Xã Lạc Dương, n’gor Lâm Đồng geh njêng bâh nău kan nglăp nsum 3 xã: Đạ Sar, Đạ Nhim n’hanh Đạ Chais bâh nkuăl Lạc Dương ơm. Aơ lah xã geh rnoh neh ơm dŭt têh ngăn ta n’g or, bơi tât 830km vuông, rnoh nuĭh bơi tât 15 rbăn nuĭh, đah lĕ rngôch nuĭh K’Ho. Xã geh 30 Chi bộ đah rlău 500 đảng viên. Wa Ya Tiong, Bí thư xã Lạc Dương, an gĭt, tâm rnôk nchrăp n’hanh ndŏ n’gâng kan ta ntŭk lăp pah kan bâh lơ 1/7, xã lĕ geh mât uănh, uănh khlăy tât nău n’hao nău way ơm tâm rnglăp tâm cán bộ n’hanh ƀon lan.

“Năp lor lah tâm ntŭk kan an geh dơn ngoăy, tâm rnglăp nău nĕ mơ lah khlăy ngăn gay ma leo kan nău kan ueh. Bâh ntơm lơ 2/7 lah lĕ geh njêng ăp ntŭk kan geh tât nău dơi bâh ăp gâl xã. Ƀon lan ta aơ mpôl rnoi đê̆ geh tât 86%, rnoh neh hvi, ƀon lan gŭ ngai ngai hên leo kan bâh ƀon lan ta aơ tâm rnglăp, dơn ngoăy”.

Lôch nglăp nsum 3 n’gor Lâm Đồng, Đăk Nông n’hanh Bình Thuận, n’gor Lâm Đồng mhe geh tŏng ăp nău gay ma âk trong kan gay ma dơi hun hao mhe, leo bôk năp kơt pâl nđaih bri- dak lêng Đà Lạt-Phan Thiết, rnoh bauxit dŭt têh ta lam dak đah 5,4 rmen tấn quặng bâh ơm, ăp ntu pring đah rnoh âk, kơh dak lêng jong 129km.

Gay ma ngăch mât uănh, leo kan, dŏng âk nău dơi geh, nău dơi ta du ntŭk têh hvi bâh bri tât dak lêng, n’gor Lâm Đồng uănh năl nău kan n’gâng kan 2 gâl an geh pah kan ueh aih, săk rnglăy, kan tam. Wa Nguyên Hồng Hải, groi kruanh UBND n’gor Lâm Đồng an gĭt, nău aơ mbra dơi geh ƀư rnôk geh nău tâm rnglăp na nê̆.

 “Mpôl he dôl ndơ mbơh nău kan jêng mô dơi geh gĭt lĕ ăp nău ƀư. Nău kan bôk năp lah tâm rnglăp gay ma ndrel ƀư lôch nău kan bâh n’gor mhe. Lah ma he mô tâm rnglăp rĭ mô dơi geh ƀư. He an geh nsum ti ƀư ăp nău kan an geh rgum ƀưu dâl.

Tâm nău jer bâh du n’gor mhe geh njêng bâh nău nglăp nsum 3 n’gor năm aơ n’gor Lâm Đồng mhe nsrôih an geh nău hun hao wăng sa têh lơn 8% n’hanh hao 2 rnoh mbrô let lơ tâm let năp tay. Gay ma dơi geh nău aơ cán bộ n’hanh ƀon lan Lâm Đồng an n’hao prêh chông cờ tâm rnglăp kơt nău Wa Hồ nti gay ma njêng soan dăng lĕ rngôch, rdâk njêng n’gor Lâm Đồng hun hao ngăch n’hanh nâp nâl.

Nguyễn Khoa Điềm/VOV- Tây Nguyên