Ôi 7/7, Kruanh dak Lương Cường tât râng Rƀŭn nchră n’gul 6 khay bôk năm bah N’gâng kan Công an. Ntoh ngơi ntĭm rđău Rƀŭn nchră, Kruanh dak Lương Cường lah rjăp tâm rnôk lam dak dôl ƀư tĭng ăp nău ntrŭnh, trong mkra gay hun hao neh dak, N’gâng kan Công an lĕ leo lor tâm ƀư tĭng Nghị quyết bah Trung ương mpeh đêt dơh tŏng ăp n’gâng kan; tâm rgop đah ăp ntŭk kan, ƀon lan gay mât nâp rnă njrăng chính trị, đăp mpăn nău rêh jêng.

Kruanh dak Lương Cường đă N’gâng kan Công an gĭt nâp nu nău, ngăch tâm ôp tâm nchră ăp trong mkra tâm di, mkra bah ơm, bah ngai ăp nău ƀư dun phah n’hanh ăp nău jêr mhe ntoh; rgum joi nking n’gang ăp nău tih dôih, nău tih rêh jêng, ngăn lah nău tih mpeh ntŭk ntô gŭ âm, đăp mpăn ndơ sông sa, ndơ rlăm, ndơ mô uĕh nâp, tih ma túy n’hanh tih công nghệ mhe, đăp mpăn ngăch ăp nău kan ndâk njêng ntŭk dữ liệu ngih dak, mô an tăch proăt, tăch gưl nău kan, mô ntlơi nsoih, mô an nkân ta nkual njônh ntih tih dôih.