Tâm jay têh uĕh mhe dơi ƀư an, rnăk wa Rơ Lan Đếu ta ƀon Bó, xă Ia Kly, nkuăl Chư Prông rhơn wơt kônh wa rnoi mpôl dăch ngai tât khâl, mbah rhơn. Bâr ngơi gơm n’gŭr răm lam jay mhe, rêng hvi nău răm rgum nsum n’hanh nău m’ak. Bah aơ, rnăk wâl wa lĕ geh ntŭk gŭ ntŭk sa rnôk geh jay gŭ đah jay ŭnh răm m’ak, ndơ ƀư jay ăch chrach, jâng gung n’hanh mpông pêr nâp nâl.

Jay bah wa Đếu lah ngoăy tâm rlău 1.000 mlâm jay mpeh tâm bôk nău kan jut ngih rông mpông sat dôl dơi ƀư ta nkuăl Chư Prông tâm năm 2025. Wa Rơ Lan Đếu rhơn an gĭt, jay mhe lah nău rgop tay bah âk nuĭh lŏng bôk tôr, bah băl mpôl, nuĭh bên tât Mặt trận Tổ quốc, ăp nsum mpôl chính trị-rêh jêng n’hanh rmôt vũ trang ta ntŭk.

Gâp rhơn ngăn. Dăn lah uĕh ăp gưl lĕ kơl prăk, nar luh ƀư an rnăk wâl gâp du mlâm jay lŭ têh hvi. Aƀaơ geh jay hôm, rnăk wâl mbra nsrôih ƀư sa gay hao.

Ta nkuăl Chư Prông-ntŭk geh rnoh jay truh sat ŭch jut jăng âk ngăn n’gor Gia Lai, trong rgŏ jă nar luh bah nuĭh tơm jay tâm rgop đah ndrel ty bah ăp rmôt kan chính trị-rêh jêng lĕ kơl trong mkra tơm prăk n’hanh ntrôl ngăch ndâk ƀư. Aơ lah ntrong ƀư dơi nkuăl kơt dŏng âk gay n’hao ngăch ƀư tĭng bôk nău kan, kơl nuĭh ƀon lan ơm geh jay mhe kloh uĕh, têh hvi. Trong ƀư tâm ban nĕ đŏng, nkuăl Phú Thiện lĕ nchrăp lor mbơh ƀư âk. Nkuăl rwăt lŭ choih nsum đah rnoh âk gay n’hŭch khlay prăk, jêh nĕ tâm pă sĭt ăp xă. Trong kan ndâk ƀư dơi ƀư uĕh, rgŏ jă rmôt nuĭh way ƀlău kan ƀư jay, nuĭh ƀon lan râng kơl luh.

Knơm nĕ, tât aƀaơ, nkuăl lĕ jêh trong nchrăp, tât lor nar khay ma Ban ntĭm rđău n’gor jao; đăp mpăn nuĭh ƀon lan geh jay nâp nâl ma hôm e tĭng nău uĕh way ơm. Wa Nay H’Doănh, xă Ia Piar, nkuăl Phú Thiện nkoch nău răm rnôk trơn gŭ jay mhe:

Rnăk wâl gâp lah uĕh Đảng, Ngih dak n’hanh ăp gưl âk ngăn. Aƀaơ geh jay mhe, đăp mpăn ƀư sa, mât rong an oh kon hôm.

Năm 2025, rƀŏng tĭng ntĭm rđău dŭt n’hâm bah Thủ tướng Chính phủ, Gia Lai geh nău rƀŏng jut jăng 8.485 mlâm jay ngih rông mpông sa. Rnôk bôk nău kan mhe mbơh ƀư, Ban ntĭm rđău n’hanh Rmôt kơl kan bôk nău kan dơi ndâk ƀư, ntĭm rđău na nao tât tĭng n’gâng kan, nău kan, ƀon lan. Knơm nĕ, ntrong leo wăch rgum tât râng dŭt n’hâm bah gưl ủy, n’gâng kan ƀon lan, nsum mpôl, rmôt vũ trang. Ntoh lư ngăn lah Công an n’gor lĕ nsrôih rgop prăk, nar luh, tâm rgop đah n’gâng kan ƀon lan, Mặt trận Tổ quốc, nsum mpôl n’hanh Nuĭh ƀon lan ntrôl ngăch ƀư. Thiếu tướng Rah Lan Lâm-Giám đốc Công an n’gor, Kruanh Ban ntĭm rđău bôk nău kan jut ngih rông mpông sat Công an n’gor Gia Lai an gĭt:

Đảng ủy Công an n’gor lĕ mbơh ƀư săk rnglăy. Cán bộ, tahen lĕ kơl du nar prăk khay, rgop rlău 3 rmen prăk. Nkre rgop nar luh, tâm rgop rjăp đah ăp nău kan, ƀon lan, mbơh ƀư dŭt n’hâm bôk nău kan, n’glơi an âk nău uĕh tâm nuih n’hâm ƀon lan.

Đah soan dăng rgum lĕ rngôch ndrel âk nău mĭn ƀư mhe, tât aƀaơ n’gor lĕ geh rlău 82% trong nchrăp rdâk ƀư n’hanh 42% trong nchrăp jao an. 7/17 ntŭk lĕ jêh trong nchrăp: Nkual ƀon têh Pleiku, Nkual têh An Khê, nkual têh Ayun Pa, ăp nkuăl Đăk Pơ, Đức Cơ, Krông Pa n’hanh Phú Thiện. Ăp ntŭk êng dôl nsrôih ngăch gay jêh lor bôk nău kan. Wa Đinh Văn Dũng, Bí thư Nkuăl ủy nkuăl Chư Prông mĭn lah nsrôih ƀon lan kơt lah nsrôih nsum bah n’gor, lôch jêh bôk nău kan bah năp yan mih năm aơ.

Lĕ rngôch ăp jay ƀư di nău ntrŭnh da dê, rnoh neh bah 36 m2 let lơ. Âk rnăk manh tay ƀư jay 60-70 m2, tŏng ăp mpêr n’gar, jâng gung jâng rêng, jay ăch chrach. Tât 30/6, mpôl hên mbra jêh lĕ rngôch 997 mlâm jay ƀư mhe, đăp mpăn 100% nuĭh geh jay gŭ nâp nâl, lơn lah rnăk ach o, êp ach o, n’hao nău rêh nuĭh ƀon lan.

Nău nsrôih dŭt n’hâm, mĭn ƀư mhe tâm trong mbơh ƀư bôk nău kan jut jay truh sat ta Gia Lai lĕ nsĭt tay săk rnglăy uĕh. Du nău kan cách mạng đah jay gŭ an rnăk ach o lĕ êp nar tât, kơl muh măt thôn ƀon, ngăn lah nkual rnoi mpôl đêt n’gor Gia Lai nar lơ kloh uĕh, rgâl mhe.