Nô nău wăng sa- rêh jêng kon nuĭh bah n’gor Dak Lak tâm ăp khay bôk năm 2025 săk ntơr tay, đah âk trong năl rnoh tât hun hao nkah uĕh. N’gor hŏ ƀư wat jêh ăp njuat nchrăp an nuĭh kan lôch n’glăp nsum, n’hanh dôl rdâk njêng siƀŭt nchrăp lor dăn đă Đại hội đại biểu Đảng bộ n’gor tâl XVIII, năm kan 2025–2030.

Tĭng nău mbơh bah UBND n’gor Dak Lak, ăp khay bôk năm, ƀư njêng công nghiệp, tăch rgâl n’hanh pâl nđaih geh njuat hun hao uĕh. Rnoh âk năch pâl nđaih hao rlău bar tơ̆ rđĭl đah ndrel khay dja năm bah năp nơh. Ntŭk ntoh lư lah nsĭt geh prăk ngân sách rlău 5.000 rmen prăk, hao rlău 35% rđĭl đah năm bah năp nơh.

Yơn lah, bah meng ăp nău dơi geh nsrôih uĕh, n’gor Dak Lak dôl ât rdâng đah du đêt jêr jŏt đŏng. Wa Nguyễn Thiên Văn, Nuĭh dơi manh ƀư kruanh UBND n’gor Dak Lak đă ăp nkuâl n’hanh nhih pah kan rgum droh rklaih jêr jŏt, n’gluh tăch tơm prăk ntuh kơl, rƀŏng tât wat jêh ăp rnoh tât hun hao wăng sa- rêh jêng kon nuĭh năm 2025.

“Mpeh păng rup nkrum lam lah đăp mpăn, yơn n’gluh tơm prăk ODA lah mô dơi, he uănh sŏng tâm nê n’hanh mhâm ƀư ntrŭt ntrôl dơi tơm prăk ODA. Mpeh sŏk geh tơm prăk ngân sách trong nkra tơm prăk gưl n’gor lah 1.140 rmen prăk, n’hanh gưl nkuâl tĭng ƀư 1.600 rmen prăk. Ntơm bah aƀaơ tât kêng dŭt năm gưl n’gor hôm 600 rmen prăk đŏng, hôm gưl nkuâl ân tĭng ƀư 700 rmen prăk đŏng  ri mơ dơi tât trong nchrăp ndơ̆ luh. Đah gưl n’gor mbra dơi đăp mpăn, êng đah gưl nkuâl, rnôk rgâl nău dơn kan mpeh gưl xã ri mô dơh ma sŏk geh. Nău dja ăp oh nô ân mĭn tât.”

Ta Tâm nchră Ban Chấp hành Đảng bộ n’gor Dak Lak tâl 33 (pơk hvi), ăp đại biểu hŏ tâm nchră, an âk nău rgop nkô̆ khlay nchrăp an Đại hội đại biểu Đảng bộ n’gor tâl XVIII, năm kan 2025–2030. Tĭng trong nchrăp siƀŭt mbơh chính trị hao rblang dăn Đại hội Đảng bộ n’gor năm kan tât, n’gor Dak Lak mhe n’gluh 17 rnoh tât kan nsing lơn âk tâm ăp trong kan wăng sa, văn hóa – rêh jêng kon nuĭh, ntŭk gŭ rêh, njrăng n’gang neh dak- rnă njrăng n’hanh rdâk njêng Đảng. Nkre ntrŏng 5 rmôt nău dơn kan, trong nkra lơn âk ndrel ăp rêng đăt ndal trong tĭng ƀư rnoh tât hun hao ngăch, jŏ jong.

Tâm nchră rgum tâm rkhăch tay n’hanh tâm ban ŭch âk đah nkô̆ Đề án njêng Đảng bộ n’gor Dak Lak nsing ta nău n’glăp dơn ngoăy bar Đảng bộ n’gor Dak Lak n’hanh Phú Yên. Tĭng nê, lôch dăp rgum, lam n’gor Dak Lak (mhe) mbra geh 108 mpôl kan Đảng mpeh Tỉnh ủy, đah lĕ rngôch bơi 140.000 đảng viên.

Wa Nguyễn Đình Trung, Bí thư Tỉnh ủy Dak Lak, dăn đă tâm rnôk rdâk njêng siƀŭt, ăp gưl n’gâng kan, ăp ntŭk tâm dâng nsŏng kơl tay, rgop mpeh nkô̆ Đại hội n’hanh nkô̆ ăp trong nchrăp rgum tơm. Tâm nê, nău mât dŏng, ntik n’hao săk geh dơh uĕh bah bar n’gor Dak Lak n’hanh Phú Yên lôch n’glăp nsum ân nkre đah nău ŭch geh hun hao lam lĕ rngôch:

“Gŭ mĭn gay nkre ntik n’hao dơi săk geh dơh uĕh bah n’gor Dak Lak ơm n’hanh n’gor Phú Yên ơm, bar đŏng lah ân tŏng ăp nău dơn kan tơm bah 2 n’gor mô êng mpeh wăng sa ơm mô dơi đŏng, nkô̆ nău đăp mpăn tŏng ăp lam rêh jêng kon nuĭh, njrăng n’gang neh dak rnă njrăng, mât ndray ăp rnoh khlay văn hóa ân dŭt n’hâm njrăng uănh khlay. Hôm rêng ƀư đăt ndal mpeh rmôt cán bộ, he ân rgâl ri mơ hun hao dơi, đah nău ŭch geh âk bah Trung ương, bah ƀon lan ma nha hôm trong ƀư ơm đŏng ri mô dơi hun hao. Năm 2025 dăp rgum nuĭh kan lah du rơh cách mạng yơn êng n’gor Dak Lak dăp rgum cán bộ lah du rơh cách mạng.”./.