Kêng măng 22/06, ta Nhih pah kan Chính phủ, Thủ tướng Phạm Minh Chính, Kruanh Ban rđău đă ăp bôk nău  kan gưl neh dak; Kruanh Hội đồng tâm rlong nkhôm rnê trung ương ƀư tơm Tâm nchră lam dak n’glôch jêh bôk nău kan gưl neh dak rdâk njêng ƀon lan mhe, Bôk nău kan gưl neh dak n’hŭch ach o jŏ jong n’hanh trong leo ƀư "Lam dak nsum ti rdâk njêng ƀon lan mhe”, trong leo ƀư “Yor an nuĭh ach o- Mô an geh du hê nuĭh ndul êng bah kơi" lvang năm 2021-2025.

 Lah ta rnôk Tâm nchră, Thủ tướng an lah: Gưl nkuâl hŏ ƀư lôch jêh nău dơn kan, Bôk nău kan gưl neh dak rdâk njêng ƀon lan mhe hŏ kơp dơn rlău 50% nkuâl di rnoh rdâk njêng ƀon lan mhe. Jêng ân mpư n’hao nău khlay kan bah gưl nkuâl tâm hun hao tuch tăm, thôn ƀon n’hanh nuĭh kan lŏ mir, di nău khlay kan n’hanh nău dơn kan lịch sử. Thủ tướng nkah lvang năm 2026-2035, rgop tay ăp bôk nău kan gưl neh dak dôl an ƀư jêng 1 bôk nău kan gay mô geh tâm chong cheng mpeh nău dơi kan, nău dơn kan. Thủ tướng lah rjăp bôk nău kan gưl neh dak rdâk njêng ƀon lan mhe ân dơi n’hao têh mpeh rnoh di, ntŭk nsing, rdâk njêng ƀon lan mhe ntop n’hao tay, n’glĕ dơi an têh hvi lơn, nuĭh dơi kơl âk lơn, hun hao ăp ndơ geh ƀư OCOP.