Rnôk geh nuĭh m’ha tât jay, ur sai Y Nhua, ƀon Kon Rôn, xă Ngọk Réo, n’gor Quảng Ngãi wơt đah muh măt klach rwê. Rnôk lĕ wât nău ŭch bah phóng viên ŭch mbơh đah nău khuch khat ma túy, yuh Y Nhua nkoch mpeh nuĭh kon bu klô dôl tĭng rmal 9 năm gŭ ndrung mpeh nău tih dôih dŏng mô tâm di ma túy. Rnôk kon yuh geh nhŭp, lĕ rnăk wâl ndrăt yor na nê̆ rngot dŭt mô hôm gĭt nău mĭn. Aƀaơ kon bu klô hăn krŭng, kon ƀăn mât mon sĭt jay me bơ̆ ur gŭ xă êng, nău rêh rnăk wâl yuh Y Nhua rgâl lĕ rngôch:

Au Khải bah jêt ăp nuĭh gĭt ăp nar hăn luh mô gĭt kơt nĕ. Rnôk  hăn ngih phat dôih pơng nhĭm lah mĕ klach ngăn. Mpôl hên bơi khĭt djơh. Aƀaơ mir ba mô geh nuih n’hâm ƀư.

Ƀon Kon Rôn geh 236 rnăk đah lĕ rngôch lah kônh wa nuĭh rnoi mpôl đêt Xơ Đăng gŭ rêh. Nkual ƀon tơm ơm đăp mpăn đah âk nău khlay văn hóa way ơm, nuĭh ƀon lan gơih nđơr tâm rnglăp, aƀaơ geh nău tih ma túy uh ah, ƀư djơh nău đăp mpăn. Wa Y Nhĩ, bơi 60 năm deh, di lah bah oi nău ŏk r’ah yor 2 kon têh, yơh na nê̆ lơ rwê lơn rnôk kon bu klô 23 năm deh, geh nhŭp krŭng yor ma túy:

Mê̆ mô gĭt đŏng, bơ̆ mô gĭt đŏng. Rnôk bu nhŭp nđach ngăn. Âk kon se jêt tâm ƀon aơ lơi tĭng trong nĕ tay. Gŭ tâm jay kan đah me bơ̆, kơl me bơ̆ pah kan.

Ăp nkual thôn ƀon bah n’gor Quảng Ngãi (Kon Tum ơm) geh rlău 100 nuĭh mơng dŏng hât rƀen, rlău 600 nuĭh dŏng mô tâm di ma túy n’hanh rlău 3.300 nuĭh ntôn dŏng mô tâm di ma túy. Aơ lah ngoăy tâm âk nkô̆ nău ƀư djơh đăp mpăn ta ăp ƀon lan n’hanh ƀư ăp nău tih rêh jêng kon nuĭh. Gĭt na nê̆ nău khuch, khay 4 mhe rlău UBND n’gor Kon Tum lĕ an Trong nchrăm mrô 1118 mpeh ndâk njêng ntrong ƀư “Xă, phường, nkual têh kloh uĕh ma túy” n’hanh ăp xă dôl ngăch mbơh ƀư ntrong kan aơ. Wa Phạm Thị Mây, tă ƀư Kruanh UBND xă Ngọk Réo, an gĭt, trong kan aơ lĕ n’hanh dôl dơi nthoi tay nking n’gang nău khuch khat đah ƀon lan:

Xă lĕ mbơh ƀư đŏng ntrong ƀư thôn mô geh ma túy. Rgŏ jă ăp rmôt, ăp ban, nău kan, nsum mpôl ndrel lăp gay nkoch trêng rgŏ jă druh ndăm dêr ma túy. Xă dăn đă đah ăp ngih pah kan dơi kan n’hao trong kan mât uănh, tâm rgop đah n’gâng kan ƀon lan gĭt ăp nuĭh, lơn lah uănh nđôi, ƀư kloh n’hanh rmal dŭt n’hâm ăp nău tih tăch rwăt, rdâk ƀư, dŏng mô tâm di ma túy.

Ma túy dôl ndâp mpôn lăp tâm ƀon, rĕ trêng nău rngot n’hanh phah nău đăp mpăn ta âk ntŭk bah n’gor Kon Tum. Ăp dak măt bah me bơ̆, ăp nău tih an nuĭh mom geh tĭng ma túy, lah nău mbơh gĭt dâk an nsum mpôl. Nău njrăng n’gang ma tuiý ta ăp nkual ƀon lan Quảng Ngãi (Kon Tum ơm), dôl geh nău lăp ndrel bah ăp gưl, ăp nău kan, yơn ŭch lơn tay lah nău wât bah ăp nuĭh ƀon lan.