Tâm ngih bah Mẹ Việt Nam janh dăng Võ Thị Đủ (97 năm) tâm xã Đông Sơn, n’gor Quảng Ngãi geh khuh bâr gơm, ngơi. Ăp nar, ăp cán bộ, tahen tâm Rnâng kan rđau tahen n’gor Quảng Ngãi, Rnâng kan rđau tahen xã, rmôt quân quân ndrel đoàn viên druh ndăm tâm nkuăl tât ôp khâl, nkoch bri, kơl an Me Võ Thị Đủ rep ngih vâl. Sai ndrel kon bu klô Me kŏ râng nau tâm lơh mât ndeh dak ndrel khĭt tâm tâm lơh. Rnôk neh dak đăp mpăn, me Võ Thị Đủ mro ndơn geh nau kơl an, mât chăm ƀa ƀơ bah cán bộ, tahen tâm ƀon lan:

            ‘Rnôk aơ săk Me lĕ ranh, mô dơi hăn, mô dơi ƀư. Rnơm oh nô tahen kơl an Me rep ngih vâl ân kloh ueh, yan aơ duh nar ngăn ri ma chrat tâm ngih tâm dĭng nar ri nơm ân nchăng lơi mpông. Lah nơm bĭch ri bôk rngok mĭn ăp ntil nau aơ ri ngăn. Nar aơ geh oh nô tât khâl, ân ndơ aơ, ndơ ri ndrel kơl an ngih vâl nâp ueh ndrel kơl an gâp âk ndơ ngăn. Me lah ueh ndrel rhơn ngăn”.

            Tâm n’gor Quảng Ngãi, rlau 6.800 Me geh pă ân săk ntơ Me Việt Nam janh dăng, rnôk aơ 106 me hôm rêh. Tâm nê, N’gâng kan rđau tahen n’gor Quảng Ngãi ndơn nau răk 21 nŭih me tât lôch nau rêh. Ăp năm rlau aơ cán bộ, tahen n’gor Quảng Ngãi mro ƀư ueh nau kan mât chăm, răk rong Me Việt Nam janh dăng, nŭih geh n’hâm ma cách mạng, ăp rnăk dơi kơl. Wa Lê Văn Công, Groi Rđau kan, Rnâng kan rđau tahen xã Đông Sơn, n’gor Quảng Ngãi, mbơh:

            ‘Gâp saơ nau kan aơ geh nau khlay ngăn, kơl an ân rơh mom rnôk aơ dơi gĭt kloh ăp nau khlay, nau khĭt ôm roh hoach bah ăp Me kŏ kơt lah ăp nô, ăp kônh hŏ lĕ roh săk nơm yor nau đăp mpăn ân neh dak. Bah ăp nau kan aơ lah nau khlay ngăn ân rơh mom bah hên, gay ân rơh mom hên du tŏ tay đŏng geh nkah ndrel nê kŏ lah nau nkah ân rơh mom phung hên geh nau kan ndrel nau khlay ma nau kan nơm lơn’.

            Ăp rmôt tahen n’gor Quảng Ngãi hŏ ndrel dôl tâm rgop ngăn ma ăp n’gâng kan gay rklaih ân năn, tŏng ăp nau kan bah Trung ương, bah n’gor đah ăp nŭih dơi kơl. Nau kan hăn joi, rgum nting tahen khĭt tă bah âk năm ma aơ geh Đảng uỷ N’gâng kan rđau tahen n’gor ngăn ngên kơl an. Ntơm bôk năm tât rnôk aơ, Rnâng kan rđau kan N’gâng kan tahen n’gor Quảng Ngãi hŏ ndơn, năl, đă pă rklaih 24 hồ sơ tahen sôt rmanh jêh lôch tâm lơh, ntĭm mbơh nau năn, đă kơp dơn tahen khĭt.

            Êp nê, N’gâng kan rđau tahen n’gor Quảng Ngãi tâm rgop ma ăp n’gâng kan ndrel ntŭk kan geh tât năl moh ma ăp nau ŭch leo ăp ndoh ndơ bah tahen sĭt ma rnăk vâl, băl mpôl. Rmôt kan hŏ pă 20 hồ sơ ndoh ndơ tât ma băl mpôl rnăk vâl.

            Đah nuih n’hâm nkah jru tât ăp rơh hăn lor, ăp nar aơ, cán bộ, tahen rmôt tahen n’gor Quảng Ngãi ƀư âk nau kan mât kơl an ân rnăk vâl dơi kơl, tahen khĭt; ƀư nau khám, săm ji, pă dak si dơm ân ăp rnăk dơi kơl, nŭih geh n’hâm tâm n’gor. Đại tá Võ Tấn Tài, Chính uỷ Rđau tahen n’gor Quảng Ngãi lah rjăp:

            “Nau kan kơl an geh Đảng uỷ Rđau kan tahen n’gor uănh khlay kơl an ngăn, Tâm rơh rlau aơ kŏ hŏ ndâk ân nau kan geh nau khlay, ngih kơl an ân ăp rnăk dơi kơl ndrel kơl ngăn tât ăp rnăk rnôk aơ ê geh ngih vâl nâp ueh, tâm nê geh rnăk dôl ma ƀư ôp brah ăp tahen khĭt, ƀư ăp rmôt hăn khâl ndrel nkah pă kơl ân ăp nŭih aơ đŏng”./.