Ta Ngih ntop kơl Nău rêh jêng kon nuĭh rgum lĕ n’gor Gia Lai, yan rlu nti năm aơ dŭt răm n’hanh uĕh rnôk lĕ 37 oh dơi nti nău ngơi rplay samƀŭt Anh an dơm yor ăp yuh nô kơl kan dŭt n’hâm ntĭm nti. Ăp rơh dŭt pơh, ngih rƀŭn bah ngih pah kan lŏ n’gŭr răm nău gơm ngơi tâm lôr n’hanh ăp nău ngơi Anh rơch gơch. Oh Nguyễn Trọng Phú, ngoăy tâm âk kon se dôl dơi ntĭm ta ngih kan, nkoch nău răm bah nơm rnôk dơi nti nău ngơi Anh ndrel ăp yuh nô kơl kan tâm rơh yan rlu nti aơ.

Băng: Oh dơi ăp yuh nô ntĭm ăp rplay samƀŭt Anh đah tĭng bôk nău, oh saơ dŭt ŭch nti nău ngơi Anh n’hanh mbra nsrôih nti nsơm uĕh ngăn.

Yan rlu nti 2025 ta Gia Lai, ăp nău kan dơi kan dŭt uănh khlay tât nău ntrŭt nsôr n’ăp drăp ndơ n’hanh nuih n’hâm đah ăp kon hŏk ach o, kon hŏk rnoi mpôl đêt, Oh Rơ Châm Uyên, kon hŏk jrô 7, Ngih samƀŭt THCS xă Ia Phí, nkuăl Chư Păh an gĭt:

Băng: Rnăk wâl oh geh nău rêh jêr jŏt, mpeh tâm rnăk êp ach o. Oh dơi ăp kônh yơ ntĭm rđău an prăk kơl hăn nti oh saơ dŭt răm. Năm nti mhe rlău oh geh nti blău, oh mbra nsrôih nti ren n’hanh gĭt blău lơn tay.

N’gor Gia Lai aƀaơ geh bơi 5.000 kon se geh nău rêh jêr jŏt n’hanh rlău 95.000 kon se geh tŭp tâm nău rêh tâm ban. Đah nău ndrel ty, ndrel nuih n’hâm bah n’gâng kan n’hanh kon nuĭh, kon se tâm n’gor dôl dơi

nta an gay hun hao lĕ rngôch. Wa Ksor Hiền-Groi Giám đốc N’gâng kan dak si, Giám đốc Prăk nkrem mât njrăng kon se n’gor Gia Lai an gĭt:

Băng: Tâm Khay pah kan yor kon se, N’gâng kan dak si rgŏ jă tay ăp nuĭh gay mbơh ƀư ăp nău kan ntop kơl kon se geh nău rêh jŏt ta lam n’gor kơt an ndơ, prăk kơl hăn nti, ndeh wah jâng, ndơ dŏng nti, mât uănh kon se geh nău rêh jêr jŏt ta nkual jru ngai. Ƀư tĭng đăp mpăn ngăch nău kơl ntop kơl nău rêh jêng an kon se geh nău rêh dŭt jêr jŏt. Tâm rgop đah ăp n’gâng kan, nău kan, ntŭk kan, ƀon lan n’hao mbơh ƀư ăp trong njrăng n’gang rmoh rmanh, sôt găt n’hanh lơh mbram kon se gay đăp mpăn an kon se geh du yan rlu nti răm m’ak, đăp mpăn n’hanh uĕh lăng.

Ta Jay văn hóa Thanh thiếu nhi n’gor Dak lak, ăp nău ƀư yan rlu nti năm 2025 lĕ ƀư n’gŭr răm. Râng bôk nău kan, ăp oh dơi ƀư ngăn nău pâl rlưn way ơm, ntŭk mĭn ƀư mhe, ndrơng ndơ kon se n’hanh sŏk du đêt ndơ an. Ndrel đah nĕ, bôk nău ƀư “Wa Hồ đah kon se, kon se đah Wa Hồ”, tiăr nti nău blău njrăng n’gang rmok dak an kon se... Dơi jay văn hóa ƀư, wăch rgum hang rhiăng oh râng. Yuh Nguyễn Thị Thúy Hiền, Groi giám đốc ƀĭt uănh Ngih văn hóa Thanh thiếu nhi n’gor Dak Lak an gĭt, tâm rơh aơ mbra geh nklăp 30 ntil trong ƀư jrô nti ƀư bah ôi ơm tât 9 mông măng.

Băng: Năm aơ rlău ma nău mât uĕh ăp nău nti ƀa ƀơ kơt bah năp đah ntil nău văn hóa, nghệ thuật, thể dục thể thao, nău blău rêh ri mpôl hên hôm uănh khlay nău ƀư an dơm, ăp ntŭk ƀư mhe, ƀư ngăn âk mpeh nău mĭn. Lơn lah năm aơ mpôl hên uănh khlay tât njrăng n’gang rmok

dak n’hanh rmoh rmanh sôt găt an ăp oh, ƀư tĭng ăp kan n’hanh bôk nău ƀư mĭn joi văn hóa Tây Nguyên.

Ta rgum ntŭk pơk phim n’hanh pơk rup Dak lak, Rơh phim yan rlu nti rhŏ an kon se lĕ ntơm ƀư. Bah aƀaơ tât lơ 24/8, ta ôi nar prao n’hanh nar pơh ăp pơh, ăp oh kon se tât ntŭk pơk phim mbra dơi uănh dơm ăp phim geh nău ntĭm nti âk, tâm di đah ăp năm deh. Wa Nguyễn Thị Hồng Thanh, Groi giám đốc Ntŭk pơk phim an gĭt: Đah 3 rơh pơk phim ăp nar, ngăch rhŏ nklăp 400 mon, mbra geh bơi 20 ntil phim rup Việt Nam geh nkô̆ nău uĕh mpeh nău lịch sử, nău rŏng rnăk wâl, đăp mpăn ntung trong, njrăng dể tâm lơh ta ngih samƀŭt, njrăng n’gang rmok dak ta kon se.

Băng: Rơh phi yan rlu nti lah ngoăy tâm ăp nău ƀư ăp năm bah Ntŭk pơk phim n’hanh pơk rup Dak Lak gay geh ntŭk pâl uĕh, ntop kơl an ăp mon kon se jêh du năm nti. Tă bah rơh phim đah ăp tác phẩm điện ảnh dơi săch tâm di đah năm deh, rlău ma nău ŭch pâl rlưn, mpôl hên knơm ăp oh mbra geh tay nău nti nsơm ăp nău uĕh, rêh uĕh lơn n’hanh gĭt ryơk tâm ăp nău khlay bah nău rêh.

Rlău ma nkual nklang ƀon têh, rơh phim yan rlu nti hôm dơi ƀư hăn ăp ntŭk tât ăp nkual jru ngai bah n’gor Dak Lak, ndrel đah nĕ ăp ăp nău ƀư ntĭm re dak an dơn, ntŭk răk uănh samƀŭt ăp ntŭk, jâng gung pâl rlưn an kon se... nta uĕh an ăp oh dơi răm m’ak tâm rơh rlu nti.