Năm nti 2024-2025, rơh bôk năp kon hŏk jrô 12 lôch uĕh Bôk nău ntĭm nti phổ thông 2018, đah ăp nău rgâl di bôk năp, bah bôk nău nchrŏng nkô̆ nău an bôk nău hun hao nău rêh n’hanh nău dơi nuĭh nti. Tâm năm aơ đŏng, rơh tâm rlong tốt nghiệp THPT geh nău rgâl mpeh nău ƀư đề tâm rlong n’hanh trong ƀư tâm rlong, lơn lah ăp môn tâm rlong trắc nghiệm dơi ntop tay du đêt nău ôp mhe, gay n’hao nău rgâl uĕh n’hanh uănh lah di nău dơi bah kon hŏk. Oh Lê Minh Hưng, kon hŏk jrô 12, Ngih sam ƀŭt THPT Buôn Ma Thuột, n’gor Dak Lak nkoch:

Đề tâm rlong năm aơ rgâl âk, lơn lah mô nsum. Oh saơ nơm an nti n’hanh nti tay âk nău ôp jru lơn, nkre tŏng ăp nău wât tơm, nkre an geh nău blău mĭn, blău joi. Bôl nai ntop kơl dŭt âk yơn oh hôm e saơ jêr yor aơ lah rơh tâm rlong khlay ntrŭnh an nău rgŏ năp.

Aƀaơ hin, ăp ngih sam ƀŭt ta lam n’gor Dak Lak dôl ntơm lăp lvang nti tay âk an kon hŏk jrô 12. Nai rgum trong nău nti ơm, nti nău blău ƀư bài ngăch n’hanh di tĭng nău đă mhe bah đề tâm rlong, kơl kon hŏn nchrăp lăp rơh tâm rlong.

Wa Nguyễn Thị Xuân Hương, Hiệu trưởng Ngih sam ƀŭt THPT Lê Quý Đôn, nkual ƀon têh Buôn Ma Thuột an gĭt: Ngih samƀŭt lĕ ƀư âk rơh tâm rlong uănh lah, pă tĭng kon hŏk gay ƀư nti tay tĭng rmôt, rgop n’hŭch jêr n’hanh n’hao săk rnglăy nti tay. Mhe aơ, kon hŏk lĕ râng rơh tâm rlong tốt nghiệp THPT năm 2025 yor N’gâng kan ntĭm nti ƀư. Aơ lah nău gay ăp oh ƀư bên đah đề tâm rlong n’hanh mông nar jrô tâm rlong tĭng bôk nău mhe.

Rơh tâm rlong gay uănh lah săk rnglăy nti nsơm kơt săk rnglăy nti ta ngih sam ƀŭt gay ngih samƀŭt geh âk nău rblang nkra tay ntĭm rđău mpeh ntĭm nti tâm ngih samƀŭt gay tâm di lơn, dơi geh nău rƀŏng bah bôk năm nti nĕ lah du năm nti rƀŏng tât kon hŏk dơi tốt nghiệp lĕ rngôch, bah nĕ ăp oh geh njoat jâng lăp ngih samƀŭt têh ma ăp oh mpŏng ŭch.

Ta ăp ngih samƀŭt ta nkual jru ngai, nkual n’har bri-ntŭk âk kon hŏk rnoi mpôl đêt, trong kan nti tay dơi ƀư ngăch gay tâm di đah nău ngăn. Wa Nguyễn Phan Anh, Groi Hiệu trưởng Ngih samƀŭt THPT Lắk, nkuăl Lắk, n’gor Dak Lak an gĭt, ta lvang ndăn, rlău ma nâp nâl tay nău nti, ăp nai uănh khlay nta an nuih n’hâm an ăp oh. Tĭng nĕ, ngih samƀŭt lĕ kơp uănh tâm pă tĭng kon hŏk gay ndâk ƀư trong nchrăp nti tay, kơl ăp oh nsing nơm lăp rơh tâm rlong.

Jêh rnôk tâm rlong bôk năp ngih samƀŭt nti tay an ăp oh ntop nklăp 4 pơh. Nchrăp bah lơ 20/5 tât lơ 20/6 rgum lĕ rngôch ăp oh geh nău nti mô hŏ blău đăp mpăm đah jrô 12 ri pă an ăp oh ntop tay 4 pơh ta ngih samƀŭt.

Rơh tâm rlong tốt nghiệp THPT năm 2025, Groi Giám đốc N’gâng kan ntĭm n’hanh nti n’gor Dak Lak an gĭt, N’gâng kan lĕ ntĭm rđău ăp n’gâng kan uănh lah uĕh blău rơh tâm rlong năm bah năp, ndâk ƀư nkô̆ nău, samƀŭt n’hanh tĭng nchrăp nti tay tâm di đah na nê̆ bah tĭng ntŭk kan. Ngăn lah rnôk Thông tư 29 bah N’gâng kan ntĭm nti geh tam, ăp ngih samƀŭt lĕ geh nău rgâl nti tay tĭng trong n’hŭch âk, hao săk rnglăy. Wa Đỗ Tường Hiệp mĭn lah, nău kan ntĭm nti lĕ đă ăp ngih samƀŭt nchih săk ăp kon hŏk geh nău rêh jêr jŏt gay ntop kơl ngăch, mô an kon hŏk an ntlơi tâm rlong.

Ntĭm rđău ăp ngih samƀŭt ndâk ƀư ntop tay trong nchrăp nuĭh kon hŏk. Rnôk Thông tư 29 luh, an geh trong nchrăp gay rgŏ jă du rmôt nai ntĭm an kon hŏk mô di ƀư ntĭm tay nti tay. Lơn lah đah ăp oh ta nkual jru ngai, nkual rnoi mpôl đêt ri geh ntop kơl mô an ăp nuih n’hâm, đah nău nti ma hôm n’ăp đah drăp ndơ gay ăp oh dơi nti n’hanh tâm rlong dơi uĕh lơn.

Nchrăp na nê̆, uănh lah di nău dơi kon hŏk n’hanh ndâk ƀư trong nchrăp nti tay tâm di, nău kan ntĭm nti n’gor Dak Lak dôl nsrôih đăp mpăn rơh tâm rlong tốt nghiệp THPT 2025 mô knŭng geh săk rnglăy đah nău way kan, ma hôm ntop nsing nơm an ăp oh lăp rơh tâm rlong lor âk ntŭl rlong yơn dơi hăn let bah năp.