Ta rƀŭn nchră, ăp đại biểu rgum tâm nchră, rgop nău n’hêl na nê̆ hun hao pâl nđaih ta ntŭk n’hanh nău nkoch mpeh mât nău têh tĭng nkual gay jêng ndơ pâl nđaih uĕh, âk ntil. Tâm nĕ, Phú Yên geh kơh dak lêng jong 189km, âk kơh ŭm, rđŭng njônh, geh Ntŭk ơm yău ngih dak lơn lah gành Đà Đĩa n’hanh âk ntŭk ơm yâu văn hóa lịch sử jŏ năm. Dak Lak ntĭt mpơl đah pâl nđaih bri dak, văn hoa, ăp mir cà phê têh, dak lêng têh n’hanh ntŭk ntô văn hóa chĭng gông Tây Nguyên. Rnôk rgum nsum Phú Yên n’hanh Dak Lak jêng ngoăy, nău boăt nthoi têh dăng “dak lêng-bri” lơ jêng khlay.

Wa Đặng Hoàng Vũ, Công ty Sao Mai Beach Resort, ta Phứ Yên an lah, nău way ăp nar đah 2 n’gor hôm e jêr jŏt, boăt nthoi ntung trong mô hŏ tŏng ngăch nkôp đah nău ŭch hăn nsong, nchoăn rdêng ndoh ndơ n’hanh năch, lah nău n’hâm soan mkra gay ăp nău têh dăng dơi ngăch boăt nthoi.

Ân nkra n’hanh pơk hvi lơn gay njok trong bah Dak Lak tât đah Phú Yên tât đah Dak Lak mbra dơh uĕh ngăn, đăp mpăn dơi rhŏ an nchoăn rdêng đêt mông ngăch ngăn. N’hanh an geh nău boăt nthoi n’hanh ƀư luh ăp ndơ ntĭt mpơl, lăp jru mpeh pâl nđaih, ntoh lư bah 2 ntŭk tâm rgop ndrel gay jêng du rup ndah rgum lĕ đah pâl nđaih, djôt tât nău ƀư ngăn săk rnglăy âk ngăn.

Đại biểu dăn đă đŏng âk nău rgop geh tât tour, trong hăn, bôk nău rgop đah 2 ntŭk; nău kơl ntop an ndrel gay ndrel ntrôl pâl nđaih hun hao. Wa Hồ Văn Tiến, Kruanh Hiệp hội Pâl nđaih Phú Yên an gĭt, tâm rnôk Phú Yên n’hanh Dak Lak nchrăp rgum nsum, nău kan pâl nđaih 2 n’gor lơ an nsrôih âk lơn gay ndơ̆ pâl nđaih jêng nău kan wăng sa têh khlay.

Mpôl hên mbra ƀư ăp nău kan tâm rgop jru lơn, n’hao tâm rgâl ăp mpôl bu năch đah Phú Yên n’hanh Dak Lak an âk lơn bah năp, nsrôih geh 2 tơ̆. Geh nău ntop kơl ndrel mpeh ăp nău kơl n’hŭch khlay tâm di, ntop kơl nkoch mbơh ndơ an nsum, tâm rgop nkoch trêng, mpla nsơ n’hanh ntrŭt ngăch pâl nđaih, mô knŭng ta tâm dak ma mbra ƀư kan ndrel dak bah dih, lor lah 2 ntŭk Trung Quốc n’hanh Hàn Quốc, lah 2 ntŭk geh âk bu năch tât đah n’gor âk lơn.

Du nkô̆ nău khlay dơi 2 hiệp hội tâm nchră, tâm ban ŭch tâm rơh aơ, nĕ lah trong rgum nsum ndâk ƀư n’hanh nău ƀư bah hiệp hội jêh nglăp nsum n’gor. Tĭng nĕ, nchrăp hiệp hội mbra rgum nsum nâm ơm mpeh dăp rmôt kan, ban chấp hành, nuĭh ủy viên n’hanh ăp chi hội mpeh tâm n’gor, đăp mpăn nău rgum nsum di ngăch ntĭm rđău bah kruanh 2 n’gor. Wa Nguyễn Thụy Phương Hiếu, Groi giám đốc N’gâng kan Văn hoa, Thể thao n’hanh Pâl nđaih Dak Lak nkoch nău mĭn nơm.

Mpŏng đŏng 2 hiệp hội ndâk ƀư geh trong tâm rgum nsum ndrel, yor rnôk ma 2 n’gor rgum nsum ndrel, 2 n’gâng kan rgum nsum ndrel ri 2 hiệp hội mbra rgum nsum n’hanh mbơh ƀư nău kan dâl. Hiệp hội bah 2 n’gor mbra ndrel ndâk njêng geh ăp ndơ nsum n’hanh uănh tât ndơ pâl nđih mpeh măng. Geh ăp dăn đă mpeh nău kơl gay ăp doanh nghiệp hun hao.

Mpeh trong mkra ntrŭt pâl nđaih, Hiệp hội Pâl nđaih n’gor Dak Lak n’hanh Phú Yên tâm ban ŭch ndâk njêng ndơ ntĭt mpơl, pâl nđaih măng, dăn đă ntop kơl nău kơl doanh nghiệp; bôk nău ntop kơl rnoh khlay an doanh nghiệp 2 n’gor gay hăn ndrel mpla nsơ 2 ntŭk Hà Nội, Hồ Chí Minh n’hanh dak bah dih...

Ta năp nĕ, Hiệp hội Pâl nđaih Phú Yên lĕ geh 2 nar hăn uănh ndơ pâl nđaih, ntŭk tât bah Dak Lak gay êp tât ndâk ƀư ndơ pâl nđaih boăt nthoi “dak lêng kloh uĕh đah bri yôk têh”. Hiệp hội pâl nđaih n’gor Dak Lak lĕ tâm ban ŭch trong nchrăp hăn uănh ndơ pâl nđaih ta Phú Yên tâm n’gul khay 7 tât gay nchrăp ăp nkô̆ nău jêng ndơ pâl nđaih tâm n’gor jêh nglăp nsum.

Đah ăp tâm ton n’hanh dăn đă kan ndrel geh âk nău ton, nău ƀư aơ an saơ du njoat hăn khlay tâm nău ntrŭt ntrôl pâl nđaih Phú Yên n’hanh Dak Lak hun hao têh dăng n’hanh nâp nâl, nta an du rkum pâl nđaih uĕh ngăn nkual miền Trung-Tây Nguyên n’hanh ta rup gui joi ntŭk pâl nđaih Việt Nam tâm năm tât.