Tĭng rnoh kơp bah Ntŭk uănh nđôi kop ji nkual ƀon têh Hồ Chí Minh, knŭng tâm du pơh, nkual ƀon têh lĕ kơp dơn rlău 300 nuĭh ntưp ji duh rtoh luh mham rih. Tĭng lĕ nuĭh ntưp duh rtoh luh mham rih bah bôk năm 2025 tât aƀaơ bơi 6000 nuĭh.

Ndrel tâm du pơh, nkual ƀon têh kơp dơn rlău 300 nuĭh ntưp ji jâng ty mbung. Dĭng lĕ nuĭh ji jâng ty mbung kơp bah bôk năm 2025 tât aƀaơ bơi 2.300 nuĭh.

Kơp dơn bah nuĭh nchih nău ta Ngih dak si Nhi đồng 2 nkual ƀon têh Hồ Chí Minh, âk kon se ji bah ăp n’gor tât săm yor me bơ̆ rvê gưl bah dâng mô dơi nchroh di na nê̆ nău ji.

Rnôk luh mê gŭr mô hŏ bah, jâng ty mbung n’hanh rtoh luh mham rih dôl lăp tâm yan mbra dŭt jêr njrăng lah mô dơi uănh nđôi.

Nô Phạm Đức Tuấn bah n’gor Bình Phước ndơ̆ kon 2 năm hăn nkual ƀon têh săm, bôl gĭt ta ntŭk geh tŏng dak si n’hanh trong săm yơn tât Nhi đồng 2 rnăk wâl mư đăp mpăn.

Ta bah lơ nchroh lah ji mlông grăp ƀư duh, jŭr ta aơ dôl săm bah dih kâp sŏk jêh but uănh ri mon tât khĭt brŭt lăp săm ngăch. Bôk năp hôm mĭn geh động kinh soan yơn 3-4 mông bah kơi mon ntơm luh tay rplay mŭn âk, ăp yơn lah tâm ôp njŭn hăn khoa tâm ntưp uănh nđôi ri lah mon geh jâng ty mbung.

Tâm ban yuh, Lê Thị Huyền (n’gor Đồng Nai) ndơ̆ kon han ngih dak si 2 rơh yor bah năp nĕ geh n’gơch jêng an săm ta bah dih:

Tal 3 ntơm duh yơn tât tal 5 mư hao ta aơ but uănh, nai dak si saơ n’gơch an dak si uănh nđôi. Lĕ 2 nar saơ mon mô bah lŏ bĭch geh khĭt brŭt săk, nhĭm âk, mô ŭch sa n’hanh duh jêng ndơ̆ tât ta aơ tay. Săm dăp mpăn ri nar aơ mon dơi sĭt luh ngih dak si.

Jâng ty mbung mô geh vaccine, yơn lĕ geh trong săm, ăp gưl n’gor nău dơi tiăr nti, yơn rwê ir âk me bơ̆ ndơ̆ kon hăn nkual ƀon têh săm ƀư an ăp ngih dak si geh âk ir.

Tâm rnôk nĕ, nai dak si Dư Tuấn Quy, Kruanh Khoa nhiễm-Thần kinh, Ngih dak si Nhi đồng 2 an gĭt, jâng ty mbung pơh aơ geh âk trong hao. Aƀaơ, geh 18 nuĭh jâng ty mbung ta khoa săm tâm ngih dak si, rĭng du nar geh 15-20 mon geh jâng ty mbung dơi săm bah dih, mô kơp dơn geh nuĭh mbăn.

Ngih dak si nchroh mbơh srê dơi plơ̆ tay jêng lĕ tiăr nti ơm ăp nuĭh kan dak si, ăp gưl n’gor n’hanh lơn lah nchrăp dak si gay an rdâng. Êng ji luh mê gŭr, khoa hôm e dôl geh 40 nuĭh tâm khoa, geh trong hŭch. Yơn lah, nuĭh nai dak si đă nuĭh ƀon lan chuh njrăng n’gang srê luh mê gŭr đah nuĭh têh n’hanh kon se 95% gay dơi chŏl nău ji ntŭk gŭ rêh, mât njrăng săk soan geh nkô̆ luh ji kơt ji play nuih, leh, ung thư.

Nai dak si Quy đă đŏng, lvang bah khay 4 tât khay 6 ntơm bah ji jâng ty mbung n’hanh jêh nĕ lah duh rtoh luh mham rih. Yor nê nchrăp đŏng nuih n’hâm, n’hao soan chŏl nău ji, chuh dak si đah ăp ntil ji geh vaccine.

Luh mê gŭr an chuh njrăng n’gang, lơn lah ăp ntŭk an ngăch jâng. Gâp đă chuh njrăng n’gang ri kon se geh 6 khay, bôk năp an nkah gĭt n’hanh ƀư nău nĕ gay âk kon se lơi an geh, an njrăng ăp nuĭh geh ji ơm. Rnôk dơi chŏl ji ntŭk gŭ rêh mô geh nuĭh luh mê gŭr mhe ri mư lôch chuh. Tal 2, gâp nkoch trêng m’hâm ƀư gay nuĭh ƀon lan dơi gĭt bah khay 4 tât khay 6 yan ji jâng ty mbung an nchrăp lor njrăng n’gang. Nuĭh ƀon lan an uănh lơn n’hanh mô dơi thơ tha ăp nuh srê êng kơt duh rtoh luh mham rih, luh rplay dak. Ăp nău ji geh vacine njrăng n’gang an lah gay nuĭh ƀon lan chuh, n’hanh mbơh lor yor dak he dak nđik nuh srê dơi geh wăr năm.

Ta Ngih dak si Nhi đồng 2, Nai dak si Nguyễn Đinh Quy an gĭt, rnôk aơ duh rtoh luh mham rih, ji jâng ty mbung geh dôl hao n’hanh nuĭh kan dak si rwê đŏng rnôk nău ơm 3 ntil ji dơi geh ndrel du tơ̆.

Êng ji luh mê gŭr gâp way măt hôm, aƀaơ ntop duh rtoh luh mham rih tă aơ 2-3 pơh geh trong hao, ntơm bah dŭt khay aơ ji jâng ty mbung ntơm luh rĭk rĭk hôm. Gâp klach rwê 3 ntil nău ji aơ ntop hao du tơ̆ ri dŭt ji ŏk an nuĭh kan dak si. Aƀaơ an ntrôl dăng nkoch trêng gay me bơ̆ njrăng n’gang;