Pah kan đah ntŭk kan ntĭm n’hanh nti, wa Tạ Anh Tuấn, kruanh UBND n’gor Đăk Lăk, dăn đă n’gâng kan leo kan rdâk njêng Bôk nău kan hun hao ntĭm nti n’gor Đăk Lăk lvang năm 2025-2030, tâm neư uanh năl tay lĕ rngôch ăp nău kan dôl geh dŏng ƀư, nklơi jăng ăp trong kan, nău kan mpŏng tât nău geh ngăn ngên. Tâm rnôk ăp nău dơi mpeh kon hoc nti blău, mbơh nti mpeh ntĭm nti an geh âk nău dơi geh, rĭ nău ueh ntĭm nti hôm nha lah nău an geh rgâl mhe bâh n’gâng kan ntĭm nti ta Đăk Lăk. Râng geh thi tốt nghiệp THPT ăp năm ba năp bâh n’gor mbra ta rmôt dŭt ta lam dak, 2 rơh săch nti jrô 10 mhe nơh, điểm geh 3 môn thi lăp jrô 10 ta nkul mpeh nhâp nar, geh dŭt đê̆. Ndrel đah nĕ lah nău mô tŏng nai nti, mô tŏng ndơ nti, âk ngih nti mô ueh nâp mô tâm ban đah ăp ntŭk nơih dơh n’hanh nkual jêr jŏt. Wa Tuấn an lah, ăp nău aơ an geh ơm doh rklaih gay ma n’hao nău ueh ntĭm nti nsum bâh n’gor.