Rơh rƀŭn kŏ rgop nau mpeh 8 nkô̆. Nau ngăn lah nau nchrăp mbơh nau tă geh mêt uănh bah nkô̆ “Ƀư nau ntrŭnh, pháp luật mpeh hun hao ndrel dŏng nŭih kan tŏng dơi nau ŭch hun hao văng sa, rêh jêng, ngăn lah nŭih ƀư kan nâp prêh”, rgâl Bôk nau kan ndâk pháp luật năm 2025; rgop nau mpeh nau rgum lôch rơh rƀŭn tal 9 ndrel rgop nau bôk năp mpeh nau nchrăp rơh rƀŭn tal 10.

 Uỷ ban Rnâng kan kŏ uănh, nchră luh 3 nau nchrăp geh nau dơi, lah: Nau ntrŭnh rgâl nkra, ntop tay du đê̆ điều bah bah nau ƀư kan bah Uỷ ban Rnâng kan Quốc hội; Nau ntrŭnh mpeh nau dŏng ƀư nau kan bảo hiểm xã hội, bảo hiểm roh kan pah lvang năm 2025-2027; nau ntrŭnh mpeh nau kan, nau dơi ndrel nau pă ntop tơm prăk vay ƀa ƀơ bah tơm prăk Ngih dak năm 2026.

 Kruanh Quốc hội Trần Thanh Mẫn mbơh, rơh rƀŭn geh jêh rnôk rƀŭn tal 9 bah Quốc hội geh nau dơi ueh. Rơh rƀŭn nchră nau ntrŭnh rgâl nkra, ntop tay du đê̆ điều bah Hiến pháp năm 2013, nchră luh 34 luật, 34 nau ntrŭnh. Rnôk aơ ăp ntoh măt Quốc hội dôl ƀư nau tâm mâp ma cử tri bah 34 n’gor, nkuăl ƀon têh tâm lam dak. Ngăn lah, jêh rơh rƀŭn tal 9, Quốc hội, Chính phủ, ăp n’gâng kan ndrel ăp n’gor ntrŭnh ƀư nau kan, ngăn lah ƀư nau kan n’gâng kan 2 gưl.

 Tĭng Kruanh Quốc hội, nau rgop bôk năp tât nau nchrăp mbơh nau tă geh mêt uănh, tĭng nkô̆ ‘Ƀư nau ntrŭnh, pháp luật mpeh hun hao ndrel dŏng nŭih ƀư kan tĭng dơi nau ŭch hun hao văng sa, rêh jêng, ngăn lah nŭih kan nâp prêh” dŭt ngăn, nkre geh nau khlay tâm rnôk neh dak nơm lăp tâm rnôk hun hao mhe, ân geh nŭih ƀư kan prêh ƀư nau dơi ân hun hao ngăch ndrel nâp nâl.

Rơh tât, N’gâng kan chính trị mra ntrŭnh ƀư ăp nau ntrŭnh rgum ân hun hao ntĭm nti ndrel nau kan mât chăm n’hâm soan ƀon lan. Mhe rlau, Quốc hội nchră 3 nau ntrŭnh khlay tât nau kan khoa học, rgâl blau mhe, ntrơn rgâl mrô; Nau ntrŭnh rgâl mhe nau kan ndâk ndrel ƀư pháp luật tŏng nau đă hun hao neh dak tâm rơh mhe; Nau ntrŭnh mpeh hun hao văng sa êng.

Êp nê, tâm rơh rƀŭn tal 9, Quốc hội mra nchră Luật nai ntĭm nti, nau ntrŭnh mpeh nau mô sŏk prăk, kơl an prăk ân kon se nti mầm non, kon se nti Phổ thông. Chính phủ ntrŭnh nau mpeh mât chăm ân ăp kon se tâm gôl yôk.

Mpeh nau uănh nau ntrơn rgâl Bôk nau kan ndâk pháp luật năm 2025, Kruanh Quốc hội Trần Thanh Mẫn lah rjăp, năm 2025, bôk nau kan ndâk njêng pháp luật ân tŏng dơi nau ŭch ntrŭt dăng doh rklaih nau jêr, nkol tâm nau kan văng sa, rêh jêng, neh dak, rnă njrăng kŏ kơt lah ndâk nau kan n’gâng kan 2 gưl.

 ‘Jêh ăp rơh rƀŭn, nơm mra ntơm tâm nchră, rgum ăp nau kan, tă bah nê, rgum luh nau tă dơi gay ma ƀư ueh, rgâl mhe gay leo nsĭt nau săk tam, nau mhe tâm nau kan bah Quốc hội. Rơh rƀŭn tal 10 lah rơh dăch dŭt bah nau kan, ƀư jêh ăp nau nchrăp luh, nkre njêng nau dơi ân nau kan năm kan mhe. Đah nau kan khlay kơt nê, nau nchrăp ân geh ueh, nâp, rgâl mhe rjăp n’ăp ma nkô̆, nau kan ndrel nau nâp gay lah rjăp nau dơi leo trong, ndâk ƀư bah Quốc hội ndrel Chính phủ”.

Kruanh Quốc hội ân lah, rơh tât lah ăp khay dăch dŭt ngăn bah năm kan Quốc hội gưl XV đah nau kan têh, âk nau kan chính trị khlay, đah nau ŭch prêh lơn ndrel ƀư kan nâp lơn. Ndri ma, ăp ntŭk kan bah Quốc hội ân tâm rgop rjăp đah Chính phủ, ăp ntŭk kan geh tât, rgum ƀư jêh nau kan geh jao tâm bôk nau kan, nau nchrăp luh bah năm 2025 ndrel lôch gưl XV. Nkre, mât nâp nau rđay đă bah ăp gưl geh nau dơi, nchrăp ƀư nâp ndrel ntrŭnh nkre ăp nau kan mhe, nkre ndal nchrăp ăp nkô̆ nau kan bah Uỷ ban rnâng kan Quốc hội đăp mpăn nau ngăch, nâp, der nsŭn nau kan tâm êp ma rơh rƀŭn./.