Lăp đah nău nteh đinh buôt hŭch hao, Y Puen Niê ngăn ngên lah du hê nghệ sỹ ƀon lan bah kơi nău ƀư lah cán bộ mât uănh Radio ntuh nău ngơi xă Čư Pui, nkuăl Krông Bông, n’gor Dak Lak, Tâm nău rêh uĕh lăng lah du play nuih ŭch mro đah nău nteh bah chĭng gông n’hanh ăp ntil chĭng gông mboăt n’hôm bah nuĭh Êđê.

Jêh nti ngih sam ƀŭt Trung cấp Đam San, nô Y Puen Niê lĕ geh du nău wât n’hanh ryơk ăp nău khlay văn hóa ma u che n’glơi an. Nô Y Puen Niê an gĭt, ŭch đah văn hóa rnoi nuĭh, rnôk 15 năm deh, nô lĕ ƀư n’hôm đinh buôt bôk năp bah nơm.

Lah mpeh văn hóa bah nuĭh Êđê nơm, kơt tŭr chĭng, uh đinh năm, đinh buôt, mprơh Eirei lĕ lăp tâm nuih nơm bah jêt. Gâp dơi gĭt tât bah u che, ăp wa, ăp yơn.... Tât rnôk têh, nău ŭch dơi nti uh, tŭr ăp ntil chĭng rnoi nuĭh nơm lơ âk. Gâp lĕ geh nău nsrôih dŭt âk gay dơi ƀư n’hanh dŏng pơng. Mboăt n’hôm bôk năp gâp ƀư lah đinh buôt, jêh nĕ lah gông, brô̆, đinh tút... Nău khlay ngăn lah nău ŭch bah săk nơm.

Nô Y Puen Niê lĕ an âk mông nar mĭn joi mpeh tu tơm, nkô̆ nău bah tĭng mboăt n’hôm, bah nteh chĭng gông tât đơn T’rưng, nteh n’hôm Êđê đah nău mprơ kưt mô lah nteh đinh năm đah nău mprơ Eirei n’gŭr răm. N’hanh nô nkoch mbơh nău ŭch nĕ tâm rơh druh ndăm:

Rnôk gâp lĕ dơi ƀư, gâp nkoch an kon, sau tâm ƀon lan, tâm xă, tâm nkuăl. Gâp dơi jă hăn ntĭm an ăp mon kon se ta âk ntŭk êng êng. Tâm khay 4 mhe rlău, gâp lap geh rơh hăn ntĭm tŭr chĭng way ơm kơt chĭng ngăn, gông rla, n’hôm, wa, đing brô̆, gông la n’hanh ăp ntil chĭng gông ta Hà Nội. Ăp mon jêt wât ngăch yơn nău rêh aƀaơ ăp mon wât âk văn hóa ta ăp mạng xã hội kơt Facebook, tiktok khuch mô đêt tât nău ŭch nti nsơm.

Ăp jrô nti chĭng gông, đơn T’rưng, yor nô Y Puen Niê ntĭm lĕ jêng du ntuk pâl uĕh đah ăp mon jêt ta âk ƀon lan. Oh H’Tra Buôn Yă (10 năm deh), mhe geh giải bar tâm rơh tâm rlong mprơ nkuăl Krông Bông, nkoch:

Mpôl oh dŭt nău mprơ, njroh bah jŏ hôm. Jêng tât rnôk mâp kônh Y Puen Niê mpôl oh dơi nti tŭr chĭng ngăn, chĭng rla, mprơ Eirei, uh n’hôm... Oh n’hanh ăp băl tâm jă hăn nti. Mpôl oh râng ăp rơh tâm rlong n’hanh mpôl oh dŭt ŭch ngăn.

Nô Y Puen Niê lĕ jêng du hê dŭt n’hâm tâm ăp rmôt chĭng, mboăt n’hôm bah xă Cư Pui, rgop rêng hvi văn hóa rnoi nuĭh Êđê tât âk nkual neh êng.

Nô Y Phinh Buôn Yă, nai ngih sam ƀŭt tiểu học Dang Kang 1, xă Dang Kang, nkuăl Krông Bông nkoch:  

Djăt ngai kơt sĭm ndrău dôl ndrau ngai, djăt dăch kơt chĭng bah khay mih. Gâp dŭt ŭch djăt nô Y Puen Niê goh gông, dŭt uĕh. Ăp chĭng gông bah nô lĕ rngôch bah rla, ngâr, dăch dêh đah bri dak, dăch dêh đah kônh wa bah mom tât ranh. Mpŏng nô Y Puen Niê ngăch dăng gay rêng hvi chĭng gông mboăt n’hôm way ơm dŭt uĕh.

Đah nău blău n’hanh nuih n’hâm, Y Puen Niê lĕ geh âk nău dơi ta ăp rgum tâm rlong tŭr chĭng goh gông gưl nkuăl, n’gor. Ntoh lư kơt Huy chương Mah rgum tâm rlong nghệ thuật quần chúng gưl n’gor n’hanh giải B nghệ thuật lực lượng vũ trang n’gor Dak Lak. Ta Nar rgum văn hóa ăp rnoi mpôl đêt n’gor Dak Lak năm 2023, rmôt chĭng rla yor nô ntĭm lĕ geh giải B đah nău chĭng rla n’hanh njroh xoang jă ngêt ndrănh rhơn bôk yan.

Nău nkoch đah nô Y Puen Niê, du hê ŭch văn hóa way ơm lah an saơ n’hâm soan rêh dăng bah nău rêh Tây Nguyên. Đah nău rêh mhe, hôm e âk nuĭh mom nsơr soan, mât rƀăy n’hanh trêng hvi ăp nău  khlay văn hóa nuih n’hâm dŭt khlay. Nghệ nhân mom Y Puen Niê ngăn ngên nuĭh sol trong, nău ntô̆ n’hao bah kônh wa nuĭh Êđê ta Dak Lak.