
Ma nău lĕ nuih n’hâm n’hanh gân djăng đah nău kan, âk nhà báo druh mom ta Dak Lak dôl nđơn trêng tay nău mpơl gĭt lor văn hóa nsrôih uĕh, nkah tay nău rŏng n’hanh nău n’hao êng săk mpeh văn hóa rnoi nuĭh, nkre nkoch mbơh ăp rup uĕh văn hóa way ơm bah nsum mpôl ăp rnoi mpôl đê̆ Tây Nguyên tât đah lam nuĭh.
Geh nkhôm 2 giải Báo chí n’gor Dak Lak n’hanh du giải Báo chí Tây Nguyên tâm khay 6, bah năp nê lah rkŭm 4 giải mpeh rdâk njêng Đảng n’hanh kơt nti n’hanh ƀư tĭng nău Wa dơi nkhôm rnê bôk năm, yuh H Kim Phúc Êban, bu ur phóng viên mom nuĭh Rđe, dôl pah kan ta Báo Đắk Lắk nchih nkah tay tâm ƀon báo đah ăp nău nchih mpeh văn hóa.

H Kim Phúc nkoch, mpeh đề tài văn hóa, rêh jêng kon nuĭh n’hanh nău way ơm bah kônh wa nkual rnoi mpôl đê̆ way lăp măt yuh ntơm bah ăp nar bôk ăp lăp kan. Rlău 12 năm ƀư báo, dơh uĕh mpeh nău ngơi kơl yuh tât n’hanh ôp joi ăp đề tài dơh ngăch lơn, ntơm bah nê geh ăp nău nchih njônh uănh mhe, kơl kônh wa nkoch gĭt bah “nuih n’hâm” tâm mât ndray văn hóa.
“Lah du hê phóng viên nuĭh rnoi mpôl đê̆ ri gâp way hăn tât ăp ƀon lan đŏng. Wât mpeh nău way ơm văn hóa bah khân păng ri gâp dơh tât lơn, dơh nkoch bri lơn, bah nê kônh wa dah rŏng nkoch nău ŭch rŏng mpŏng geh tâm ban kơt lah văn hóa bah khân păng đŏng. Lôch ăp nău nchih ri gâp ŭch rŏng n’hao nău gĭt êng lơn đŏng an nuĭh ƀon lan tâm nău mât ndray văn hóa, săk tơm bah rnoi nuĭh he, ntĭt leo lor tâm trong wăng sa, pah kan uĕh tâm nău rêh, nsum suan rdâk njêng nău rêh ƀon lan nar lơn ma hun hao lơn”.
Ndrel đah H Kim Phúc, ta Báo Đắk Lắk, yuh Nguyễn Hương Quỳnh lah du mâng nchih way bên đah ăp đề tài mpeh văn hóa. Rlău 8 năm aơ, yuh hŏ râng biên tập, ƀư âk nău nchih văn hóa ăp rnoi mpôl đê̆ n’hanh nsĭt geh âk ndơ nkhôm rnê báo chí. Aƀaơ, yuh hôm mât uănh nchih 2 nkô̆ way nkoch mpeh văn hóa lah Âk ntil tâm nău rêh n’hanh Nău rêh nuĭh Tây Nguyên, pơk ăp khay du mbrô. Nău dơh yor mbra dơi rgum nchih êng n’hanh nkoch êng nău he nchih bah năp dĭng rhôp rup, ăp nău nchih bah yuh way geh nău rgâl mhe. Tĭng yuh Quỳnh, tă bah âk ntil săk ntơr tâm văn hóa bah 49 rnoi nuĭh gŭ rêh ta Dak Lak hŏ njêng suan rhôp dăng, lơn ma hăn jru joi gĭt yuh lơn ma saơ ăp đề tài uĕh.
“Rnôk jŭr tâm dâng pah kan, lăp tâm nău rêh ngăn bah kônh wa ăp rnoi mpôl đê̆, gâp geh dŭt âk tă rlău uĕh mƀak, n’hanh lah uĕh hôch săk he nơm kơt lah hŏ sơch di nău kan. Rnôk ƀư mpeh ăp đề tài kơt nê hŏ ntrŭt ntrôl he âk lơn n’hanh saơ văn hóa dŭt uĕh, ân nkơnh n’hơ tay, ân nkoch trêng gay an ăp rơh kơn hăn bah năp mbra trêng nti tay an rơh kơn bah kơi mât ndray n’hanh ntik n’hao. Hôm văn hóa lah hôm neh dak, hôm tu tơm”.

Nklân năl bah ngăn geh ăp trong ma yuh Nguyễn Thảo, phóng viên Báo Tiền phong, Văn phòng ntơh măt ta Tây Nguyên, pêt mât ăp nău nđơr tâm ăp nău nchih mpeh văn hóa. Yuh nkoch, bơi 10 năm ƀư nău kan, yuh mô dơi kơp lĕ ăp trong hăn rvăch rve ta ndeh honda, jong rhiăng cây số sĭt tât ăp ƀon lan nkual jru nkual ngai bah n’gor Dak Lak n’hanh Dak Nông gay mâp nuĭh ƀon lan, bu ranh ơm gĭt blău. Ăp trong hăn kơl yuh pah tât nău nđơr bah năp bri dak, neh ntu n’hanh lĕ nău nđơr bah ăp kon nuĭh rsip rsap ngăn. Khân păng dôl mpêt ndrôm, mât kân tay ăp rnoh khlay way ơm ta nău rêh mhe aƀaơ, gay njêng du nsum mpôl ƀon lan đah âk rup uĕh văn hóa săk ntơr êng.
“Moh ntil mpeh nău nchih ri he ân jŭr tât tâm dâng da dê ri mơ geh ndơ ma ƀư mpeh n’hâm n’hôr bah nău rêh. Yơn đah văn hóa – kuăl lah mha êng, dơn geh ăp nuĭh gĭt rŏng ngăn n’hanh gân djăng mơ dơi joi gĭt, nklân djăt dơi ma nău nkoch, ma măt uănh mô lah bah tâm trôm nuih n’hâm bah tĭng nuĭh, ăp nău nkoch. Ân dêh rŏng ngăn ri rnôk nê mơ năl dơi ăp nuĭh ma khân păng dôl mât ndray n’hanh ntik n’hao văn hóa ntơm bah nê mơ nđơn trêng tay tât ăp nuĭh êng”.

Mô dơn nđơn trêng tay nău lư, ăp phóng viên nchih mpeh văn hóa hôm rgop rdâk njêng n’hanh hun hao văn hóa tâm nsum mpôl lam ƀon lan. Ta Dak Lak, ntŭk rgum săk tơm bah 49 rnoi nuĭh, ăp nuĭh tơm nchih druh mom dôl hĭng ntơr tay ăp dak ndrang n’grêh rêh an păng rup văn hóa Tây Nguyên. Ma nău gân djăng n’hanh han săk nău kan bah he, ăp bu ur phóng viên dôl rêng lam ăp rnoh khlay nsrôih uĕh, rgop rdâk tay nău gĭt mât ndray văn hóa rnoi nuĭh, mât ndray ăp rnoh khlay nâp dăng bah nsum mpôl lam ƀon lan.
Viết bình luận