Nar 6/7, ta Bra​sil​, Thủ tướng Chính phủ Phạm Minh Chính hŏ râng Tâm nchră gưl têh BRICS pơk hvi năm 2025 n’hanh geh nău lah khlay ta Rơh tâm nchră gưl têh BRICS pơk hvi mpeh “N’hao dăng trong tĭng âk ding, ăp nkô̆ nău wăng sa – prăk kaih n’hanh trí tuệ nhân tạo”.

Rơh tâm nchră đah nău tât râng bah 35 kruanh rđău kan n’hanh ntơh măt ăp dak lăp kan nsum, ăp dak tâm boh n’hanh năch jă bah BRICS, ndrel kruanh ăp mpôl kan dak bah dih kơt Liên hợp quốc, Mpôl kan tăch rgâl lam ntŭr neh (WTO), Mpôl kan dak si lam ntŭr neh (WHO), ăp mpôl ndranh prăk kaih hun hao lam ntŭr neh n’hanh nkual. Lah ta rơh tâm nchră, Thủ tướng Phạm Minh Chính lah rjăp nău khlay n’hanh nău rgop bah ăp dak phương Nam tâm mât bôk kan lam ntŭr neh. Thủ tướng n’gluh pe nău dăn đă khlay, ngăn ngăn tâm trong tâm boh âk ding nsing ta ăp nău way tơm bah Hiến chương Liên Hợp Quốc n’hanh luật pháp dak bah dih, ntrŭt ntrôl dah rŏng tăch rgâl, uănh khlay nău dơi n’hanh nău geh tâm di bah ăp dak; ntik n’hao suan dăng bah trí tuệ nhân tạo (AI) gay rhŏ dŏng kon nuĭh.