Tâm trôm ăp nău ƀư văn hóa, pâl nđaih di rơh lễ 30/4 n’hanh 1/5, ôi nđaơ (4/5), nuĭh ƀon lan n’hanh năch pâl nđaih ta Dak Lak dơi rlong ƀư ngăn văn hóa nuĭh Lào n’hanh râng rgum rƀŭn rsach dak bah nuĭh Lào ta nkual nkual ƀon têh Buôn Ma Thuột.

Tâm mông nar n’gŭr răm bah chĭng gông n’hanh mboăt n’hôm uĕh văn hóa Lào, nuĭh ƀon lan n’hanh năch dơi djăt uănh ăp nkô̆ nău kơt tŭr chĭng, goh đơn T’rưng, n’hôm wa n’hanh nău njroh Lăm vông rbân r’ên, nshơ mpơl kho ao tanh đah bôk nău Hương sắc cao nguyên. Ăp nău njroh kơt Hoa đẹp Chăm pa, Sao Ken Fai, Sa La Vắn, I Kơng Đươn Đao... Kuăl jă năch lăp ndrel ăp bu klô, bu ur Lào. Ndrel đah nĕ nău rsach dak geh nkô̆ nău ndơ̆ yan wai, dăn mih tŭp nđik rngêt ăp ndơ râ̆ jêng. Aơ lah du nău ƀư mpơl nău mbah rhơn uĕh lăng bah nuĭh Lào, dăn an ăp nuĭh mbra jut rao ăp nău mô lap n’hanh wơt dơn ăp nău uĕh lăng, hơm răm tâm năm mhe.