Kêng măng nđaơ, ta Ngih Trung ương Đảng, Tổng bí thư Tô Lâm lĕ wơt wa Obuchi Yuko, Hạ nghị sĩ Quốc hội n’hanh mpôl đại biểu Liên minh nghị sĩ hữu nghị Nhật-Việt di wa Obuchi n’hanh mpôl đại biểu Liên minh nghị sĩ hữu nghị Nhật-Việt hăn khâl Việt Nam. Ta nar wơt, Tổng Bí thư Tô Lâm mĭn lah rơh hăn khâl geh nkô̆ nău khlay, rgop uĕh tâm nău ƀư jru lơn tâm boh kan ndrel têh lĕ rngôch Việt Nam-Nhật Bản.

Tổng Bí thư Tô Lâm mĭn lah Việt Nam dŭt n’hâm ƀư tĭng trong kan rgâl mhe tâm nău rgâl nkra hành chính, mbơh ƀư ăp nău kan, trong mkra tâm “Kôp 4 n’gâng tơm” đah nău nsrôih hun hao khoa học, công nghệ, rgâl mhe, đêt dơh ngăch n’gâng kan bah lĕ trong chính trị, dôh rklaih ăp ntŭk kol gay pơk luh ntŭk ntô hun hao mhe, uănh nkual wăng sa ƀư êng lah n’hâm soan khlay bah jâng wăng sa, dŭt n’hâm rgum lăp lam ntŭr neh jru hvi, săk rnglăy, nta nơih ngăn an nuĭh ƀon lan n’hanh doanh nghiệp tâm dak n’hanh bah dih dak. Tổng Bí thư đă 2 ding n’hao tâm rgop, tâm pă nău mĭn êng nơm, ntop kơl ndrel ăp rƀŭn nchră lam ntŭr neh n’hanh nkual, ngăn lah tâm rnôk nu nău lam ntŭr neh nkual geh âk nu nău mhe.