Ôi ntri (16/5), Tỉnh Đoàn Dak Lak ƀư bôk nău kan tâm mâp, mpư rnê đảng viên mom ntoh lư năm 2025. Aơ lah nău kan nkhêp nkah ndray 80 năm Cách mạng Khay pham (19/8/1945 – 19/8/2025) n’hanh 135 năm Nar deh Kruanh Hồ Chí Minh (19/5/1890 – 19/5/2025). 33 đảng viên mom ntoh lư bah ăp nkuâl, thị xã, nkual ƀon têh n’hanh  ăp nhih pah kan  mpeh lam n’gor hŏ dơi mpư rnê rnôk dja.

Aơ lah ăp nuĭh ntoh lư ta âk trong kan kơt: kơt nti- gŭ mĭn khoa học, hun hao wăng sa- ntơm njêng nău kan, pah kan đoàn – hội, njrăng n’gang neh dak – rnă njrăng, rdâk njêng ƀon lan  mhe n’hanh mât njrăng ntŭk gŭ rêh. Nău kan mpư rnê đảng viên mom ntoh lư lah rnôk gay Tỉnh đoàn Dak Lak rdâk tay nuih n’hâm nsan hao tâm lam đoàn viên, druh ndăm; rgop rdâk njêng mpôl kan Đoàn nâp dăng, ntik n’hao nău khlay kan bah mom ndăm tâm  n’gâng kan rdâk njêng n’hanh mât njrăng neh dak. Rdâk njêng Dak Lak nar lơn ma hun hao, srăch uĕh, têh ndrŏng mhe.