Nău nchih tâl 3 lah nău nchih n’glĕ dŭt bah du rut nău nchih “jut jăng jay truh sat, nkưp nde-rdâk nău nsing nơm ta ƀon lan Tây Nguyên” nkoch nău khlay mha êng bah bôk nău kan n’hanh nău nsing nơm hŏ dơi njêng geh ta ăp ƀon lan Tây Nguyên.

Tâm jay mhe hvi 60 m2, nô Y Lô Ksor, nuĭh Êđê ta ƀon Hiao, xă Ea H’leo, n’gor Dắk Lắk mô mpôn nău răm. Nô Y Lô nkoch, jay âk kon, mê̆ ranh rlău 80 năm deh, ta năp đaơ lĕ jay rêh mpet tâm du jay ka đar sat nsoet, mih truh, sial lăp, mê̆ nô ƀa ƀơ kop ji. Lĕ jay knŭng kâp tâm đêt sào bum, geh prăk mô tŏng. Mhe aơ, dơi Công an n’gor ntop kơl 80 rkeh prăk, nô manh tay 40 rkeh prăk ndâk ƀư mhe. Bah nar geh ntŭk gŭ kloh uĕh, mê̆ nô ngăch lơn, oh kon răm lơn, hôm nô đăp mpăn pah kan jan sa. Aƀaơ nô Y Lô hôm ŭch êng râng Rmôt mât uănh ƀon, dŭt n’hâm hăn uănh nđôi ƀon lan, rgop mât đăp mpăn ăp măng.

Rnăk wâl jêr jŏt, geh tât 8 nuĭh gŭ tâm jay si ơm, mpet hăt; mih ri truh, duh ri r’ôl. Neh mir đêt đŏng, lŏ gŭ ta yôk prêh jêng mô dơi tăm tơm jŏ năm. Dơi Đảng, Ngih dak n’hanh N’gâng kan Công an ntop kơl rdâk ƀư jay kloh uĕh, lĕ rnăk wâl răm ngăn. Aƀaơ mĭn ƀư sa, mât kon nti nsơm, ndrel tâm kơl ƀon hun hao.

Kơt âk rnăk ƀon lan êng ta ƀon lan Tây Nguyên, yuh H’Bui Đing, nuĭh rnoi Êđê ta ƀon Zia, xă Hòa Sơn, n’gor Đắk Lắk, mô mpôn nău răm rnôk lăp tâm jay mhe hvi bơi 40 m2, khlay 80 rkeh prăk. Yuh nkoch, rnăk ach o lŏ mât tât 4 nuĭh kon n’hanh me bơ̆ ranh, rnăk wâl yuh wăr năm  mô ru đah 1-2 sào neh yôk kro ntang, mô dơi tăm cà phê mô lah tiêu. Nău rêh jêr jŏt, tât nău sa hôm rwê, ri nău ƀư jay knŭng lah mbơi ngai ngăt. Yuh H’Bui răm nkoch:

Lah nsum, rnăk wâl jêr jŏt, mô dơi nkoch lĕ nău njê, rêh lôch nar knơm ƀư kan manh dơm. Ngih wâl duh mih ri truh, rêh kâp lôch nar dơm. Mir ri neh yôk, knŭng geh 1-2 sào neh kro ntang. Ăp cán bộ lĕ ntop kơl an ƀư jay, rnăk wâl răm ngăn. Lah uĕh Đảng, Ngih dak n’hanh N’gâng kan Công an, ăp gưl nău kan ƀon lan. Geh jay gŭ đăp mpăn, mpôl hên mbra rgum ƀư sa, mât oh kon hăn nti.

Mpeh đah ăp n’gor Tây Nguyên, aƀaơ lah lĕ Nam Trung Bộ, nău tâm n’gul năm an ƀư tĭng lôch lĕ bah dôh rklaih samƀŭt neh ntu, rgŏ jă prăk, nuĭh kan gay ndâk ƀư rlău 20 rbăn mlâm jay, lah ji ŏk mô hŏ tă geh. Yơn nău ƀư tĭng dơi bôk nău kan, nsĭt tay an ăp ƀon lan ăp nău blău ơm khlay gay geh nuih n’hâm nsing nơm dăng tay ăp nău kan têh tâm lvang mhe.

Đại tá Nguyễn Văn Dũng, Groi Giám đốc Công an n’gor Lâm Đồng, nkoch mpeh ăp nău nsrôih bah rmôt công an tâm nău ƀư tĭng “nău kan nsum”-nkre đăp mpăn rnă njrăng ta ntŭk, nkre rgŏ jă dŭt n’hâm rmôt nuĭh, ndeh rklư gay râng ntop kơl nuĭh ƀon lan ndâk ƀư jay gŭ. Đah nuih n’hâm dŭt n’hâm tâm ntĭm rđău n’hanh nău lăp rĭng tâm ban bah lam rmôt, rnoh ndơ pah kan têh lĕ dơi jêh tâm đêt khay.

Nău mbơh ƀư aơ ban Giám đốc ƀư tĭng dŭt n’hâm. Na nê̆, 5 đồng chí geh Giám đốc n’hanh 4 groi Giám đốc lah tổ trưởng, na nê̆ ntrŭt đă rmôt nuĭh tâm ăp rmôt gay ntop kơl mbơh ƀư jay an nuĭh ƀon lan. Nkre, đă tât râng bah lĕ rngôch ăp ntŭk kan; tâm nĕ, ntĭm rđău Công an ăp xă,  phường tâm ôp tâm nchră dŭt n’hâm an UBND ăp xă rgŏ jă lĕ trong chính trị, ăp thôn, ƀon n’hanh lĕ nuĭh bên mô lah jrŏng rnoi kiău ma bah nuĭh ƀon lan ndrel lăp, ndrel ty kơl ƀư nău kan jut jay truh sat.

Tâm ăp nar nchrăp nglăp nsum n’gor, xă n’hanh nchrăp an nău ƀư bah n’gâng kan ƀon lan 2 gưl, lah lvang rhoăt ndăn bah bôk nău kan jut ngih rông, mpông sat, Tổng Bí thư Tô Lâm khâl n’hanh pah kan đah du đêt n’gor Tây Nguyên. Tổng Bí thư nchrŏng trong n’hanh ntĭm rđău kloh: Ndâk njêng Đảng an hăn ndrel đah mpăn mât njrăng bri dak-rnă njrăng n’hanh hun hao wăng sa-rêh jêng nâp nâl. Đah bôk nău kan jut ngih rông, mpông sat ma ăp n’gor dôl rhoăt ndăn ƀư, Tổng Bí thư mĭn lah, aơ nkre lah ăp ndơ ƀư đăp mpăn rêh jêng, nkre lah ndơ ƀư bah nău nsing nơm, jêng Tây Nguyên lơ an nsrôih:

Ƀư jay an kônh wa gŭ ri rhơn ngăn. Nău rêh bah nuĭh ƀon lan lư n’hao ri lơ hao tay nău geh mât njrăng bri dak-rnă njrăng. Nuĭh ƀon lan nar lơ nsing nơm tâm Đảng, Ngih dak du nuih n’hâm tĭng Đảng ri soan dăng têh tâm rnglăp rnoi nuĭh, tâm rnglăp nuĭh ƀon lan nar lơ hao. Nău rƀŏng nĕ an ƀư uĕh.

Khay 7 rsơl plơng, khay 8 nkah gĭt Cách mạng lôch uĕh, khay 9 n’gŭr răm nkah gĭt 80 năm Quốc khánh... n’hanh ăp ƀon lan ta Tây Nguyên mhe lĕ geh rlău 2 rmưn rnăk jay mhe an ăp nar khlay aơ. Tâm ăp jay đăp mpăn bah nơm, kônh wa ta lam Tây Nguyên geh tay nuih n’hâm nsing nơm ndrel lam dak lăp tâm lvang dăp tay neh dak, lăp tâm rach năm hao êng nơm hun hao.