Tâm trôm rơh khâl na nê̆ Pháp, lơ 10/6, Thủ tướng Phạm Minh Chính n’hanh I ur lĕ mâp ntoh măt nsum mpôl nuĭh Việt Nam ndrel cán bộ ăp ngih pah kan ntoh măt ta Pháp. Nsum mpôl nuĭh Việt ta Pháp aƀaơ geh rlău 300.000 nuĭh, tâm nĕ nklăp 50.000 nuĭh gĭt blău n’hanh hang rbăn doanh nhân. Thủ tướng an gĭt, rơh khâl Pháp rơh aơ mĭn lah dŭt n’hâm bah Việt Nam ndơ̆ tâm boh kan ndrel lĕ rngôch Việt Nam-Pháp nar lơ hăn jru, ngăn ngên.

Tâm ăp rơh pah kan, Thủ tướng lĕ đă ăp nuĭh kruanh Pháp nta nơih an nsum mpôl nuĭh Việt Nam ta Pháp rgum lăp uĕh tâm nău rêh jêng ta ntŭk gŭ, mât nău uĕh văn hóa n’hanh nău ngơi Việt, rgop dŭt n’hâm an wăng sa-rêh jêng bah Pháp. Thủ tướng đă mpeh Pháp nta nơih tay an nuĭh Việt rgum lăp uĕh, mât nău ngơi Việt n’hanh nău uĕh văn hóa, ƀư tơm boăt nthoi dăch dêh đah 2 dak. Thủ tướng kuăl jă nsum mpôl mât uĕh nuih n’hâm tâm rnglăp, ntô̆ n’hao rnoi nuĭh, rgop uĕh an nău hun hao bah Việt Nam n’hanh trêng ntĭm rŏng dak an rơh druh ndăm.