Rơh thi tốt nghiệp THPT năm 2025 dôl tât dăch. Ta ăp n’gor Tây Nguyên kơt Kon Tum n’hanh Dak Lak, mông nar ôn nkah tay  dôl lăp tâm rơh jăch ndăn, lơn lah ta ăp nhih nti nkual jru, nkual ngai, ntŭk geh âk mpưm ƀon  lan rnoi mpôl đê̆ kơt tĭng nti. Ntơm bah jrô nti jê̆ ta Tu Mơ Rông tât ăp ntŭk thi têh ta Dak Lak, nai ntĭm n’hanh kon se nti nsrôih tĭng nar. N’gâng kan ntĭm nti ta ntŭk hŏ nchrăp ăp trong ƀư gay rơh thi năm aơ ƀư lhăt jăp, đăp mpăn n’hanh di quy chế.

Rơh thi tốt nghiệp THPT năm aơ ta n’gor Kon Tum geh rlău 5.300 nuĭh đăng ký râng thi, tâm nê bơi 1.800 nuĭh rnoi mpôl đê̆. Gay n’hao săk blău rơh thi n’hanh rnoh âk kon se đậu tốt nghiệp, aƀaơ ăp nhih nti nkual jru, nkual ngai, nhih nti nội trú bah n’gor dôl ndăn nkah tay nău tă nti, nău blău ƀư bài an kon se nti. Nklang nău nteh wai ndrău, 36 kon se nti bah jrô nti 12A3 Nhih nti Phổ thông Dân tộc Nội trú nkuâl Tu Mơ Rông, nha hôm đăp rôn nhôn nkah tay môn Địa lí. Rơh ôn thi nar aơ ăp kon se dơi nai ntĭm ƀư Đề tham khảo mbrô 1 bah Sở Giáo dục n’hanh Đào tạo n’gor. Oh Y Diễm, an gĭt:

“Gâp saơ lah geh du đêt nău mpet jâk ntĭt kơt lah du đêt đề ma nai ntĭm geh du đêt nău ôp jêr tâm nău joi gĭt. Yơn geh trong nkra đŏng lah ôp nai ntĭm, pơk joi ta mạng mô lah hăn manh siƀŭt thư viện gay pơk uănh”.

Oh Y Thiệp, kon se nti jrô 12A2, an gĭt păng n’hanh ăp băl dơi nai ntĭm hŏ rƀah gĭt nău kơt nti n’hanh bên đah trong ƀư thi mhe:

“Aơ lah rơh thi lor bôk năp ma Bộ Giáo dục rgâl n’guăk đề thi. Lap du nău lah gâp hŏ dơi nai ntĭm nti n’hanh an ƀư bên đah nău tâm n’guăk đề thi bah năm jrô 11. Ăp bài kiểm tra nai ntĭm an mpôl hên kiểm tra tĭng nău tâm n’guăk đề thi mhe. Dŭt mhe aơ lah rlong ƀư thi tốt nghiệp phổ thông nhih nti an mpôl hên rlong thi tĭng nău tâm n’guăk mhe đŏng. Gâp dơi ƀư bên jêng mô geh nău jêr jŏt âk đŏng”.

Rơh thi tốt nghiệp THPT năm aơ Nhih nti Phổ thông Dân tộc Nội trú nkuâl Tu Mơ Rông, n’gor Kon Tum geh 110 nuĭh đăng ký râng thi n’hanh lĕ rngôch lah  oh kon nuĭh rnoi mpôl đê̆. Gay ăp kon se rƀah gĭt nău nti, nău blău ƀư bài thi nhih nti tâm pă kon se nti jêng 3 rmôt: Rmôt geh nău dơi đêt: Rmôt geh nău dơi ƀư mbơm oi n’hanh Rmôt geh nău dơi uĕh rlău gay nkah tay. Nai ntĭm Văn Trọng Lưu, Hiệu trưởng Nhih nti Phổ thông Dân tộc Nội trú nkuâl Tu Mơ Rông an gĭt, rơh jăch ndăn nhih nti rong an tay nău mât uănh khlay mha êng tât nău kơi nkah tay nău nti an kon se:

“Mpôl hên tĭng ƀư tay ăp nkô̆ ôn tập du trong ngăn ngăn n’hanh trong ƀư kiểm tra uănh năl gay ăp kon se nchrăp dŭt uĕh nău blău tâm ban kơt mpeh nău ngăch ƀư bài đŏng. Ăp kon se ân dơi geh ngăn ngăn lơn, gĭt dơi nkô̆ nău jru lơn gay  ƀư bài. Na nê̆ lah ân pơk uănh, joi gĭt nkô̆ n’hanh nău đă bah đề n’gluh gay ƀư bài. Tâm rnôk ôn thi nhih nti nta trong dŭt dơh mât chăm nău rêh drăp ndơ, nuih n’hâm an ăp kon se n’hanh an nai ntĭm ôn thi”.

Ta Dak Lak, n’gâng kan ntĭm nti n’gor dôl nchrăp wat jêh n’hanh ăp tŏng drăp ndơ n’hanh tơm nuĭh kan rhŏ dŏng gay đăp mpăn an rơh thi ƀư đăp mpăn, răp jăp n’hanh di quy chế, tŏng đah nău ŭch geh mpeh rơh thi bôk năp tĭng siƀŭt nti nti phổ thông 2018. Rơh thi năm aơ Dak Lak njêng 1 hội đồng thi, đah 53 ntŭk thi ndrel 948 jrô thi dơi tâm pă ƀư ta ăp nhih nti THPT n’hanh trung tâm giáo dục thường xuyên ta n’gor. Lĕ rngôch rnoh nuĭh râng đăng ký thi lah rlău 22.600 kon se nti, tâm nê geh rlău 530 kon se dah rŏng râng thi êng bah dih đah hội đồng thi êng.

Tât rnôk aƀaơ, pah  kan ôp uănh n’hanh nchrăp ndơ ta ăp ntŭk thi bôk năp hŏ lôch jêh. Pah kan mât uĕh ntŭk gŭ rêh, đăp mpăn kloh uĕh ndơ sa, dak si n’hanh trong mât đăp mpăn rnă njrăng, tâm pă mbor ndeh hăn dơi ăp n’gâng kan dơi kan ƀư nsum lhăt đŏng.

Ndrel đah nê, Sở Giáo dục n’hanh Đào tạo Dak Lak hŏ pơk jrô kơi năp nti nău blău kan an rlău 2.200 cán bộ, nai ntĭm, nuĭh kan dơi rgum râng rơh thi. Nkô̆ kơi năp nti dơi rgum tâm ăp ntŭk mhe tâm quy chế thi năm aơ. Ntĭm nti trong nkra ăp nău tât ntoh luh tâm rnôk uănh thi, tâm ban kơt dŏng phần mềm mât uănh thi, đăp mpăn tĭng ƀư di rêng n’hanh nău ŭch geh kỹ thuật. wa Lê Thị Thanh Xuân – Giám đốc Sở Giáo dục n’hanh Đào tạo Dak Lak nkoch:

“Mpôl hên an ƀư pah kan kơi năp nti nău blău uănh thi, treng nđôi thi, ôp uănh thi ƀư tĭng trong nkre pơk uănh bah ngai nkre ƀư na nê̆ tât ăp nai ntĭm n’hanh nuĭh kan, ăp cán bộ pah kan ta hội đồng gay tĭng nuĭh râng rƀah gĭt kloh quy chế, nău dơn kan gay tĭng ƀư đăp mpăn dơi du rơh thi răp jăp, đăp mpăn, uĕh di n’hanh geh nău tâm ban”.

Rơh thi tốt nghiệp THPT năm aơ lah jâng ntơm khlay đah hang rmưn kon se nti ta Kon Tum n’hanh Dak Lak, lơn lah ăp kon se rnoi mpôl đê̆ ta nkual jru, nkual ngai. Nău lor nchrăp, nău nsrôih bah kon se nti ndrel nău nđơr bah nai ntĭm nti n’hanh n’gâng kan ntĭm nti tâm nău nchrăp ăp nău gĭt blău, drăp ndơ dŏng lah jâng ntơm nâp dăng gay rơh thi ƀư đăp mpăn, lhăt jăp n’hanh nsĭt geh nău dơi âk. /.