Măng 16/5, ta nkuăl ƀon têh Quy Nhơn, n’gor Bình Định ƀư nau nkah 70 năm cán bộ, tahen, ƀon lan ndrel kon se nti miền Nam ƀư jêh nau leo tahen hăn mpeh Bắc ta Quy Nhơn (16/5). Râng nau nkah, geh wa Nguyễn Trọng Nghĩa, Kruanh ban Tuyên giáo ndrel Dân vận Trung ương; wa Võ Thị Ánh Xuân, Groi Kruanh dak ndrel rđau kan ăp ntŭk kan, n’gâng kan, rmôt kan Trung ương. Ntoh nau tâm nar nkah, wa Nguyễn Trọng Nghĩa đă n’gor Bình Định ndrel ăp n’gor tâm Liên khu V lŏ n’hao tâm boh, tâm rgop săk tam lơn, ƀư ueh nau kan “tâm kơl an” “ngêt dak nkah gĭt tu”, ƀư nau ôp khâl, nkah, ryơk ăp rnăk geh dơi kơl, băl mpôl cán bộ, tahen, ƀon lan ndrel kon se nti hăn mpeh Bắc.

Nkre đă ân ntrŭt dăng nau nkoch trêng jru mpeh nau khlay aơ tâm lam Đảng, lam tahen, ƀon lan, ngăn lah rơh mon, lah rjăp nau rđau kan tâm di trong bah Đảng, Kruanh Hồ Chí Minh ndrel nau khĭt, roh, kơl an têh bah ăp rơh hăn lor. Nau ƀư ueh ăp nau ntĭm nti tă bah nau kan tâm rgop nsum ndrel ma nau kan ndâk njêng, nchiăr nti rơh cách mạng ndơn nơm, tŏng dơi nau ŭch nar lơn prêh tâm rnôk rgâl mhe ndrel hun hao./.