk kan mhe bâh UBND nkuăl ƀon têh Gia Nghĩa ntơm nơh lĕ rlu kan. Wa Vũ Minh Nghĩa, Bí thư Đảng ủy phường Nghĩa Phú an gĭt, nău kan n’gâng kan phường Nam Gia Nghĩa geh ƀư bâh rnoh nuĭh cán bộ bâh n’gor ủy, nkuăl ƀon têh n’hanh 3 phường xã tơm.

“Nău leo kan rĭ tĭng trong kan mhe, leo rlong ƀư ăp đồng chí Bí thư Đảng ủy, Kruanh UBND phường, Kruanh HĐND n’hanh kruanh Ủy ban MTTQ Việt Nam phường mbra tât râng tĭng nău ƀư kan na nê. Rlău ma nĕ, ăp ntŭk kan n’gâng kan lĕ geh ăp ntŭk tât mbơh kơl nău kan tĭng trong kan nău dơi kan geh pă jao. Ntrong leo kan lah geh mâp âk nău kŏ văk, ê hŏ ueh di  mbra geh rhoăt luh gay ma gĭt der”.

Wa Hoàng Công Hội- Bí thư Đảng ủy phường Nghĩa Tân, nkuăl ƀon têh Gia Nghĩa an gĭt, ta ntŭk lĕ geh uănh nđôi lĕ rngôch bâh ntŭk kan ba dâng tât nuĭh kan gay ma ƀư tĭng pă jao, pă dăp nău kan lôch nglăp nsum. Geh klâp ma 200 cán bộ, công chức pah kan ta ntŭk kan phường Nam Gia Nghĩa lôch nglăp nsum. Nău rlong ƀư phường mhe ƀư tĭng di nău ntĭm đă bâh n’gâng kan Nội vụ n’hanh Chính phủ.

“Tĭng đề án bâh nkuăl ƀon têh rdâk njêng tâm ban kơt ăp nău ntrŭnh, thông tư ntĭm leo bâh n’gâng kan Bộ nội vụ n’hanh Nghị định bâh Chính phủ, đah phường Nam Gia Nghĩa mbra geh njêng ăp ntŭk kan geh: Văn phòng; phòng kinh tế -ndơ dŏng nkuăl ƀon têh, Phòng văn hóa xã hội, n’hanh ntŭk kan hành chính nsum. ăp ntŭk kan nău kan geh dơn mât kơl nău kan nsum rĭ mbra geh njêng ta ăp phường gay ma kơl an ƀon lan na nê̆ săk rnglăy, tâm di đah nău ŭch ngăn ta ntuk”.

Tĭng đề án bâh trung ương, bâh lơ 1/7 tay, n’gor Đăk Nông mbra geh n’huch bâh 71 jur hôm 28 ntŭk kan hành chính gâl xã, phường n’hanh nglăp nsum ta n’gor Lâm Đồng mhe. Ăp nău nsrôih ta ăp xã n’hanh ăp cán bộ dôl ntơm ƀư tĭng ntŭk kan hành chính doh ueh, săk rnglăy, kan tam. Nău leo kan rlong n’hanh ƀư lôch trong kan, mbra kơl an n’gâng kan xã mhe ngăn ngên ngăch doh kan rnôk ntơm lăp ta nău pah kan ngăn ngên.

Tuấn Long