Nar 16/5, ta Nhih pah kan kruanh dak, Thủ tướng Chính phủ Phạm Minh Chính hŏ ƀư tơm Lễ wơt ngăn Thủ tướng Thái Lan Paetongtarn Shinawatra. Lôch rnôk wơt, 2 Thủ tướng ndrel ƀư tơm Rơh hop tâl 4, chính phủ nsum Việt Nam – Thái Lan. Ta Rơh hop, Bar Thủ tướng tâm ban ŭch  n’hao têh tâm boh Thái Lan- Việt Nam hao Tâm boh têh jong lam lĕ rngôch.

Rgum nkoch tay tâm boh 2 dak lôch 10 năm njêng tâm boh têh  jong, Thủ tướng an gĭt 2 dak geh ăp ntŭk chrat ang ntoh lư: Nê lah nsing nơm chính trị têh jong mô rlu dơi n’hao têh, tâm khâl nsum  dơi ntrôl dăng ta lĕ rngôch ăp trong kan, ăp gưl. Tâm boh njrăng n’gang neh dak rnă njrăng nar lơn ma lăp tâng jru jêng du n’gâng tơm khlay bah 2 dak. Tâm boh wăng  sa, tăch rgâl, ntuh kơl hun hao ndal lĕ mpeh săk geh. Ntơm bah năm 2016 tât aƀaơ Thái Lan lah băl tâm boh dŭt têh bah Việt Nam n’hanh Việt Nam lah dak tâm boh têh tâl 2 bah Thái Lan tâm ASEAN, đah nsĭt geh tăch rgâl 2 ding năm 2024 geh rlău 20 rmen USD n’hanh rƀŏng tât 25 rmen USD tâm ăp năm bah kơi tay. Lôch  rơh hop tâl 4, chính phủ nsum Việt Nam -Thái Lan, Thủ tướng Phạm Minh Chính n’hanh Thủ tướng Paetongtarn Shinawatra hŏ uănh saơ Lễ tâm rgâl siƀŭt tâm boh đah ăp Bộ, n’gâng kan bar dak.