Ntoh ngơi ta rơh rƀŭn nchră, Thủ tướng Phạm Minh Chính lah na nê̆: Năm 2025 geh nău kan khlăy ngăn, lah năm n’hao ngăch, n’hao mpeh nău tât lôch, ƀư dơi ăp nău nchrăp hun hao wăng sa- rêh jêng 5 năm 2021-2025, lam dak dôl nsrôih dŭt âk, nsrôih an ƀư lôch nău dơi lĕ rngôch ăp nău mpŏng wăng sa- rêh jêng năm 2025, ngăn lah hun hao lĕ năm an geh 8% let lơ, nkre lah rgum tâm rlong ƀư lôch ueh ăp nău kan geh pă jao gay ma vơt rhơn 80 năm nar njêng ngih dak, vơt rhơn Đại hội Đảng bộ ăp gưl, mpŏng tât Đại hội Đảng lam dak tal 14. Thủ tướng an lah, tâm rnôk bâh aƀaơ tât lưo 31/12/2025 kanŭng hôm geh 5 khay dơm, rnoh nău kan hôm nha âk ngăn, tâm rnôk nĕ nău geh ngluh mbơh lah trong hăn an geh ƀư lor, pơk trong, ƀư jâng nsan bôk năp gay ma ăp n’gâng kan, ntŭk kan, njêng nău mhe an neh dak, pơk luh nău mhe an hun hao, n’hao nău tâm rlong bâh ndơ tâm dak n’hanh dak bah dih.