Ăp nar bôk khay 6 aơ, rnoh năch tât Đà Lạt, n’gor Lâm Đồng hao âk. Ta ăp trong nklang nkual kơt Trần Phú, mô lah nkual n’glău Xuân Hương... tât ăp ntŭk tuch tăm mât rong mper nkual ƀon têh ta Lạc Dương, Tà Nung, geh âk năch da dê. Nô Nguyễn Khắc Hoàng Lâm, nuĭh ƀon lan rêh jŏ năm ta phường 4, nkoch:

Tâm yan rlu nti, nkual ƀon têh gâp âk răm ngăn. Nuĭh ƀon lan Đà Lạt mpôl hên nchrăp wơt bu năch đah nău ngơi gơm dăch dêh, play dô uĕh kah n’hanh ăp nău nkoch nkual bri yôk. Săk gâp dŭt ŭch dơi tâm mâp, nkoch bri đah năch ngai, nkhoch an khân pơng ăp ntŭk tât hôm e đêt nuĭh gĭt n’hanh ăp ntŭk pâl nđaih mhe ntŭk gâp.

Jêh rơh tâm rlong lăp jrô 10 THPT, dŭt âk kon hŏk lĕ jăng nău rwê tâm rlong, Đà Lạt lơ wơt âk rnăk wâl, âk ngăn bah Hà Nội, Hồ Chí Minh, Vũng Tàu n’hanh ăp n’gor miền Tây. Yuh Thùy Dương, bu năch bah nkual ƀon têh Hồ Chí Minh, an gĭt:  

Rơh hăn aơ, mpôl hên săch rlu rlău ta du ntŭk rlu mper nlgău Tuyền Lâm, ntŭk geh nkual uĕh, đăp mpăn n’hanh rơ̆ rơch. Lơn lah, ndơ sông sa Đà Lạtj ƀư mpôl hên uĕh yor ndơ bô kah, uĕh lăng. Bah meng nĕ, uĕh nău rhŏ way kan ndrel rnoh khlay tâm di lơ ƀư an rơh rlu rlău jêng tŏng ăp n’hanh dơi nkah gĭt lơn.

Hôm Wa Đinh Văn Dôn, Giám đốc Công ty TNHH Pâl nđaih Hppy Day nkoch:

Mpôl hên dôl mbơh ƀư âk ndơ pâl nđaih an bu năch, rƀŏng tât ƀư ngăn lŏ mir công nghệ mhe, yor aƀaơ bu năch dŭt uănh tât ăp ndơ lŏ mir, lơn lah cà phê, rlu rlău, massage aih săk n’hanh ăp nău rhŏ pâl nđaih uĕh êng.

Đah trôk nar aih nđik, bri neh uĕh nđĭr, nău rhŏ pâl nđaih uĕh, nkual ƀon têh Đà Lạt, n’gor Lâm Đồng mô knŭng wăch rgum bu năch tâm dak ma hôm lah ntŭk tât uĕh bah năch dak bah dih. Bôk yan mih aơ, ta Đà Lạt lĕ geh âk bôk nău mâp măt, tâm nđŭr “Boăt nthoi Văn Hóa, Kan ndrel Pâl nđaih đah Lâm Đồng n’hanh nuĭh kan ndrel Hàn Quốc”. Wa Nguyễn Tiến Hải, Groi Giám đốc N’gâng kan Văn hóa, Thể thao n’hanh Pâl nđaih n’gor Lâm Đồng an gĭt, ta ntŭk gay wăch rgum năch Hàn Quốc tât Lâm Đồng hôm dŭt têh gay ƀư tĭng nău rƀŏng lĕ n’gluh an:

Đà Lạt Lâm Đồng geh trôk nar nđik, geh dŭt âk ntil nău pâl rlưn, văn hóa ta ntŭk uĕh n’hanh âk nău thể thao pâl nđaih kơt golf, ntŭk ntô an năch Hàn Quốc tă bah uănh nsong, rlu rlău.

Hôm wa Trần Hải Linh, Kruanh Hiệp hội Doanh nhân n’hanh Ntuh kơl Việt Nam-Hàn Quốc (VKBIA) an lah, nău boăt nthoi văn hóa n’hanh kan ndrel pâl nđaih đah Lâm Đồng n’hanh ăp nuĭh kan ndrel Hàn Quốc mô knŭng geh nkô̆ wăng sa, ma hôm rgop hăt rjăp dăch dêh, hăn ndrel jŏ jong đah nuĭh ƀon lan 2 dak.

Năm tât, Lâm Đồng mbra nglăp nsum 3 n’gor, dơi lah aơ ngoăy tâm âk njoat hăn kơl Lâm Đồng kan ndrel n’hanh hun hao mhe đah ăp dak Hàn Quốc. Lơn lah tâm 2 ntil nău khlay pâl nđaih n’hanh tăch rgâl. Nar aơ, geh 35 doanh nghiệp pah kan  tâm ntil nău pâl nđaih n’hanh trong hăn dơi mpôl hên ndơ̆ tâm bôk nău kan tâm nđŭr, nău ŭch m’hâm ƀư gay ăp nău kan pâl nđaih ta Lâm Đồng hun hao ngăch dăng lơn tay.

Rơh aơ, ntoh măt ăp ntŭk kan Hàn Quốc n’hanh Việt Nam lĕ ký samƀŭt nkah gĭt kan ndrel, pơk luh ntuh kơl tâm ăp ntil nău kơt pâl nđaih rlu rlău, lŏ mir hữu cơ, công nghiệp nkret njêng kloh uĕh n’hanh logistics... Ăp doanh nghiệp Hàn Quốc mpŏng mbra ntop kơl tay âk mpeh nău kơl, ntung trong, nuĭh kan n’hanh ntŭk ntô ntuh soaih aih. VKBIA ton ƀư tơm boăt nthoi, tâm rgop ƀư ntrŭt ngăch tăch rgâl, văn hóa n’hanh pâl nđaih ăp rơh, ndơ̆ Lâm Đồng jêng nklang boăt nthoi Việt-Hàn./.