Wa Rơ Chăm H’Phít, Bí thư Đảng ủy xă Ia Khươl, an gĭt, nuĭh ƀon lan ta ntŭk mpŏng Gia Lai mbra rgâl hun hao têh dăng. Aƀaơ n’gor lĕ geh dak lêng jêng nău geh bah cao nguyên hvi têh mbra dơi mât uĕh tay:

Jêh nglăp nsum, nău tâm rgop đah cao nguyên yôk đah rnoh neh lŏ mir dŭt têh mbra tâm rgop đah dak lêng ri n’gor Gia Lai mbra geh nău tâm rgop rjăp mpeh logistic tâm nkra njêng lŏ mir, tăch n’gluh ndơ lŏ mir, wăng sa dak lêng.... Gâp an lah tâm rgop aơ pơk trong an du Gia Lai du nău hun hao mhe.

Wa Nguyễn Danh, du hê nuĭh tĭng rlău 40 năm đah Gia Lai, uănh saơ nău tâm rgum n sum Gia Lai n’hanh Bình Định mbra ngăch dôh rklaih ăp nking n’gang an nău hun hao. Ăp ndoh ndơ rhŏ hun hao ŭnh nar nkra njêng, công nghiệp nkret njêng ta cao nguyên Gia Lai, mbra hăn sŏng bah ndrâm dak lêng bah n’gor rlău trong têh hăn ngăch mbra dơi ndâk ƀư. Rnoh ndơ âk ndrel ndeh dơh trong hăn. Wa Nguyễn Danh lah:

Rnôk rgum nsum Gia Lai mbra pă an ndoh ndơ, ŭnh nar nkret njêng n’hanh dơi tăch n’gluh tă bah ndrâm dak lêng, rlău 2 tach ndeh păr mô lah rlău mpông n’har bri đah ăp dak Đông Dương geh trong nău khlay êng mpeh nkra njêng, mpeh nkret gâm, mpeh tăch n’gluh n’hanh nkre hun hao trong logistic bah n’gor mhe tă bah ăp trong Bắc-Nam tă bah trong quốc lộ 1 n’hanh trong Đông-Tây rlău quốc lộ 19.

Tĭng rnoh kơp, n’gor Gia Lai mhe geh rnoh neh rlău 21.000km2, rnoh nuĭh bơi 3,6 rkeh nuĭh-geh tâm rmôt n’gor geh rnoh neh n’hanh rnoh nuĭh âk ngăn lam dak. Kruanh UBND n’gor, wa Phạm Anh Tuấn lah rlăp, gay ơm mât uĕh ăp nău dơh, nău geh bri-dak lêng, n’gor mbra rgum tâm 3 nău mhe têh; rgâl bah nău mĭn mât uănh an rhŏ nău kan, bah hành chính rgâl an nâp nâl, n’hanh sŏk nuĭh ƀon lan-doanh nghiệp ƀư ta nklang tâm ăp trong mkra.

N’gor Gia Lai mhe lah boăt nthoi mhe bah 2 nkual neh geh way ơm, âk cách mạng têh khlay, nău uĕh văn hóa âk. Lơn lah nuih n’hâm tâm rnglăp n’hanh mpŏng ŭch hao têh dăng ndrel soan ndrel nuih n’hâm ƀư dŭt n’hâm tâm ban săk rnglăy yor du nău rêh rgŏ năp hun hao tâm di.

Wa Hồ Quốc Dũng-Bí thư n’gor ủy n’gor Gia Lai-an gĭt, n’gor nsrôih ƀư tĭng nău rƀŏng hao jêng 8% tâm năm aơ, geh jâng nsan an lvang 2026-2031 geh hao jêng 2 mrô:

Jêh nglăp nsum n’gor ri têh hvi jâng wăng sa bah Gia Lai mhe nklăp rlău 250 rbăn rmen, geh n’ăp du nkual cao nguyên têh hvi, 134km kơh dak lêng, du nkual dâng rđŭng têh hvi, 2 tach ndeh păr, ndrâm dak lêng, geh trong ndeh treng, trong ndeh... Rgum tŏng ăp nău geh ơm, neh ntu, mih n’hach uĕh, nău hôm ƀa ƀă lah m’hâm ƀư nsrôih mât uĕh ăp nău geh âk gay hun hao n’gor Gia Lai jêng du n’gâng hao jêng bah nkual.

Bah âk nkô̆ nău n’gâng tơm kơt rnoh pơk hvi trong, kơt tach ndeh păr, ndrâm dak lêng, trong ndeh treng, trong quốc lộ..., tât nău âk ntil bah ntŭk ntô neh ntu-wăng sa: dak lêng, dâng rđŭng, yôk prêh, n’gor Gia Lai mhe dơi mpŏng mbra rgop ƀư tơm leo hao jêng nkual miền Trung-Tây Nguyên tâm lvang bah năp tay./.