Lôch rơh vơt, bar hê Thủ tướng lĕ tâm nchră, tâm ban ŭch ntrôl lĕ rngôch nău tâm boh kan 2 ding. Thủ tướng Phạm Minh Chính lah na nê̆: Rơh tât khâl geh nău kan dŭt khlăy  jŏ jong, pơk luh nău mpŏng uănh mhe an nău tâm boh kan ndrel lĕ rngôch Việt Nam - Malaysia. Bar ding geh nău mpŏng n’hao rnoh prăk geh tăch ndơ đah bar dak hao tât 18 rmen đôlar tâm bar pe năm tay, nkre lah ntrôl an tâm kơl ăp trong kan mhe kơt wăng sa rnoh mbrô, wăng sa ueh nđir, rgâl ŭnh nar, rgâl mhe nău kan, tuch tăm mhe, rnă njrăng mạng...Bar ding lĕ tâm ton n’hao  tâm rgop pâl nđaih, tâm nđur ƀon lan, ngăn lah rơh mom, pơk hvi nău tâm kơl ntĭm nti, tâm mbơh nău học bổng, bâh nĕ n’hao nău tâm gĭt vât n’hanh dăch bên đah bar mpôl rnoi.