
Dŭt khay 3/1975, rnôk ma nău tâm lơh ta ăp ntŭk tâm lơh mpeh ba dâng rgâl tât ngăch, Đại tướng Võ Nguyên Giáp lĕ ntĭm đă n’gâng kan Tư lệnh Quân khu 5 n’hanh n’gâng kan Tư lệnh Hải quân ngăch ndăn rglaih đăp mpăn ndru gôl dak Trường Sa. Lôch nĕ, du ntŭk kan ƀư tĭng nău kan khlăy geh njêng, geh mpôl kan lữ đoàn 126 Đặc công Hải quân tâm rgop đah bộ binh, mbơh nău mhe, ăp ntŭk kan kơl kan bâh Quân khu 5.
Gay ma mât đăp mpăn nău mpôn, nău ndal, ăp duk nchoăn rdeng ndơ tahen geh ƀư njêng duk lơh joi ka dak bah dih, tahen krap nde tâm ăp n’goang duk, ntuk rdeng ndơ, nsrôih hăn n’grĭng tahen tâm nău dak lêng nkŏch n’hanh geh âk nău tât jêr. kêng măng lơ 13/4/1975, ăp duk bâh he lĕ tât ta gôl dak Song Tử Tây. ơm ôi nar ba kơi, mpôl kan đặc công dak, bộ binh lĕ tâm ndrĭh rtoh phao, pơk rơh rdul lơh ndal ta gôl dak. Bol ma geh mâp nău tâm rdâng hô yơn bâh geh nău tâm kơl kan na nê̆, nău tât ndal, kanŭng 30mnĭt tâm lơh, tahen rklaih nău đăp mpăn lĕ ƀư tơm gôl dak Song Tử Tây. Nĕ lah tong phao bôk năp ntơm an nău tâm lơh rklaih an đăp mpăn ndru gôl dak Trường Sa.
Wa Trần Đăng Ninh, 70 năm deh, ƀon tơm ta Hải Hậu, Nam Định, tahen ơm đặc công tât râng tâm lơh nkoch tay.
“Rơh tâm lơh aơ lah rơh mpôn, ndal rdul lơh dăch gôl dak, mpeh đah tahen Sài Gòn mô gĭt lah he lĕ tât dăch ngăch kơt nĕ. Rnôk nĕ, nău ta neh kơh hôm nha geh âk nău uh ah ngăn, ta dak lêng âk duk rlăng hăn nsong, geh lĕ ma mpôl uănh meng bâh mpôl bah dih đŏng. Lôch 14/4, mpôl tahen đặc công hên gŭ tay mât gôl dak, hôm mpôl kan êng rdeng tahen sôt rmanh, tahen tă rlăng nhŭp krŭng sĭt tay ta Đà Nẵng”.
Ndơn nsan nău dơi, lơ 21/4/1975, rmôt duk tal 2 lĕ hăn tay ta dak lêng,tât dăch n’hanh rklaih đăp mpăn ăpgôl dak Sinh Tồn, Nam Yết, TRường Sa, Sơn Ca...lơ 29/4/1975, ăp ndru gôl dak Trường Sa lĕ geh rklaih đăp mpăn. Trung úy Nguyễn Văn Mỹ, tahetrinh sát ơm bâh Sư đoàn 2 ta Lữ đoàn 126 nkoch tay, kêng măng lơ 30/4, ăp nuĭh tăng lư rklaih đăp mpăn Sài Gòn bâh nău nkoch lư khlăy bâh Radio nău ngơi Việt Nam, nău nkoch dŭt rhơn ngăn.
“Rnôk nĕ, mpôl hên dôl gŭ ta gôl dak Song Tử Tây, tâm ôp ngơi dŭt jêr. Rnôk ma Radio nău ngơi Việt Nam mbơh lĕ rklaih đăp mpăn miền Nam, chŭt cờ ta dinh Độc lập, oh nô rhơn ngăn, tap ti, ndroh drơu. Rnôk geh gĭt lư rklaih đăp mpăn, hên hôm rêh kahgĭt ăp tahen khĭt ta năp mông đăp mpăn”.
Lôch 50 năm geh rklaih đăp mpăn, nkuăl ndru gôl dak Trường Sa nar aơ dôl rgâl săk hun hao têh dăng ta rơh ngih dak mpeh nău wăng sa dak lêng, lah play nuih nklang dak lêng Đông, ntop n’hao nău dơi bâh neh dak ta bản đồ gôl dak lam ntur neh. Wa Nguyễn Tấn Tuân, kruanh UBND n’gor Khánh Hòa an gĭt, tâm let năp tay, n’gor an geh ƀư lôch lĕ trong kan chính trị, n’hao nău ueh dơi nău rêh an ƀon lan ăp ndru gôl dak, ntrôl dăng nău mbơh tơih, n’hao nău gĭt vât mpeh Trường Sa tâm ntŭk rêh jêng. Wa Nguyễn Tuấn Tuân lah na nê̆, nkô̆ mpŏng ŭch lah ndơ̆ Trường Sa jêng ntŭk tơm mpeh nău wăng sa- rêh jêng ueh mhe ta nklang dak lêng Đông, nkre lah ntŭk n’king n’gang nâp nâl gay ma mât nău ƀư tơm bâh neh dak.
“Mât đăp mpăn an ueh, du nău êng ăp nău kơl kan, nău kơl êng an geh njêng nău geh an ƀon lan. ăp rnăk nkre tât râng pah kan jan sa nkre tât râng mât nău ƀư tơm dak lêng, gôl dak. Tahen quân chủng hải quân, n’gor Khánh Hòa ndrel mât kơl an nkuăl gôl dak. Nĕ lah nău rgŏ jă têh, gay ma ăp nuĭh ƀon lan tâm neh kơh tâm ban kơt ta gôl dak lêng saơ nău khlăy ngăn lah ƀư tơm, đăp mpăn bâh neh dak”.
Viết bình luận