Rlău rnoh tât, ơm rlău trong nchrăp 2 khay, bôk nău  kan jut jăng nhih jay, truh sat, nkưp nde, ta ăp n’gor Gia Lai, Lâm Đồng mô dơn nsĭt tay ăp mblâm jay têh uĕh, ma hôm ntrŭt nsôr rnăk ach o ta njăr trong hăn tât. Nuĭh ƀon  lan nkre geh nău nsing nơm, nkre geh ntŭk nsing chor jay n’hŭt răm gay hun hao wăng sa, rgâl geh nău rêh.

Ăp nar rlău aơ, rnăk wa K’Thiệu, ta thôn 1, xã Bảo Lâm 4, n’gor Lâm Đồng, dŭt rhơn yor jay mhe dơi lăp gŭ. Păng an gĭt, jay geh lĕ rngôch rnoh khlay ntuh kơl 220 rkeh prăk, tâm nê Ngih dak ntop kơl 50 rkeh prăk, rnoh prăk hôm ƀa ƀă tă bah rnăk nơm mpêt nkrem ntop đah nău rgop bah kônh wa ƀon lan.

“Dŭt rhơn rnôk dơi Đảng n’hanh Ngih dak dơi mât uănh khlay âk tât nău rêh bah kônh wa rnoi mpôl đê̆ ach o nkual jru, nkual ngai kơt mpôl hên. Geh dơi mblâm jay têh hvi kơt aơ hôm ri gâp rvê wăng sa, mô rvê mih sail, truh ji kăt kơt kăl e nơh đŏng ôh”

Kơp tât 30/6, n’gor Lâm Đồng (ơm) hŏ ƀư lôch  jêh nău nkra  n’hanh mon mhe 2.044 mblâm jay an rnăk ach o, rnăk dăch kêng ach o tĭng bôk nău kan jut jăng jay truh sat, nkưp nde. Mô dơn ƀư lôch  ơm  rlău 2 khay, n’gor dja hôm ƀư rlău 236 mblâm jay rđĭl đah trong nchrăp đŏng.

Ƀư lôch ơm tĭng bôk nău kan jay truh sat, nkưp nde bah năp 2 khay, n’gor Gia Lai hŏ rgum dơi ăp tơm ndơ gay tĭng ƀư geh nău tam bôk nău kan. Ndrel đah tơm prăk ngân sách kơl, âk ntŭk kan hŏ ndrel hăn đah nuih n’hâm “nuĭh geh ndơ rgop ndơ, nuĭh geh nar luh rgop nar luh kan". Tâm nê, mpôl công an ƀư n’gâng tơm tâm nău nchuăn rdeng, ntop kơl ƀư ta âk ntŭk. Ăp pôih tahen kơt Quân đoàn 34, Binh đoàn 15 hŏ rgop lĕ rngôch bơi 40.000 nar luh kan, rgop jêng ăp mblâm jay nâp uĕh, răm mƀak nău tâm rŏng tahen- ƀon lan. Đại tá Khuất Bá Cao – Bí thư Đảng uỷ, Groi Tư lệnh Binh đoàn 15 lah rjăp:

“Nău jut jăng jay truh sat, nkưp nde geh nkô̆ hôr dŭt khlay yor hŏ kơl kônh wa ƀon lan, ma lơn âk lah ƀon  lan rnoi mpôl đê̆ ta ntŭk geh ntŭk gŭ, ntŭk sa dơh uĕh; kơl kônh wa hun hao wăng sa. Bah  nê, Binh đoàn 15 rgop ndrel n’gâng kan ta ntŭk rdâk njêng ƀon lan mhe n’hanh mât  nâp đăp mpăn nô nău rnă njrăng chính trị, đăp mpăn lam rêh jêng kon nuĭh ta nkual n’har bri.”

Mpeh nuĭh geh dŏng ndơ kơl, n’gor Gia Lai (ơm) hŏ lôch jêh 100% trong nchrăp ntop kơl ƀư jay gŭ an rnăk dơi kơl, nuĭh geh n’hâm suan; rnăk ach o. Nkre, ăp nkuâl hôm an ƀư ăp bôk nău kan ntop kơl joi geh trong rêh, kơl nuĭh ƀon lan klaih rlău ach o du trong nâp dăng. Wa Ksor H’Phương – tă ƀư Bí thư xã Ia Rtô (ơm), aƀaơ lah xã Ia Sao – nkoch:

“Lôch rnôk ƀư wat jêh bôk nău kan jut jăng jay truh sat, nkưp nde ta xã, mpôl hên ra uănh tay gay ntop kơl ăp rnăk hun hao wăng sa, kơt kơl ndrôk ntil, ndơ mât n’hanh buăt nthoi ăp tơm prăk kơl dơh.”

Ăp nar bôk khay 7 dja, n’gor Gia Lai ƀư lôch jêh lĕ rngôch 8.100 mblâm jay kơl ăp rnăk jêr jŏt, ơm rlău 2 khay rđĭl đah trong nchrăp. Aơ mô dơn lah ntŭk nde mih, nde nar ma hôm pơk luh nău mpŏng mpeh du nău rêh đăp mpăn lơn, kơl hang rbăn rnăk ƀon  lan geh ndơ ma nsan hao, mpŏng ang nău mpŏng mpeh nău rêh uĕh lăng lơn. Wa Rah Lan Chung – Groi Bí thư Tỉnh uỷ, Kruanh UBND n’gor Gia Lai an gĭt:

“Aơ lah bôk nău kan geh nkô̆ khlay rŏng nuĭh jru. Nê lah rgum mât uănh khlay mât chăm an ăp nuĭh ach o, nuĭh dơi kơl n’hanh ăp nuĭh mô geh nău lap ta lam n’gor. Bôk nău kan hŏ wăch rgum nău râng kơl bah lam trong kan chính trị, ăp gưl, ăp n’gâng kan, mpôl tahen n’hanh ƀon lan. Jêng, n’gor Gia Lai hŏ rgâl di n’hanh rhuăt glêh môngt nar gay ntrŏng năl ƀư wat jêh bôk nău kan jut jăng jay truh sat, nkưp nde ta nkual”.