Tĭng trong leo “Druh ndăm kơt nti n’hanh ƀư tĭng nuih n’hâm uĕh lŏng, trong gŭ rêh Hồ Chí Minh”, âk đoàn viên, druh ndăm ta Dak Lak hŏ nsrôih tiăr nti, nsrôih n’hao gĭt blău êng săk nơm n’hanh kơt nti bah Wa Hồ tâm ăp nău kan na nê̆ ăp nar. Bah nê ntoh  ăp nuĭh ntoh lư, ăp nuĭh nsrôih uĕh ta tĭng ntŭk gŭ kơt nti, pah kan.  

Rlơ̆ đah uănh săk bah dih jê̆ lê̆ tâm ban kon se nti tiểu học n’hanh jâng ti mô uĕh lăng, Chương Đình Phúc, (deh năm 2005), sinh viên năm 2, jrô Sư phạm tiếng Anh, khoa Ngoại ngữ, nhih nti Đại học Tây Nguyên nsĭt tay an nuĭh kiău ma tơm dak rah rơch yor nău nkoch bri nđơr rhơn n’hanh nău nkoch rlău dơi jêr jŏt nsan hao. Phúc geh kruăt 2 ding ti ơm bah ndŭl me, suan djôr, năm kon se mô ăp tŏng yor me bơ̆ tâm ntlơi ƀư săk nơm ji đit prêng. Đah nău ntop kơl bah  ăp nuĭh kiău ma, Phúc hŏ rlău dơi nău đit prêng, nsrôih kơt nti n’hanh râng ăp trong leo đoàn, hội, jêng nuĭh ntoh lư tâm dŭt âk nău  kan ta gưl phổ thông n’hanh đại học. Phúc lah ngoăy tâm ăp nuĭh ntoh lư dŭt mom tâm bôk nău kan “Chrat ang nuih n’hâm rôih dăng Việt” năm 2024.

 Chương Đình Phúc nkoch, 5 nău Wa Hồ ntĭm dơi nti kăr ơm bah jê̆ jêng “du trong sro” gay nô nsrôih kơt nti n’hanh nsrôih ăp nar. Bol geh ăp jêr jŏt mpeh săk suan, nô nha hôm wơl jêng nuĭh way leo ntơm bôk nău ngơi n’hanh lah du nai ntĭm nđơn tay nău nđơr an kon se nti.

“Gâp ŭch rŏng lôch hăn nti ri gâp nha hôm kơt nti wa Hồ, nê lah rnôk he kơt nti dơi moh ntil ndơ lôch nê he mbra ntĭm an nuĭh êng. Gâp ŭch rŏng mbra lah du hê nuĭh nai ntĭm mô dơn ntĭm ăp băl mpeh  nău gĭt blău ma hôm lah du ntŭk nsing mpeh nuih n’hâm gay  ăp băl geh nău rêh jêr jŏt, ăp nău tât nuih  n’hâm mô uĕh mƀak geh ntŭk ma nsing, gay mô ân kâp rlău nău rêh jêr jŏt nê êng du hê tâm ban kơt gâp hŏ tă rlău rnôk hôm jê̆”.

 Nơm geh nău ntĭm nti bah Wa “Ntŭk ŭch druh ndăm geh, moh ntil nău jêr geh druh ndăm”, nô Trần Tiến (deh năm 1992), nuĭh way kan jrô kan mât Sŏk – Sổ, Thẻ, Bảo hiểm xã hội n’gor Dak Lak hŏ nsŏng kơl, ƀư ăp nău kan druh ndăm rƀŏng tât ăp ntŭk jêr jŏt mha êng tâm n’gor. Nô âk tơ̆ buăt nthoi ƀư rêng kan rgop mât ndray, rêng lam ăp rnoh khlay văn hóa bah nuĭh rnoi mpôl đê̆, kơt nkra, kuaih kloh uĕh ndrâm dak, n’hao nău gĭt mât njrăng êng ntŭk gŭ rêh an nuĭh ƀon lan; pă nklâm ndơ, ntop kơl prăk trêng nti tay chĭng gong an nkual n’har bri. Ndrel đah nê, nô Tiến hŏ joi, ntrôl dăng rgâl mbrô tâm nău tĭng ƀư nău way blău kan, geh âk trong ntĭt leo mhe, trong ƀư mhe gay ntop kơl nuĭh ƀon lan cài đặt, dŏng ăp ndơ pơk bah ngai, nta trong dơh tâm rnôk rhŏ dŏng n’hanh dŏng ăp ndơ bảo hiểm xã hội. nô Trần Tiến nkoch:

“Gâp lah đảng viên mom, dơi chi bộ nta trong dơh mbro dơn mât du đêt nău way kan gŭ rêh, geh ndơ ma joi gĭt wât jru lơn du đêt nkô̆ way kan na nê̆ bah nău kơt nti n’hanh ƀư tĭng nău Wa. Gâp way nsrôih lĕ n’hâm suan he nơm yor nău kan nsum, tâm nău tĭng ƀư nău dơn kan way kan ri gâp kơt nti Wa dŭt âk ta nuih n’hâm kơt nti êng, mô rlu kơt nti gay n’hao nău gĭt blău săk nơm”.

Đah yuh Nguyễn Thùy Trang, deh năm 1992, Bí thư Đoàn phường Ea Tam, nkual ƀon têh Buôn Ma Thuột, bol moh ta rnoh năm deh, moh ntŭk gŭ kan, yuh gĭt kloh nău khlay kan, nău dơn kan bah nuĭh cán bộ. 23 năm deh hŏ lah Groi kruanh Mặt trận Tổ quốc phường dŭt mom Dak Lak, yuh Trang hŏ lor nchrăp nkre đah kơt nti n’hanh ƀư tĭng nău mĭn, nuih n’hâm, trong gŭ rêh Hồ Chí Minh tâm nău kan way kan. Ntơm bah rnôk rgâl way pah kan đoàn, yuh hŏ rgŏ jă rdâk njêng 7 ntŭk kan druh ndăm, leo ƀư âk nău kan đăp mpăn rêh jêng kon nuĭh, nsrôih râng rgŏ jă druh ndăm lăp êng tahen, ntop kơl druh ndăm ntơm njêng nău kan, buăt nthoi druh ndăm râng ăp bôk nău  kan mât ndray n’hanh ntik n’hao văn hóa way ơm ăp rnoi nuĭh. Bah nê, nta trong dơh buăt nthoi, ntik n’hao nău khlay kan bah druh ndăm tâm dâng. Yuh Nguyễn Thùy Trang an gĭt:

“Ma ăp rơh rgŏ jă tâm ban kơt joi gĭt mpeh Wa ri săk nơm kơt nti dơi ta Wa ăp nuih n’hâm đăp dêh, jăp gơih n’hanh  ân way mpư n’hao nău dơn kan bah săk nơm tâm nău tĭng ƀư nău dơn kan dơi jao bah ăp gưl. Kloh rsang sŏng di, tĭng ƀư di rnoh n’hanh tĭng di nău way bah mpôl kan gay njêng luh tâm boh dêh bên đah Đảng đah nuĭh ƀon lan n’hanh tâm cán bộ đah đoàn viên, druh ndăm”.

Ma ăp nău kan ngăn ngăn, na nê̆, tâm di đah ntŭk gŭ pah kan n’hanh kơt nti, druh ndăm n’gor Dak Lak hŏ “Kơt nti n’hanh ƀư tĭng nuih n’hâm uĕh lŏng Hồ Chí Minh” du trong rêh uĕh. Ăp nuĭh ntoh lư tâm rơh rgŏ jă dja hŏ njêng suan rêng lam dăng tâm đoàn viên, druh ndăm, rgop khlay tâm nău ƀư wat jêh nău dơn kan pah kan, kơt nti ta ăp nhih pah kan, đơn vị, nhih nti ta Dak Lak.