Kêng măng ntri 16/5, ta Nhih pah kan Trung ương Đảng, Tổng Bí thư Tô Lâm hŏ wơt Thủ tướng Thái Lan, Kruanh rđău kan Đảng Yor dak Thái (Pheu Thai) Paetongtarn Shinawatra dôl khâl ngăn Việt Nam n’hanh ndrel ƀư tơm Rơh hop tâl 4, Chính phủ nsum Việt Nam-Thái Lan. Ta rơh wơt,  Tổng Bí thư Tô Lâm lah rjăp Việt Nam way uănh khlay n’hanh ŭch rŏng ntrŭt ntrôl tâm boh tâm rnglăp n’hanh tâm boh âk ntil đah Thái Lan – dak tâm kâng dêh bên, geh tâm boh jŏ jong, nkre lah dak tâm boh tăch rgâl n’hanh ntuh kơl khlay dâk bôk năp bah Việt Nam.

Tổng Bí thư Tô Lâm lah rjăp du đêt nău rgum tơm tă bah tâm boh Việt Nam – Thái Lan let năp tay: Dăn đă bar ding rdâk nâp tay nău nsing nơm chính trị ma trong ntrŭt ntrôl tâm boh ta lĕ rngôch ăp trong kan Đảng, Ngih dak n’hanh tâm nđŭr ƀon lan, way tâm khâl mbro, tâm mâp gưl têh n’hanh ăp gưl; mât kơt ơm geh nău dơi mbro trong tâm boh Chính phủ nsum n’hanh  ăp trong n’glăp tâm boh bar ding dôl geh aƀaơ đah bar dak tâm ban kơt gŭ mĭn n’hao ăp trong n’glăp tâm boh hao gưl têh lơn n’hanh njêng ăp trong n’glăp tâm boh mhe.