Lâm n’gor Dak Lak geh 33 ntŭk thi, đah rlau 22.500 kon se. N’gâng kan ntĭm nti tâm n’gor hŏ tâm rgop ma ăp ntŭk kan n’gâng kan ƀư nau đăp mpăn, pơk trong nơih ân kon se thi ueh dăng, ngăn lah kon se tâm nkuăl jru, nkuăl ngai mô lah geh nau rêh jêr jŏt. Bôk nau kan “Ntop n’hâm yan thi” tâm DakLak geh ƀư đah nau râng bah rlau 1000 druh ndăm kơl an. Ăp nŭih kơl an hŏ râng ƀư ăp nau kan, kơt: mbơh nau, ntĭm mbơh kon se thi joi jrâu thi, ƀư săm ƀŭt râng thi; pă dak ngêt, pă nklâm ndơ mât uănh ndoh ndơ mô sŏk prăk ân kon se thi; kơl an ăp ndơ dŏng nti...ndrel ma nê, râng nau mât đăp mpăn, nâp nal trong hăn tâm ăp chốt ndrel ăp ntŭk thi. Êp nê, Bôk nau kan rgum geh rlau 1.500 ndơ sa mô roh prăk, 50 thùng dạk toh ndrôk, âk rbăn chai dak ngêt, pă ân ăp kon se nti; ndrel rgop prăk pă 4 nklâm ndơ “Ntop n’hâm yan thi’ rnoh 2 rkeh prăk tâm du nklâm ndơ kơl an ăp kon se mâp nau jêr./.

N’gor Kon Tum geh rlău 5.300 kon hŏk râng tâm rlong Tốt nghiệp THPT. Lam n’gor tâm pă 14 ntŭk tâm rlong đah 244 jrô tâm rlong n’hanh 28 jrô kâp. Rlău ma nĕ, nău kan ntĭm nti n’hanh n’gâng kan ƀon lan ăp ntŭk lĕ tâm pă tay 9 ntŭk tâm rlong nchrăp lor tâm nău geh nu nău trôk nar. Gay tŏng ăp rơh tâm rlong tốt nghiệp THPT ƀư đăp mpăn, rjăp, di trong ntrŭnh, n’gor Kon Tum rgŏ jă rlău 1.200 cán bộ, công chức, viên chức ƀư trong kan tâm rlong. Ăp ntŭk tâm n’gor lĕ rgŏ jă geh rlău 600 rkeh prăk ntop kơl rlău 1.800 kon hŏk geh nău rêh jêr jŏt. Ndrel đah nĕ, ăp ngih samƀŭt lĕ nchrăp uĕh ntŭk sa, ntŭk gŭ an ăp kon hŏk rnoi mpôl đêt gŭ ngai ntŭk tâm rlong./.

Năm aơ, N’gor Gia Lai geh rlau 16.200 kon se đăng ký râng thi. Lam n’gor pă 42 ntŭk thi, đah 718 jrâu thi. Gia Lai rgum geh 4.500 cán bộ, nai ntĭm, nŭih ƀư nau kan râng ƀư ân rơh thi. Nau kan “Ntop n’hâm yan thi” tâm ăp nkuăl kŏ ƀư ueh tâm ăp ntŭk thi. 2.400 kon se mâp nau jêr bah n’gor geh kơl an, đah rnoh prăk rlau 940 rkeh. Êng nkuăl ƀon têh Pleiku geh pă ntŭk sông, ntŭk rlu ân ăp kon se hăn râng thi đŏng./.

Lam n’gor Dak Nông geh rlău 8.500 kon hŏk dăn râng tâm rlong tốt nghiệp THPT. N’gor tâm pă 23 ntŭk tâm rlong na nê̆ đah dĭng lĕ 380 jrô tâm rlong, dơi tâm pă tâm ban ta ăp nkuăl, nkual ƀon têh, gay dơh an nău hăn nsong bah kon hŏk, ngăn lah ta nkual jru ngai.

Rơh thi năm aơ, n’gor Lâm Đồng geh bơi tât 17.000 kon se đăng ký râng thi. N’gor pă 40 ntŭk thi đah rnoh 719 jrâu thi. Rnoh nŭih ƀư nau kan kơl an tâm rơh thi rlau 2.500 nŭih. Đah nau nchrăp nâp mpeh rnoh nŭih, ndơ dŏng ndrel ƀư nau kan, ndrel nau tâm rgop rjăp đah ăp ntŭk n’gâng kan ntĭm nti ndrel rmôt kơl nau kan, n’gor Lâm Đồng nsôih ƀư rơh thi ân đăp mpăn, rjăp, tâm di nau kan ndrel geh nau dơi prêh ngăn./.