Tĭng ăp ntoh măt, nau ndâk ndrel ntrŭnh ƀư nau kan bah Quốc hội mpeh nau mô sŏk prăk, kơl an prăk ân kon se mầm non, ntĭk nti phổ thông, nŭih dôl nti phổ thông tâm ăp ntŭk kan ntĭm nti neh dak lah nau mpơl ân nau djăt, ƀư ăp Rgum bah Bộ chính trị, Nau ntrŭnh bah Rnâng kan rđau kan Trung ương mpeh nau kan ntĭm nti, rgop nau mât đăp mpăn nau kơl an tâm nau rêh, n’huch mbăk jâk prăk kaih ân rnăk vâl dôl geh kon hăn nti ntơm mầm non tât Trung học phổ thông. Yơn lah, ăp ntoh măt kŏ rvê mpeh nau dơi tam bah nau kan, nau kơl an ngăn tâm nau ntrŭnh, tâm nê geh nau prăk kaih gay ƀư. Nŭih ntoh măt Nguyễn Thị lan, nkuăl ƀon têh Hà Nội rgop nau:

            ‘Gâp kŏ tâm ban nau đah nau pă tơm prăk Ngih dak. Yơn lah ri ân geh nchră nâp nau dơi tâm ban tơm prăk bah n’gor, ngăn lah ăp n’gor ê geh dơi tâm ban tơm prăk ri Chính phủ kŏ ân geh kơp uănh ân n’hêl pă ntop gay đăp mpăn tŏng ân ăp n’gor der nau kơl an ueh ma yor mô geh tŏng tơm prăk ri ma nau ƀư jêng mbrơi mô lah mô tâm ban”.

            Ntoh măt Siu Hương, rmôt kan bah n’gor Gia Lai, mbơh nau:

            ‘Ăp n’gor geh nau dơi êng êng. Geh ăp n’gor hôm jêr kơt lah Gia Lai rnôk aơ geh rlau 60% lah tơm prăk Trung ương ntop, ndri ma gâp đă ân geh nau ntrŭnh ƀư ân kloh lơn mpeh nau ntop tơm prăk tă bah Trung ưng gay mhâm ƀư nau kan ân geh ueh bah Đảng, Ngih dak nơm geh ƀư du trong ueh ngăn”.

            Ntơm bah nau blau dơi bah n’gor hŏ ƀư ueh nau kơl an tơm prăk ân kon se, kon se nti ntơm mầm non tât jrâu 12, Wa Trần Chí Cường, rmôt kan Đà Nẵng ân lah, nau kơl an ân tâm ban, n’hêl na nê̆:

            ‘Mô sŏk prăk ri ngih săm ƀŭt ngih dak pơk ri ueh nơih, yơn rnôk aơ nau ntrŭnh rnoh kơl an ân kon se bah dih ngih dak ndâk ri rnoh kơl an HĐND ntrŭnh ân, jêr ngăn tâm nau kơl an, mhâm rnoh kơl nê lah nau kan. Kơt Đà Nẵng dŏng tă bah tơm prăk kơl an kon se bah dih ngih dak ndâk tâm ban ma rnoh prăk ma kon se tâm ngih săm ƀŭt ngih dak ndâk geh dŏng, mô geh ƀah. Kơt ri, păng geh du rnoh nsum tâm ban nau ntrŭnh ƀư”.

            Mpeh nau nchrăp luh, wa Nguyễn Đại Thắng, rmôt kan bah Hưng Yên, đă:

            ‘Tâm nau ntrŭnh trok pă ân nŭih geh kơl an. Tĭng nau mĭn bah gâp ri nơm ân geh mĭn mra dơi trok pă nkre bah ăp ntŭk kan ntĭm nti ri mra ueh lơn, nơm geh nau dơi mêt uănh, nkân gay ma mbơh. Hôm nau kan ân geh nau dơi mêt uănh tâm ăp ntŭk ntĭm nti geh nŭih dơi kơl an nê đŏng. Ngoai lah bah ntŭk kan ntĭm nti pă nkre ân kon se. Bar lah mra dơi nkŭp nkre prăk nti, nau vay 10 rkeh yơn prăk geh kơl an 3 ri nơm ân geh ndŏ 7”.

            Rgop mpeh nau ntrŭnh ntĭm nti mầm non ân kon se mẫu giáo ntơm 3 tât 5 năm, du đê̆ ntoh măt kơp dơn, tâm rnoh năm aơ, ăp kon se ê tât hăn nti ngăn lah kon se tâm nkuăn jru nkuăl ngai, nkual jêr jŏt. Lah nau ntrŭnh geh mbơh ƀư mra rgop nau tâm ban tâm nau dơi geh hăn nti bah kon se tâm ăp nkuăl. Bol ma ŭch nau ntuh kơl khlay ngăn bah nau geh bah ndơ dŏng, nau ntĭm nti kon se... Yơn ân uănh aơ lah nau ntuh kơl âk lơn bah nau hun hao, lah nau nkoch geh hăn nti ơm, nau nkoch ntuh kơl mât chăm răk rong ngêt sa geh dơi, nau nâp bah rnoh nŭih jêh aơ. Tĭng wa Phan Văn Mãi, rmôt kan bah nkuăl ƀon têh Hồ Chí Minh, ndrel tơm prăk ngih dak, ân geh ăp nau kan kơl an tâm nau rêh rgop đŏng nau kan aơ:

            ‘Nau nkoch mpeh tâm rgop kơl an bah ăp ntŭk rêh jêng gay hun hao nau ntĭm nti mầm non lah nau khlay, lah mô ri mra jêng mbăk jâk bah tơm prăk. Nơm ân geh mĭn njêng ndrel geh ăp nau kơl an pơk lơn, ngăch lơn gay bonh đă nau ntuh kơl tâm nau rgop nsum. Kơt lah nơm ân geh ƀư ăp nau kơt jao neh mô sŏk prăk mô lah mô sŏk prăk gay ma ndâk ngih ntĭm nti mầm non đŏng lah mô”./.