Lah ngoai tâm puăn xã mô geh ƀư rnglăp tĭng nau dăp rgum rmôt kan hành chính, xã Quảng Hoà geh n’gor Lâm Đồng jao 55 biên chế. Yơn lah, jêh rlau du khay ƀư kan, xã knŭng geh 32 biên chế, mô tŏng 23 biên chế. Wa Hoàng Trung Diện, Kruanh UBND xã Quảng Hoà mbơh, nau aơ ƀư jêng nau “mô tŏng” ntŭk kan “tal kan” tâm nau kan cán bộ:

            ‘Ngăn lah tâm nau pă cán bộ rđau kan aơ jrâu kan. Văn phòng tât rnôk aơ ê geh groi kruanh jrâu kan ndrel ê geh Kruanh jrâu kan, knŭng geh 2 cán bộ lah nŭih ƀư nau kan văn thư tơm prăk, kế toán. UBND xã leo lăp kan du đê̆ đồng chí tâm rnâng kan Đảng kŏ kơt lah mpeh hội đồng mpeh nau kơl an ân uỷ ban tâm rnôk rđau nau ƀư kan”.

            Tâm rnôk geh xã kơt lah Quảng Hoà dôl ma mô tŏng nŭih kan, xã Krông Nô, n’gor Lâm Đồng lŏ dôl ma jêr rnôk ma tâm ntŭk kan Văn hoá Thể thao bah xã, hĭ geh tât 26 công chức, viên chức. Wa Huỳnh Long Quốc, Kruanh UBND xã mbơh, jêh rnôk ƀư nau tâm rnglăp 3 rmôt kan hành chính, geh: Xã Dak Drô, Tân Thành ndrel nkuăl têh Dak Mâm (nkuăl Krông Nô, n’gor Dak Nông ơm), xã Krông Nô mơ dĭng ndơn leo kan bah Ntŭk kan Văn hoá Thể thao tă bah nkuăl ơm, ƀư jêng nŭih ri âk ma nau kan ri đê̆:

            ‘Rnôk aơ nau kan ri mô geh, ôh nô hôm geh nau rvê ơm. Ăp xã êng ri ndâk ăp ntŭk ƀư nau kan kơt nê ma mô geh pă rnoh nŭih kan ân ăp ntŭk kan bah ăp xã êng yơn rnôk aơ ri knŭng geh 26 nŭih mô geh kan pah. Geh sa prăk tă bah tơm prăk đŏng ma mô geh kan pah, ri n’gor geh ăp ntrong kan kơl an ân xã gay ma doh rklaih lơi nau kan aơ”.

            Jêh du khay bôk năp leo dŏng n’gâng kan bar gưl, n’gor Lâm Đồng dâk tal 4 lam dak mpeh rnoh nau tâm di nuih n’hâm nau kan bah neh dak. Yơn lah, nau pă dăp cán bộ ê ‘tâm di nŭih, tâm di nau kan’, “ntŭk tŏng, ntŭk rmeh” cán bộ ƀư nau kan hŏ ƀư nau kan bah n’gâng kan tâm dâng ê geh nau dơi kơt nau ŭch. Ngăn lah lam n’gor geh 93 xã, phường mô geh cán bộ ƀư nau kan mpeh công nghệ thông tin; 60 xã, phường mô tŏng nŭih kan tâm nau kan ntŭk ntu, neh ntu; 33 xã, phường mô tŏng nŭih kan tâm nau mât nau ndâk nkra...

            Gay ma rklaih, n’gor Lâm Đồng hŏ ƀư rơh n’hao nau kan bôk năp đah 260 cán bộ ƀư nau kan gưl n’gor tât kơl an gưl xã. Ndrel ma nê, n’gor kŏ ndâk 12 rmôt kan ƀư nau kan tât xã, phường kơl an nau rklaih nau jêr, nkol bah n’gâng kan tâm dâng. Sở Nội vụ ndrel Ban pháp chế HĐND n’gor Lâm Đồng kŏ dôl ndâk nau nchrăp mbơh ăp gưl geh nau dơi lŏ jao rnoh biên chế gay n’gâng kan xã nchrăp pă, ntrơn leo cán bộ tŏng dơi nau ŭch nau kan ƀư.

            Wa Đỗ Văn Chung, Giám đốc Sở Nội vụ n’gor Lâm Đồng mbơh, n’gor dôl ntrŭt dăng nau kan dăp rgum, ƀư ntrong kan tâm ăp xã gay pah kan n’gâng kan 2 gưl ngăn ngên geh rtŭt gleh, săk tam:

            ‘Bah năp măy ân geh kơp uănh 124 xã, phường, ntŭk kan geh du rnoh moh săk ăp nau kan, nau ƀư bah ăp đồng chí gay ma geh nau leo đă ƀư. Mhâm ƀư ân ê lor lah ntŭk kan tâm xã nê ân tâm di nau dơi, nau blau kan bah nơm. Tal barr lah tâm rgum ăp xã ntơm nơh gay ma ƀư, ntrơn leo gay xã aơ kơl an nau kan ân xã ri ri mơ ntơm ƀư geh leo săk dŏng”.

            Năn kloh saơ nau kan “mô tâm di nau kan”-‘ntŭk rmah, ntŭk mô tŏng” cán bộ gưl xã, n’gor Lâm Đồng dôl lŏ nsôih ƀư nau kan gay ntrong kan n’gâng kan tâm dâng nar lơn ma ƀư jêh, cán bộ pah kan tâm di, nau dơi, nau kan bah nơm ndrel nŭih ƀon lan geh kơl an ueh lơn”./.