Ta nuih n’hâm tĭng ƀư Nghị quyết bah Trung ương mpeh nău n’glăp dơn ngoăy 3 n’gor Lâm Đồng, Bình Thuận n’hanh Dak Nông, tâm nchră rƀŏng trong hun hao wăng sa- rêh jêng kon nuĭh n’gor Lâm Đồng (mhe) lvang năm 2026 - 2030 n’hanh ăp năm bah kơi tay mhe dơi ƀư. Tâm nchră rgum uănh năl lam lĕ rngôch nău ngăn geh, ntrŏng săk geh, dơh uĕh hun hao, dăn đă ăp trong rƀŏng têh jong n’hanh trong nkra ngăn ngăn gay nchrăp ntŭk nsing lý luận n’hanh ngăn ngăn rhŏ dŏng rdâk njêng siƀŭt nchrăp lor Đại hội đại biểu Đảng bộ n’gor Lâm Đồng (mhe) năm kan 2025-2030.

Ta tâm nchră, ăp nuĭh rnâng kan, nuĭh khoa học, nuĭh mât bôk kan, ndrel kruanh ăp n’gor rgum uănh năl nău ngăn geh, nkoch nău tă ơm gĭt kan, dăn đă ăp trong rƀŏng n’hanh trong nkra na nê̆ gay rgop bôk rngok gĭt blău, dăn đă trong nkra hun hao n’gor Lâm Đồng (mhe) đah rnoh ŭch tât: “Rdâk njêng n’hanh hun hao lam lĕ rngôch n’gor Lâm Đồng, sŏk đăp mpăn ƀư jâng nsing gay hun hao; sŏk hun hao wăng sa lah nău dơn kan rgum tơm; sŏk nău rhơn răm n’hanh ăp tŏng bah nuĭh ƀon lan lah ntŭk nsrôih tât; tât năm 2030 n’gor Lâm Đồng jêng n’gor hun hao geh mbơm ôi, rĭng geh tĭng bôk nuĭh âk, tâm di đah trong rƀŏng, jong ngai hun hao neh dak”. Tĭng kiến trúc sư Trần Ngọc Chính, Kruanh Hội Dăp rgum hun hao đô thị Việt Nam, trong rƀŏng hun hao bah n’gor Lâm Đồng mhe ân đăp mpăn pe nău way jêng nsing lah ăp kôp – nâp dăng- tâm ntêng lêng nkual, tâm nê ân ntrŏng kloh trong kan I dŭt khlay.

“Rnôk dơn ngoăy tay ri he ân rƀŏng tâm moh ntil ndơ wăng sa dŭt khlay. wăng sa dak lêng bah n’gor Lâm Đồng mhe lah trong rƀŏng an ƀư lor, lôch nê lah công nghệ mhe bah nkual Đà Lạt n’hanh Dak Nông lah công nghiệp lơh joi bauxite. Ndrĭ ri nău buăt nthoi đah pe n’gor dja đah nău hun hao nê ri mbra geh tât rêng hun hao đô thị. Gâp mĭn geh pe đô thị rgum tơm nha hôm lah Đà Lạt, Gia Nghĩa n’hanh Phan Thiết đŏng, đah ăp đô thị ri geh du rkŭm đô thị n’hanh he buăt nthoi păng gay geh nău hun hao”.

Tâm nchră lah rjăp, lôch n’glăp nsum, Lâm Đồng mhe geh bri, geh dak lêng, geh mpông n’har bri, geh ndrâm dak lêng, jêng “tơm me” bah du đêt tơm công nghiệp, tơm sa play n’hanh công nghiệp bauxite. Aơ lah sŭng soih, săk geh dŭt têh lah trong dơh khlay gay Lâm Đồng jêng bôk hun hao mhe, geh rnoh tŏng têh kuâng, suan ntrôl tŏng dăng n’hanh ring tam tŏng jru hvi, đăp mpăn geh nău tât đăt ndal n’hanh lam lĕ rngôch, rgop tât rnoh hun hao 2 keh mbrô tâm năm kan 2026 – 2030.

Tĭng wa Trần Hồng Thái, Kruanh UBND n’gor Lâm Đồng, tâm nchră nchŏng luh ăp săk geh mô hŏ dơi mât dŏng tam đŏng, ndrel đah ăp mpăng đêt dôl nking kol nău hun hao, kơl uănh saơ kloh lơn păng rup hun hao bah n’gor Lâm Đồng mhe tâm let năp tay. Aơ lah ăp nău rgop dŭt khlay gay Lâm Đồng mpơl saơ ăp nău kan dơn rgum tơm tâm siƀŭt nchrăp Đại hội Đảng bộ n’gor bơi tât. Wa Trần Hồng Thái, lah rjăp:

“Hun hao wăng sa- rêh jêng bah Lâm Đồng ân nkre đah rnoh tât hun hao nđĭr uĕh, nâp dăng n’hanh lam lĕ rngôch nsing ta jâng wăng sa nđĭr, wăng sa mbrô n’hanh rgâl blău mhe. Nău hun hao nê ân n’gluh tâm ntŭk ntêng lêng âk nkual, âk bôk. Ntik n’hao lĕ săk geh dơh uĕh bah du n’gor rgum tŏng lĕ ma dor yôk, meng dak lêng, n’har bri, dăp rgum tay ntŭk hun hao tĭng trong rƀŏng rgum lăp, âk ntŭk rgum tơm n’hanh ntêng lêng geh nău tam đah ăp bôk tơm suan ntrôl. Hun hao nkrum lam n’hanh sŏk kon nuĭh ƀư rgum tơm ân lah jâng nsing, ân ndơ̆ nuĭh ƀon lan lăp ntŭk gŭ tơm mpôl, doanh nghiệp lah suan ntrôl n’hanh n’gâng kan ta ntŭk lah blău mhe, rhŏ dŏng. Gâp dăn đă rmôt Biên tập Văn kiện Đại hội đại biểu Đảng bộ n’gor Lâm Đồng mhe rgum lĕ ăp nău rgop bah ăp nuĭh rnâng kan”.

Mhe aơ, ta rơh pah kan đah 3 n’gor lor rnôk njêng n’gor Lâm Đồng mhe, Tổng Bí thư Tô Lâm hŏ rđău đă n’hanh lah rjăp: “Lâm Đồng, Bình Thuận n’hanh Dak Nông lah ăp nkual neh ơm geh âk nău way cách mạng, săk tơm rnoi nuĭh, dôl nsrôih hun hao, rgâl mhe lam lĕ rngôch n’hanh năl di ntŭk gŭ kan nar lơn ma khlay tâm ntŭk hun hao wăng sa- rêh jêng kon nuĭh bah nkual miền Trung - Tây Nguyên. Ăp n’gor ndjôt tâm săk he ăp săk ntơr êng, du ntŭk nsan dăng ntoh lư, rgop ƀư jêng ntŭk hun hao âk mpưm, âk mpeh n’hanh âk ntil săk geh.

Tổng Bí thư êng lah rjăp: “Lịch sử dôl nta an n’gor Lâm Đồng mhe ăp săk geh, tơm ndơ n’hanh trong dơh soih mô hŏ tă geh gay hun hao, yor kơt nê̆ ân rƀah ngăch, geh trong nchrăp di gay ƀư trong dơh soih, tơm ndơ n’hanh săk geh jêng nău dơi hun hao na nê̆, rgâl geh nău rêh bah nuĭh ƀon lan”./.